Kitai empu mih mutuska sapa ...

Panyun jaku

Kemaya hari tu mayuh amat berita senentang pengawa bepilih besai baik nya ba media chelak, internet, radio tauka televisyen.

Enti kitai macha, mending sereta meda media arus perdana (MAP), semua nya badas sereta lanchar bagi Barisan Nasional (BN) lalu semua nya jai bagi Pakatan Rakyat (PR). BN deka menang besai lalu PR deka balat alah.

Enti macha surat berita Rocket, Suara Keadilan, Harakah enggau Selangor Times tentu mih semua ti bekaul enggau PR manah memagang; semua ke bisi kaul enggau BN jai. Tang surat berita The Sun surat berita china bisi setimbang agi lebuh mantaika berita.

Pun portal berita  ke meri penerang bisi agi rentang taja pan raban pemeri komen enggau pemacha sida baka ke balat agi ngarika PR.

Ba raban blogger, kurang bendar sida ke rentang. Sida nyau deka sama enggau dikotomi dalam MAP – pro tauka anti – nadai penemu matahari. Jaku jai endang seruran nyadika buah mulut sereta chara raban pemblog sida mejah isu politik. Demokrasi ba menua siber nyau betukar nyadi anarki.

Nya alai enda ngalitka ati enti mayuh raban pemacha, peninga, sida ke meda tv, pemeri komen enggau sida ke betalatka pekara politik nyau kapat, bebarunding enda nemu nama ke deka dipetalatka sida ngujungka pengawa bepilih nya baka indu ke semua tuju lalu ukai agi chara nyapaika tuju, iya nya deka ngulihka perintah ti ideal.

Bah nama mih isu nya?

Aku empu pan nyau kapat enda nemu agi nama ke dekaka raban pengundi tauka nama ke diberi sida ngagai parti-parti ti bisi enggau betanding. Kelalu mayuh utai ke nyaruka runding ngujungka runding beba.

Nya alai tak enda berani lalu berasai enda patut bejaku ngarika orang bukai. Ngagai kita raban pemacha nya, aku semina berani bejaku ngarika aku empu laban tiap-tiap iku ari kitai dipejal meri pemutus diri sentang isu enggau pekara ti ulih nguingka runding enggau chara kitai milih pengari kitai ila.

Ba penemu aku, tu mih sekeda isu, hal enggau pekara ti tetap ulih nguing runding aku lebuh milih orang ke bediri nya:

1. Filosofi milih perintah. Kitai milih peritah ke pemanah. Kitai enda milih perintah ke jai. Nya alai lebuh perintah ke dipilih kitai ngaga pemanah enda ibuh mih kitai muji sereta ngangkat sida datai ke langit tauka berasai bisi berutang budi enggau perintah. Tang enti perintah ti dipilih kitai nya bisi ngereja utai ke enda manah, kitai endang patut nangkan sida enggau jaku lalu meri jaku pejah. Enti sema iya enda berubah, kitai  ambi pulai sukung kitai lalu ningkilka sida lebuh pengawa bepilih besai jemah ila.

2. Kitai ukai ulun Pengari Rayat, Menteri enggau Menteri Besai. Sida nya mih “ulun” kitai ketegal kitai mih ke milih sida lalu meri gaji ke sida ngena duit chukai kitai. Enti nadai undi kitai dini sida ulih nyadi Wakil Rakyat, Menteri, Menteri Besai, Kepala Menteri enggau Menteri Besai. Anang enda ingat kitai semua taja pan kitai semina rayat selama.

3. Enti nitihka penemu diri, batang jerami keterubah nya ti matahka belakang kerebau (nginjau rambai jaku the straw that breaks the camel’s back) iya nya lebuh ke atur ngapuska PPSMI (Pengajaran dan Pembelajaran Sains dan Matematik dalam bahasa Inggeris) lalu ditangkan enggau madamka  Akta Keselamatan Dalam Negeri (ISA), Ordinan Darurat enggau Akta Buang Daerah. (Tanggung Perintah Besai enggau Parlimen).

4. Nitihka perati aku enti di Malaya, pasar balat kamah, penuh uras enggau reba, chit enggau ukui siga. Parit enggau lungkang ti ditutup lalu enda dikeingatka agi nyau bebau but lalu uras enggau reba ngachir sebelah jalai maya ujan bangat. Pun kayu ditumbangka ribut enda dipindahka, nyau bebulan-bulan lama iya baka ke dipeda aku ba Jalai Klang Lama laban pemesai tinggi perintah kiruh ngangkatka Yang Berhormat ari ke gawa ke rayat. (Perintah Besai enggau nengeri).

5. Pengelikun rama majak ngeruga mensia mayuh. Pengawa jai majak nyadi-senyadi taja pan  KPI enggau NKRA kenu ku udah dijapai. Mandal Pengarah Kastam mati ditimbak siang hari mega-mega ba Putrajaya, Pengarang Urusan surat berita arus perdana majak madahka menua likun, menua selamat, KPI manah, NKRA tulihka tuju, tang iya empu dirumpak ba mua mensia mayuh ba endur kelas tengah Taman Tun Dr Ismail. Bah nama kitai udah enda ingatka janji SAM – selamat, aman dan makmur maya PRU suba? (Perintah Besai).

6. Enti kitai mujur dalam ekonomi lalu KDNK mansang enggau regas, tikas inflasyen kitai baruh lalu mata duit Ringgit kuat. Bah lapa beratus-ratus ribu rayat nyau betatam berebut-rebut deka ngulihka BR1M, orang ke mensena nyau majak mayuh ba indu nengeri lalu pemesai ruti chanai majak mit? (Perintah Besai).

7. Pengelikun menua udah diruga orang ke datai enda beradat ari Filipina lalu ditambah mega enggau pembunuh ke diupah majak mayuh laban bisi Menteri ke tinduk lebuh gawa. Tauke judi, tauke rumah sempit, tuai sindiket ahlong enggau samseng ba jalai dilepas sepeneka ati ketegal nadai agi Akta Buang Daerah enggau Ordinan Darurat kemaya hari tu. Diatu sida majak bebunuhka munsuh diri tang rayat mayuh ke tusah. (Perintah Besai).

8. Nambahka nya anak bini, pedagang tikai permaidani, tukang jampi, pangan, tawing, bakih, kaban belayan enggau suku juru bela enggau masuk champur dalam ngaturka pejalai perintah.

Penutup kenang

Sekat sereta setimbang nya patut dikemeratka. Jeman perintah kuat sereta betukuh monopolistik udah limpas. Makin menua maju, makin kitai begunaka sistem sekat enggau setimbang (checks and balances) ti kuat bepun ari Parlimen enggau Dewan-Dewan Undangan Negeri. Enti deka ngubahka undang-undang menua ti begunaka sukung dua pertiga, manah agi iya dipejalaika nitihka proses bebatak asur entara kedua-dua piak (bipartisan). Nya mih sekeda isu ke tau nyadika lalau aku lebuh datai maya hari ngundi 5 May tu ila. 

Undi kenu ku sida nya resia taja pan bisi lumur siri. Nombor siri aku 2015. Enti deka nikam lumur 4D tau ga nguji. Tang orang Islam enda ulih, bedosa, minta ampun mih ngagai kita. Aku ngundi ba sitak Parlimen Stampin. DUN Batu Kawah – dua taun ke udah DAP mih menang dia. Ngelamata tu sigi kerusi BN (SUPP). Dalam PRU 2008 sitak parlimen, BN menang. Sapa menang sekali tu? Sama-sama mih kitai mendingka berita pengawa bepilih malam 5hb tu ila. Ngundi anang enda.