Buah rian

Buah rian dikumbai enggau nama saintifik iya durio zibethinus nya buah ke tebilang di Asia. Buah tu bisi kulit ti kering sereta beduri lalu balat bebau ke enda ngerinduka sekeda orang. Isi iya lemi sereta asai iya manis.

Hotel ba menua tu mayuh nagang temuai sida mai buah rian ke dalam bilik sida ketegal ke balat bebau. Iya digelar raja semua buah ukai ketegal kulit iya ti kering sereta beduri, tang ketegal pemanah ke diundan buah nya. Rian ngundan phytonutrien enggau anti-oksidan ti tinggi. Iya dikumbai ulih nurunka paras kolesterol lalu meresika darah. Bisi pansik madahka rian ulih nyeliahka ari dirampit penyakit kulat. Kebuah pia laban iya ngundan zat besi ti tinggi mantu sel darah putih ngasilka kimia natural ti ulih munuh igi penyakit ke tau ngerampit.

Rian mega ngundan asid amino enggau vitamin B, C dan E sereta bisi ngundan anti-oksidan ti tinggi. Anti-oksidan mantu ngelubahka sel-sel ari muruk empas ari radikal bebas baka ke dibai ari pengamah angin enggau asap ruku. Nengah chara tu, iya ngurangka proses tuai, iya ngauh kitai semampai biak. Iya mega manah diempa maya tabin chelap angat.

Tryptophan nya antara utai ti bisi ditemu ba dalam asid amino di dalam buah rian. Tryptophan tu beguna dikena nyaga tikas serotonin dalam tubuh. Serotonin tu hormon ti ngasuh kitai berasai lantang ati lalu tau mega nyadi ubat insomnia. Sida ke kurang serotonin selalu agi enda ulih nyaga asai ati tauka emosyen sida, seruran muras lalu berasai tetekan ati.

Buah rian enda baka buah bukai ke tau dijuluk tauka ditiki. Buah rian dipanda sepengudah iya labuh kediri ari pun iya. Tu nandaka buah nya udah chukup mansau. Lebuh maya tu orang ke ngempu pun rian dulu ensiang endur pun buah tu ngambika mudah alai sida manda buah-buah ti udah labuh. Bisi sekeda nya lalu nirika langkau alai sida nganti rian labuh. Taja pia orang ke manda buah rian patut bejimat enggaika buah ti labuh nya ninggang pala. Tu tau ngasuh bakal.

Durian nyamai diempa maya buah iya labuh datai ke empat hari. Kualiti iya majak kurang selepas seminggu iya digumpul. Buah rian tau mega dipanduk kuah digulai gula apung enggau daun pandan. Iya mega suah digaga nyadi tempuyak tauka empikau.

–Dibali ari https://www,facebook.com/#!/hiduptanpakanser