Enti deka alah enda

LEBUH bejaku pasal pemisi enggau reta tengkira nadai ngatas orang Malaysia. Dikena ngepunka buah kenang sekali tu uji peratika gaya rayat Malaysia nguna ai. Pansik endang bisi udah madahka per kapita guna ai kitai tinggi amat taja pan mayuh udah jaku tangkan ngelalau mensia mayuh bejimat lebuh nguna ai. Kitai tentu kala ninga krisis penanggul ai ba Lempa Klang empai lama ti udah. Tu mandangka mensia mayuh endang mimit pan nadai ‘bebasaka’ pun penatai ai.

Kenu ku berita, rizab ai ke enam juta iku orang di Selangor enggau Kuala Lumpur endang semampai mimit, iya nya kurang ari 1%. Penanggul enda chukup ai tu deka majak nyadi enti pengguna ai majak ngemeranka ulah sida ke ngerua ai.

Dipelabaka mega deka nadai berubah enti tarif ai ba Selangor ti diaturtka baruh ari kos ngeluar enggau kos nyadungka ai. Tu mih kes klasik ti belaban amat penemu enggau realiti ti minta nengeri ti mayuh tubuh baka Selangor tu bekelimat ngena ai enti ai ti dikena keterubah 20 cu m nya enda ibuh dibayar.

Siti agi kereban rama ti suah amat dibansauka mensia mayuh nya elektrik. Uji kitai peratika ba pasar besai sebelah nengeri, lampu ti dipasangka nyau baka ke bisi pengerami belama nyau baka ke bisi gawai belama. Endang enda bula madahka tikas penampak nya manah kelebih agi dikena kitai nyaga pengelikun tang pekara pasal penampak tu mega nyangka tau diperundingka sida ke megai menua. Ambika chunto, pemisit tiang lampu jalai endang jauh amat bida enggau menua ke udah mansang. Enti diperatika ari sukut jangka panjai iya tau mai pengerugi ngagai menua. Perati mega lampu ke dipasang ba terowong jalai besai. Patut tauka enda terowong nya dipasang enggau lampu ke mayuh sereta terang agi ari hari siang?

Pia mega enggau eletrik ke dikena kitai ba rumah. Bil ujung bulan suah bendar mandangka perintah besai meri subsidi ti chukup signifikan, iya nya baruh ari rega pasar, bil ti dicajka Petronas ngagai gas ke dikena Tenaga Nasional Berhad. Tu tau nyadika laya lebuh kompeni minyak menua nguji deka ngecaj ngena rega kommersial.

Municipal council mega patut betatika baru pengawa sida ke masang lampu ba sekeda endur. Barang bil eletrik ke ulih dikelimatka sida tau dipindahka ngagai pemayar chukai iya nya nengah chara ngurangka chukai pintu tauka barang chukai ke bisi dibayar sida.

Malaysia kenu ku orang endang tebilang enggau serega pemakai. Nitihka ripot sebuah surat berita, madahka menua Malaysia tu mih tempat ti pengabis besai alai nugungka teda pemakai. Reti nya rayat Malaysia tu endang seruran nampui maya makai. Ninting hari kira-kira 15,000 ton pemakai enggau tedai ari dapur dibuai. Penyampau ti mayuh baka tu ulih nengkani 7.5 million iku orang sehari.

Penyampau enggau pemayuh teda pemakai tu nyau majak nambah dua kali lipat enti dibandingka lebuh taun 2009. Teda pemakai ti mayuh tu datai ari Kuala Lumpur, iya nya kira-kira 3,000 ton lalu Pulau Pinang ngeluarka 355 ton teda pemakai ti enda diempa. Nadai menua bukai di dunya ulih dibandingka enggau Kuala Lumpur sereta Pulau Pinang enti bejakuka pasal pemayuh kedai makai.

Enti kitai deka nyalahka sapa ke rua mansau utai diempa nya dipelabaka nadai orang bukai enti ukai sida ke muka kedai makai kelebih agi kedai makai 24 jam. Uji kitai nanya diri empu, kati kitai amat-amat begunaka kedai ti baka tu? Kati beguna amatka kitai ngirup teh tarik maya jam 2 tauka 3 pagi?

Ulah ti bebansauka pemakai sereta ulah ke nadai ibuhka teda pemakai udah ngujungka penyampau chit betambah sereta ngeruga pengelikun enggau pengerai orang ke diau ba nengeri enggau genturung pendiau. Penusah tu ngujungka kes penyakit leptospirosis ti suah agi dikumbai kitai penyakit laban kemi chit udah majak nambah lalu tau mai nyawa. Penyakit leptospirosis berampit nengah kemi chit. Nitihka ripot taun nyin kemari bisi 3,665 kes leptospirosis bisi direkodka, iya nya niki ngagai 85% ari taun 2010. Dalam taun 2011, bisi 2,268 kes ditemu sereta ari penyampau nya bisi 55 orang udah parai. Nya alai, anang enda bejimat lebuh makai ba kedai. Mayuh kedai udah ditutup sementara ketegal diasuh ngangkatka tikas pemeresi kedai. Perintah kelebih agi sida ari opis pengerai patut berundingka chara ke engkeman agi dikena mutarka pekara tu.

Sepekara agi ti patut bendar nyadika buah kenang nya senentang pengawa mensia mayuh ke bekena sereta bebuaika empelus tauka beg plastik. Menua kitai mega menua ti chukup demokratik dalam dunya lebuh besebutka pengawa bekenaka empelus. Palan alai muai uras ti nyau majak mimit udah nyadika pekara ti patut diputarka perintah. Enti diperatika naka kediatu, kelimpah ari nagang orang ngena empelus di Pulau Pinang enggau polisi nagang orang ngena empelus di pasar raya ba Selangor nadai udah bisi chara bukai udah dipejalaika dikena nagang mensia mayuh ngena empelus iya nya beg ti ukai biodegradable sereta enda manah ke rampa menua.

Per kapita penyampau uras ti dibuai rayat Malaysia ngagai tung uras nya siti rekod ti enda patut ditemegahka kitai. Penanggul ukai semina datai ari sida ke ngumpul uras ke kekadang enda tentu ngumpul nitihka maya ti udah ditaga tang mega bepun ari mensia mayuh ti enda tentu ibuhka pematut bebuaika uras ba endur ti udah disediaka perintah. Pengawa sida ke enda ngumpul uras nitihka taga jam ti patut tau bendar mai penusah kelebih agi ngagai pengerai mensia mayuh.

Ulah enggau gaya rayat Malaysia ti udu rua ulih diperatika maya bisi pengerami. Ambika banding lebuh pengerami Hari Raya enggau Taun Baru China, sida naga duit ke baru dichelak dikena nyadika duit raya enggau ang pau. Udah betaun-taun, Bank Negara Malaysia nadai kala puntan nyelak kurang lebih 500 juta limpir duit not RM1 enggau RM5 dikena napi sida ke begunaka duit baru. “Bah nama penyalah bekenaka duit baru baka tu dih?” ku tanya sekeda pengguna.

Ukai pia, nitihka padah ari bank pusat, sida bank begunaka enda kurang ari 80 ton dawat sereta dua two million KWh kuasa eletrik, chukup enti dikena meri kuasa eletrik ngagai 7,500 rumah sebulan sereta ulih meri penampak nengah 48,000 igi bab lampu sebulan. Tu enda nyengkaum 250 juta limpir ke sama nilai ti dichelak ketegal ti dikena besehari-sehari. Nitihka pemesai ari bank madahka kira-kira 70% ari 750 juta duit nya tadi dipulaika ngagai bank sepengudah tembu dua pengerami nya tadi. Tu ngujungka duit ti belebih ba bank.

Mensia mayuh patut ngembuan budaya penyedar senentang beberika duit baru nyadika pemeri nya tau ngujungka ulah tebasau sereta tau ngabiska asil pengeraja asal. Nya mih kebuah Bank Negara berengkah ngeluarka duit not polymer RM5 dalam taun 2004 lalu duit not polymer RM1 taun nyin kemari. Kebuah pia, laban duit not Polymer tan agi; iya nya dua ngagai tiga kali lama agi enti dibandingka enggau iya ti digaga ari keretas-taya.

Nya alai, berengkah ari Hari Raya taun tu, bank tu udah mutus deka ngurangka pengawa nyelak not duit ti baru berenggat-renggat sereta meransang mensia mayuh nguna baru duit ti agi ulih dikena sida. Tu pemutus penemu ti manah sereta ulih nyadika tenggau ba pekara bukai mega.

Raban pemacha, agi mayuh bendar pekara ti ulih nyadika buah kenang enti kitai deka bejakuka pekara senentang pengayu idup tauka sustainable living. Nya alai dalam mayuh pekara; anang enda bekira senentang tiap-tiap utai ti dikemisika kitai laban kenu ku orang enti deka alah enda, enti enggai bisi tau mih nadai.