Anang muntang teparuk enggau politik duit

Panyun Kenang

Tu siti agi chunto berita ngenang pasal ulah bansa Dayak ke mudah teparuk, tepejuh runding sereta mudah tekuing runding enti udah diberi enggau duit. Terang sereta nampak bendar raban bansa Iban tu bemataka duit tauka munyi jaku Melayu mata duitan. Dini endur raban bansa Iban ngelalaika mua diri? Nanam tebu batu meri malu Iban empu, tanam tebu ai meri malu mua diri.

Munyi ke selama mih sapa-sapa tau meri duit enda milih nya pengari ari parti perintah ketegal agenda pemansang tauka penyakal ketegal deka minta sukung, indah baka orang ba menua Kelantan, “ambi aja lagi kitai empu nyunting sapa ke di ati kitai,” ku sida. Ulihka kitai nyaman pengari enti iya enda ngamatka danji lalu ulihka pengari nyaman kitai pengundi enti udah diberi duit tang enda ngundi sida?

Buah Kenang

Berita di baruh tu diambi aku ari surat berita http://www.theborneopost.com/2013/05/04/anang-muntang-teparuk-enggau-politik-duit.

Kepala Menteri Sarawak Pehin Sri Haji  Abdul Taib Mahmud ngelalau rayat bansa Dayak kelebih agi Iban ke diau ba pelilih menua pesisir enda muntang teparuk enggau politik duit dikena parti penyakal ngulihka undi sida maya Pengawa Bepilih Besai Ke-13 (PRU13) 5 Mei tu. Ku iya, duit ke diberi parti penyakal nya semina dikena nyukung sida dalam awak ke semak aja enti dibanding enggau pemansang dipejalaika perintah Barisan Nasional (BN) ke tau bendar meri penguntung ba timpuh ti panjai ngagai rayat semua.

Beduduk enggau nya, ku Taib, nyukung chalun Barisan Nasional (BN) Parlimen Lubok Antu William Nyalau anak Badak endang ulih mai penguntung ba atur pemansang ungkup rayat Lubok Antu dalam timpuh ke panjai.

“Duit ke diberi parti penyakal nya deka ambis pia aja tang pemansang ke dipejalaika perintah BN deka diasaika nyentuk ke jemah ila,” ku iya.

Iya bejaku munyi nya maya bejadika pengerami tuai begulai enggau rayat enggau penemuai bejalaika pengawa perintah Kepala Menteri Pehin Sri Haji Abdul Taib Mahmud di rumah panjai Nundong Nanga Murat, Skrang, ditu, kemari.

Ba pengerami nya, Taib ngagihka Projek Mit Menua Pesisir (MRP) sepenyampau RM50,000 ribu ngagai JKKK Rh Nudong ungkup pemansang rumah panjai sida.

Penutup Kenang

Sama-sama mih semua raban bansa Iban ngambi teladan ari jaku orang bansa bukai ngelalauka Iban aruh ngubah ulah diri. Selama tu enti bansa Melayu, China enggau Tambi ke di Malaya suah jampat muras enti bansa bukai bejaku senentang bansa sida laban ngelalau bansa diri patut datai ari tuai bansa diri empu, anang datai ke tikas nyau orang bukai meri jaku lalu.