Empai lama ti udah aku bisi tebacha pasal siti pejah senentang pekara ti bisi kaul enggau pelajar jaku Iban sereta penuduk iya dalam guna jaku sereta pemansang jaku kemaya hari tu. Ketegal ti berasai sinu medah pejah jaku nya ditu aku nguji ngulurka penemu diri senentang tuju belajarka jaku Iban ba sekula sereta penuduk guna jaku Iban dalam pemansang jaku kemaya hari tu. Endang enda ngalitka ati enti agi bisi orang ke ukai ngajar jaku Iban nya sereta sida ke ba luar kandang sekula agi bisi saru penemu sereta enda tentu nemu senentang pekara tu.
Jaku Iban nitihka dokumen Turai Pelajar Jaku Iban Sekula Primari enggau Sekondari madahka jaku tu diajar kena nyuluk niat ati bansa Iban ti sayau sereta deka ngemansangka jaku Iban nya. Nambahka nya, iya mega tau nyadi senyata ti beguna dikena nyerakupka kaul entara raban, bansa Iban enggau bansa Iban tauka entara bansa Iban enggau bansa bukai. Nya alai lebuh kurikulum tu diubah setipak enggau program transformasyen perintah dia jaku Iban dalam Kurikulum Standard Sekula Primari ngangkat jaku Iban tu nyadi mata pelajar elektif setipak enggau jaku China, Tamil enggau Arab. Iya meri peluang ngagai nembiak berengkah ari primari satu belajarka jaku Iban sereta tau dikerembai sereta dipelajar nembiak bansa bukai. Raban bansa Iban sayau ke jaku Iban. Raban bansa Iban deka ngemansangka jaku Iban. Raban bansa Iban deka ngena jaku Iban nyerakupka kaul entara Iban enggau Iban sereta entara Iban enggau raban bansa bukai.
Nambahka nya mega, juluk ati kurikulum jaku Iban disediaka kena nyediaka nembiak awakka sida ulih bejaku enggau lanchar ngena jaku Iban Standard. Kitai bela nemu raban bansa Iban diau ngachir serata menua Sarawak. Jaku ari ai siti ngagai ai siti bisi ke enda sebaka chara nyebut. Pia mega enggau bansa bukai ke bisi diberi peluang belajarka jaku Iban. Pekara tu tentu begunaka jaku ti standard ngambika ulih dikena belajar enggau ngajar di sekula. Jaku Iban standard dikena ngambika semua ulih nyebut sereta nulis ngena chara ti sama. Hal tu kemaya hari tu udah nadai agi dipetalatka laban udah diterima semua lapis komuniti baik nya tuai-tuai bansa Iban, pengajar enggau raban apai indai. Kebuah pia enti nadai standard jaku Iban pekara ti nyemaka chara nyebut enggau nyepil leka jaku Iban deka nyadika penanggul. Ambika banding, pemacha berita jaku Melayu baik nya ari Kelantan tauka Sarawak bela ngena jaku Melayu standard lebuh sida macha berita baik nya ba radio tauka televisyen. Tang ba hal jaku Iban naka ke diatu jaku Iban standard semina dikena lebuh di sekula aja laban agi bisi ejensi bukai baka radio, tv enggau opis-opis ke bisi ngena jaku Iban dalam pengawa sida lalu empai nyemakaka chara nyebut enggau nuliska leka jaku Iban. Pekara ti baka tu mih ke patut diperundingka sida ke bisi mekuh pengawa Iban baka gerempung ti bisi kaul enggau jaku Iban.
Juluk ati ti kedua belajarka jaku Iban di sekula nya nitihka ti disebut dalam turai pelajar jaku Iban nya iya nya dikena neruska waris daya idup Iban ngambika enda lenyau mabun laya nitih aki ini Iban ke Serawai Mandai Betangga Tunggang lalu semina nyadi pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang.
Ari dua juluk ati ti udah dikusai tadi dia kitai ulih nyimpulka penemu ti madah jaku Iban ukai deka nyadika medium dikena belajarka semua mata pelajar bukai ba sekula. Kebuah pia kitai udah nerima jaku Melayu nyadika jaku rasmi ke dikena nyadika medium dikena belajarka semua mata pelajar bukai di sekula. Kitai mega enda ulih nyemakaka jaku Iban enggau jaku China tauka jaku Tamil laban jaku sida tu udah lama ngerembai indah dulu agi ari jaku Melayu sereta dikena ba menua China enggau India sereta mega ba serata menua di dunya ke bisi diuan raban bansa China enggau Tamil.
Nya alai jaku Iban enda ulih diangkat nyadi jaku dikena ba penemu teknikal laban naka ke diatu juluk ati belajarka jaku Iban tu ukai deka ngasuh kitai belajar undang-undang, sains enggau ke bukai dalam jaku Iban. Tang taja pia, jaku Iban enda ulih enda nginjau jaku bansa bukai nyadi sebagi ari jaku Iban laban mayuh leka jaku ke dikena kemaya hari tu nadai bisi dikena maya rambau aki ini raban bansa Iban menya. Semina utai ti patut dijaga nya enda bangat ngambu leka jaku Melayu enti iya bisi dalam jaku Iban. Leka jaku terpaksa, penting, ngurus enggau sekeda leka jaku Melayu ti bukai endang bisi dalam jaku Iban. Nya mih kebuah enti kitai nya bansa Iban, anak kitai Iban, uchu ambu kitai Iban patut bendar mih kita kaban belayan suku juru belajarka jaku Iban ngambika jaku Iban enda pupus, enda danjan dibai bulan enda lesi dibai hari. Balat sinu mih kitai enti tepedaka orang Iban ke ngena nama Iban bejaku ngena jaku bansa bukai lebuh dipinta meri penemu senentang jaku Iban ba mua raban bansa Iban.
Tang taja pan baka nya, ukai reti iya jaku Iban tu enda ulih dipansikka ngena jaku bansa bukai. Tu penemu ti enda tentu engkeman. Anang mih kitai lalu nyadung berita madahka jaku Iban tu nadai tikas tinggi, nadai standard laban jaku Iban dipansik ngena jaku Melayu tauka English. Indahka jaku Melayu pan bisi dipansik sereta ditulis dalam jaku bansa bukai. Ngelamata tu pan mayuh penulis kelebih agi ari barat nulis senentang jaku enggau budaya bansa Iban. Tu ukai nyadika penanggul tang meri pengelebih laban iya ulih dibacha semua raban bansa bukai ngambika sida bisi pengerindu sereta ransing deka nemu pendiau enggau pengidup raban bansa Iban.
Nya alai, enti kitai endang orang bansa Iban sereta ngembuan pelajar tinggi anang nangi ngemaruhka diri laban baka ular taja pan iya ensuruk urat enda mih pemisa iya lenyau. Arapka utai ti dipekunsika ditu ulih nyadika tenggau enggau lalau kitai lebuh bejakuka jaku Iban laban niat ati semina deka ngulurka penemu senentang pekara tu lalu udah tu ila endang nadai mih agi ngulang iya baka pasang besintak salau.
Tiada ulasan:
Catat Ulasan