Jaku Lalau Maya Pengawa Bepilih Besai Parlimen

Jaku lalau ari Iban Saratok nuju semua Iban ba menua Sarawak.Sida tu nyadi chunto Iban ulih begempung.

Kena napi PRU 13 ti deka datai tu ila, uji raban bansa Dayak nguji ngingatka kaul pendiau enggau pengidup orang tuai ke dulu kelia. Reti kaul enggau pendiau iya nya ngenang gaya basa enggau penyerakup gempung ati kitai enggau pangan diri ti nadai ngira penatai enggau umur.

Orang kelia ulih begulai sejalai betuaika siku lelaki tuai nyentukka iya parai udah nya lalu disilih anak iya empu. Sida jarang didinga belaya ti tau ngujungka rumah pechah belumpung perabung. Sida begulai sejalai saum perabung saum pemetung. Orang kelia nadai gila berebut deka nyadi tuai lalu besaup ngereja pengawa ngena chara beduruk, enda baka kitai kemaya tu hari iya ke kaya lalu nyadai raja tang iya ke suntuk lalu semampai enda tau enchauk lalu mesti nunduk, enggaika diri diparuk tauka dikeremuk dilamun orang.

Nya alai uji kitai sama berunding panjai, ngaul pangan diri nitihka jaku tuai. Iya ka buta ma, iya ke kait tambit dalam selabit, iya ke rarat ambat, iya ke anyut paut. Kebuah pia ngambika bansa Dayak enda kelalu beserekang penemu ketegal politik ti semina nguntungka siku dua bansa Dayak ke nyadi tuai aja. Tang bala nembiak redak semina ngemataka sida ngulihka pengeraja peli-peli leka mata udah ke nerima duit seringgit dua.

Lengkaka penemu kepapas ngambika pendiau kitai nadai tikas enggau pangan diri. Kitai semua nyau deka sebaka pengering tulang enti kitai chukup bisi orang meransang lalu begempung nuju pemansang. Iya ke pandai ngiring kitai, lalu iya ke kaya nyadi raja nulung bansa.

Nya alai ngarapka bansa Dayak mutus ati puting geraji milih pengari nuju pengelantang. Anang rindang ninga leka timang pemansang ke semina ngasuh kita kiruh bepeluh tang mata tekangkang temutah puang laban lapar pungkang. Semua temuda rimba suba enggi kita tang ila enggi orang magang. Ukai ngumbai kita bejual temuda rimba tang semua nya ga udah diambu bala sida ke megai lunga tajam besimbang, ngambi kediri nulis ngelukis ngena pensil arang sebatang. Sida ke bansa tu mih tau diasuh kitai badu uji lengkaka dulu nguji enda lama meda gaya empa pegai orang. Enti bisi ubah berasai manah, sida nya mih majak disembah ngambika bansa Dayak enda tasah nyadi kampar dialahka bansa orang. (Dibali ari https://www.facebook.com/dayakpeopleeducated)