Lumur plet, cheremin petang enggau lampu burak sepeneka guna

NINTING hari lebuh kitai deka keluar rumah, kitai ulih meda kerita orang baik nya ke mar tauka murah ti diengkah ba mua laman rumah.

Lebuh kitai neriba kerita ba jalai alun, jalai raya enggau ba lebuh raya dia kitai ulih meda mayuh bansa kerita, lori, van, bas enggau motosikal.

Kelimpah ari nya kitai mega ulih meda mayuh leman enggau tukuh saiz lumur plet kerita sereta kerita ke bechermin chelum. Engka bisi sekeda pemacha enda setuju aku ngumbai nya petang; nyangka engkeman agi enti dikumbai cheremin chelum. Enti dikalih ari jaku English ‘dark’ tentu nya petang tauka gelap dalam jaku Melayu. Enda ibuh betalatka leka jaku nya, barang ke nyamai disebut mih. Utai ke nyadi isu nya cheremin petang tauka cheremin chelum.

Uji peratika lumur plet kerita; bisi nya besai lalu bisi nya mit sereta mayuh tukuh urup enggau lumur ti pisit. Urup pisit muak ke kiba lumur plet tauka pisit muak ke kanan plet.

Baka nya mega cheremin kerita; semua iya bisi ke petang amat nyau chelum ngelintum, bisi nya mimit aja, bisi nya bechura gadung, bisi nya bechura pirak enggau mayuh macham ke bukai.

Nama nadai kini orang nanya kebuah mayuh bansa tukuh lumur plet kerita lalu lapa mayuh kerita becheremin petang?

Dini endur kitai diatu? Ba Thailand? India? Mexico?

Maya malam lain mega utai ke nyadi. Mayuh kerita ngembuan lampu besai ba mua ke bechura burak bebetau. Lampu tu tau ngasuh mata silau tauka kerabur. Bisi sekeda nya masang mayuh bansa lampu LED bechura mirah tauka burak ba belakang enggau mua kerita kelebih agi ba ruang lumur plet, lampu kabus (fog) chura mirah tauka kuning sereta chura bukai ba kerita diri empu.

Nama menua Malaysia udah nadai agi undang-undang ti seraris enggau kereban pengangkut ba jalai? Tauka udah nadai agi opis-opis perintah ke neritka undang-undang ti bekaul enggau kerita sereta undang-undang jalai raya?

Tu mih sekeda pekara ti tau ngasuh kitai begedi meda ulah sekeda orang ke neriba kerita ba jalai. Sida udah nadai agi bebasaka pengguna jalai raya ke bukai. Menua kitai endang bisi atur jalai raya, adat enggau undang-undang tang nyau salah munyi jaku sekeda adat nya jarang bendar diteritka; enti bisi pan semina baka ke ngesuhka batuk ba pala tangga.