Bansa Iban aruh ngemanahka ulah diri ku Najib

1.Menteri Besai Datuk Seri Mohd Najib Razak minta kasih bansa Iban ke diau ba sitak Parlimen Lubok Antu terus ngetanka kuasa sida iya sereta beratika pemanah ulah diri ngambika enda muntang ‘dibeli’ penyakal kelebih agi Parti Pekerja Sarawak (SWP) maya Pengawa Bepilih Besai ti Ke-13 (PRU 13) tu “... jaga manah ulah diri ngambika enda muntang kena suap parti penyakal ngena duit ringgit endur sida ngulihka sukung kita,” ku iya. Najib madah baka nya lebuh bejaku ba atur pengawa ‘Ketuai Begulai enggau Rayat’ beserimbai enggau penemuai iya ngagai Rumah Awing Laga, Tanjung Empaling, Merindun, Lubok Antu, kemari(Utusan Borneo 2013/04/28).

Reti jaku tu mantang bendar madahka raban bansa Iban nya bansa ke muntang dibeli enda milih sapa-sapa ke bisi duit. Tu jaku ke manah amat dipansut orang bukai, bansa bukai ke lalu mega nyadi tuai pemesai menua. Dini mih iya bulih fakta tu enti ukai ari pansik, ari sidi, ari padah lalu ari peneleba sida ke kala beberika duit ngagai orang Iban. Enti munyi jaku uti,jaku tundi kena kening bala Iban ari empas jaku Najib nya. Nadai salah ngambi duit baka orang Kelantan tang sapa ke disunting sida semina sida aja nemu.

2. Iya madah, dalam timpuh empat taun, enda chukup ungkup Perintah Barisan Nasional (BN) ngaga semua agenda transformasyen nasional di ” “ Datuk Seri Mohd Najib Razak Menteri Besai menua tu. Iya madah, Perintah BN begunaka timpuh ke panjai dikena ngemujurka agenda transformasyen nasional di menua tu kelebih agi pengawa ngemansangka menua pesisir. Iya madah, bechuntoka Sarawak beratika urung 80 persin ruang bilik udah belabuh ngasaika perengkaguna ai beresi lalu pia mega enggau karan ke udah manggai 83 persin, ku iya. “Tang iya bedau chukup lalu ketegal nya kitai deka nyapai juluk 100 persin. Nya alai aku minta semua rayat meri mandat ngagai BN maya ngundi tu ila ngambika perambu tauka agenda nya ulih digaga tauka disambung,” ku iya (Utusan Borneo 2013/04/28).

Iya mega madahka timpuh empat taun empai chukup ungkup Perintah Barisan Nasional ngaga semua transformasyen nasional. Bah nama mih ke digaga sebedau tu? Ke ulu ke ili madahka udah merintah menua dalam timpuh 46 taun di Sarawak, 54 taun di Malaysia. Uji perundingka enggau manah jaku ke dipansut iya tu.

3. Sebedau nya, Sapit Kepala Menteri, Datuk Patinggi Tan Sri Alfred Jabu Numpang Jabu lebuh bejaku ba atur pengawa nya madah, Perintah Menua meri RM500 ngagai tiap ruang bilik kena sida iya ngaga manah agi rumah sida ke dipenggi ngagai urung 5,931 ruang bilik di sitak Lubok Antu (Utusan Borneo 2013/04/28).

Beberika duit RM500 ngagai tiap ruang bilik di sitak Lubok Antu maya tu hari maya bekimpin pengawa bepilih besai ukai meli pengundi kenu laban duit nya diagihka kena ngaga manah agi rumah sida di Lubok Antu. Untung mih raban bala Iban dia laban nemu beliung enda ngambuh, nemu peredah enda ningkuh.