MALU amat menua Malaysia lebuh Gerempung Main Bol Antarabangsa (FIFA) madahka Skuad Harimau Malaya ke dipegai jurulatih Datuk K. Rajagobal diatu ba ranking 159. Penuduk tu jauh jai agi ari ranking team main bol Bangladesh, Maldives enggau Filipina.
Ba tikas Asia team main bol menua kitai ba penuduk ke-31 lalu ba tikas Asia Tenggara, Malaysia agi mengkang ba tangga kelima di belakang Thailand, Filipina, Vietnam enggau Singapore.
Ni mih maya kitai dipejal nyimpan geregayak ati sereta nanggung pemerinsa nyadi sebuah menua ke lemi ba suku main bol? Kemaya hari tu tak sepeneka team bukai ngalahka team kitai ba tikas antarabangsa. Sinu chukup sinu.
Ketegal pengelabuh ranking kitai ba dalam main bol tu dia pemain kitai ke bisi penau bemain nyau dikira nadai peluang bemain ba kelab main bol baka di England enggau ba menua Eropah ke bukai.
Nyau udah chukup maya alai semua sida ke mangku pengawa ba dalam FAM belemati dalam ati diri enggau lurus sereta ngembuan ati ke tebuka senentang nama-nama pekara ti patut dikerejaka sida dikena ngangkatka sereta ngemansangka sukan menua kitai. Anang ngelakka team main bol menua kitai labuh ari sukut ranking agi tauka enda agi ba taka nya aja belama-belama.
Ambika chunto menua bukai baka Jipun, Korea Selatan, Iran, Arab Saudi ke dulu suba tinggal di belakang tang diatu udah jauh bendar ngejang ninggalka menua kitai sereta ba penuduk tikas dunya.
Semua pemesai sida udah besilih ganti, kelebih agi lebuh team main bol sida bisi mandangka pengurang mimit. Sida deka meri peluang ngagai orang bukai sereta nadai berasai ransi tauka sinu laban sukan main bol tu siti sukan ti ditemegahka rayat di sesebuah menua. Pengawa ke ngemaduka diri ari mangku pengawa nya udah nyadi pekara selama ba sida.
Nya alai, Opis Menteri Nembiak enggau Sukan dikearapka ulih masuk champur tauka sekurang-kurang iya meri jaku lalau ngagai FAM ngambika ulih berubah ari sukut chara enggau langkah rapat sida.
Tiada ulasan:
Catat Ulasan