Pelandai Politik

Orang  begau minta nyadi pengari, 

Orang begau minta nyadi  ejen parti, 

Orang begau  deka  bekimpin, 

Orang  begau bekimpin, 

Orang begau  bejaika  pangan  diri.

Begulai tauka bepechah parti

nya sigi adat bepolitik

Sapa kering iya ngulu,

Sapa lemi nitih ari  belakang.

Enti dek nemu diri lemi,

bebendarka agi mih ngempung bala penyukung

ngaul bala kaban menyadi

Enti dek nadai duit,

anang bepolitik;

Giga dulu puku

enggaika lenyau duit chengkeram.

Enti dek bisi pemandai

tang enda nemu matak bala rayat,

Anang bepolitik;

Dek sigi tetap alah.

Enti dek enggai begerempung,

dini-dini gerempung ke ditumbuhka

dipasukka dek sigi bepechah.

Enti dek nadai polisi ngerempung,

Ngulu sereta ngemansangka diri,

Dek sigi enda berubah; 

Baka nya belama-lama iya,

Kelia, diatu enggau belama-lama iya.

Seagi-agi  kitai nyamai  disuap enggau duit

Enggau ringgit,

Enggau reta,

Enggau tengkira, 
Enggau pangkat,

Enggau pingat,

Enggau projek,

Enggau bisnis,

Endang agi mudah orang  merintah

Endang agi mudah orang bukai megai.

 
Kitai sigi rindu nyabung

Kitai sigi rindu besabungka pangan diri. 
Enda lantang ati enti enda ngelaban 
laban chara kompromi tu ukai adat budaya kitai.

Bisi tuai laban,

Nadai tuai pan ngelaban.

Bisi pangan bai berekak,

Nadai kaban ngerekak orang.

Bisi penemu enggai mantai,

Nadai penemu ngeleseka orang.

Kitai rindu berebutka nyadi Tuai

Kitai rindu berebutka kuasa

Tang nadai pengunjung

Puntan baka menasan jalai jelu

Rumbau baka buah merunjau ulu

Bisi madahka diri deka ngiring

Deka ngembing

Deka nguluka kitai

tang berakup enggau orang  bukai

Bisi nya deka mai kitai  begerempung dalam siti parti,

tang balat endar ga muka ‘kelang sabung’

ngelaban pangan-diri;

Dalam pengawa bepolitik 
semua orang ulih nyadi kaban,  
ulih nyadi penyukung,  
ulih nyadi penyakal, 
ulih nyadi bakih

ulih nyadi tawing

ulih nyadi munsuh. 

Pengawa politik skim ngerebut kuasa;

sapa balat agi ansang  
sapa balat agi neranting rekung  

sapa kering  agi penuduk,  
iya mih megai tampuk perintah,  

megai kuasa merintah.

Kitai sigi mayuh pandai, 
mekuh mayuh pengawa, 
datai ari mayuh suku etnik, 
ngembuan mayuh runding,  
ari mayuh macham penatai, 
ngemeran  mayuh macham pengidup,  
ngembuan mayuh macham penemu, 
mayuh utai temu, 
mayuh macham ulah

mayuh macham penumbuh.  
Nya  mih kebuah kitai enda sebaka.

Tang anang enda ingat

Anang nyaguka baka puang

Anang nganjungka paung empa jani.

Maya ngundi kitai ngundi

Milih pengari ke deka ati

Sida ke pengari

Patut berati

Enda megai ulu belama

Bisi maya megai mata.