Penanggul obesiti di menua kemaya hari tu majak nyadi. Lebih 16.8 juta rayat menua tu ditemu ngidap penyakit nya ti bepun ari gaya idup enggau pemakai ti enda setimbang.
Pengarah Eksekutif Institut Nasional Diabetes Malaysia (Nadi), Datuk Profesor Mustaffa Embong, madahka enti dikira kasar rayat menua tu ke napi penanggul gemu madahka peratus indu ke kena penyakit nya tinggi agi enti dibanding enggau sida ke lelaki. Indu ke beranak nya entara ti bepotensi gemu lalu penyuah beranak mega ngasuh berat tubuh majak betambah.
Faktor sida ke indu lebih berat tubuh ketegal ke kurang ngemeranka aktiviti ti bepengerai kelimpah ari faktor pemakai baka mayuh makai pemakai ti ngundan kalori, diguring tauka kari ngasuh peratus raban tu ngidap penyakit nya tinggi agi ari sida ke lelaki.
Pekara nya patut bendar diperatika enggau serius laban iya ngujungka mayuh penanggul bukai ngagai rayat. Pansik madahka 15 peratus ari nembiak ke beumur 12 ngagai 19 taun napi penanggul berat tubuh ti belebih.
Orang ke ngidap obesiti di Malaysia kelalu mayuh lalu penyampau tu setanding enggau menua ti udah maju baka Amerika Syarikat lalu iya bepun ari makai pemakai ke mudah dipanduk ti tau ngenataika mayuh macham efek sereta risiko.
Orang ke gemu mega mudah kena penyakit bukai baka kanser, diabetes, tulang ke jampat retai, diserang penyakit tungkul atau sereta sekeda penyakit bukai. Penyampau pengidap kemi manis (diabetes) di Malaysia nyau deka datai ngagai 3 juta orang, jauh tinggi agi ari jangka Gerempung Pengerai Sedunia (WHO) ba taun 2025 ila, iya nya kira-kira 800,000 iku orang.
Penyampau pengidap diabetes di Asia nyengkaum Malaysia majak ngirauka ati sereta udah nyadi epidemik ba menua ke baru deka mansang. Ari penyampau nya, indu bansa India ke mayuh ngidap diabetes lalu ditangkanka enggau lelaki India, indu Melayu, lelaki Melayu, indu China enggau lelaki China. Statistik tu nadai mega madah senentang bumiputera bukai baka bansa Dayak, Kadazan enggau ke bukai.
Tiada ulasan:
Catat Ulasan