Syarat terit nyadi kepala pengajar

Berengkah ari taun nyin ila pengawa nyirika kepala pengajar sekula primari enggau sekondari deka nengah proses penapis ti terit, ukai agi disandang sechara automatik baka kediatu.

 

Sapit Menteri Besai, Tan Sri Muhyiddin Yassin, madahka langkah nya seraris enggau tuju sereta transformasyen Sistem Pelejar Menua ti nentuka semina kepala pengajar ke bisi prestasi tinggi aja ditempatka ba tiap-tiap sekula.

 

Batang syarat iya nya udah enggau ‘Program Kelayakan Profesional Pemimpin Pendidikan Kebangsaan (NPQEL)’. Kira-kira 1,000 pengajar deka enggau masuk kus lima bulan ba Institut Aminuddin Baki (IAB) taun dudi,” pia ku Tan Sri Muhyiddin Yassin, Sapit Menteri Besai.

 

Sida patut nengah proses tisih tikas tuai lalu iya ke bisi kaul enggau pengulih bejalaika tanggung pengawa, kreativiti, inovatif, enggau inovasyen kelimpah ari ngembuan rekod ti lati dalam pengawa nyadi pengajar sereta ditambah enggau peneleba kala dilatih sereta diiring dalam bidang nya enggau komprehensif.

 

Naka kediatu, sida ke dichirika ngisi pengawa nyadi kepala pengajar baik nya ba sekondari tauka primari endang bepelasarka tuduh penemu Pengarah Bahagian enggau Pengarah Opis Pelajar Nengeri (JPN) lalu dipesetujuka Ketua Pengarah Pendidikan.

 

Chalun ti ulih disadang nya sida ke dipaska Lembaga Kenaikan Pangkat Perkhidmatan Pelajaran (LKPPP). Mandal kepala pengajar bisi mega disengkaumka dalam lis ti dipaska LKPPP, tau mega disadangka ngisi pengawa nyadi kepala pengajar.

Proses milih chalun ke kedua-dua pengawa nya benung dipejalaika sereta ditangkan enggau tisih tikas tuai, sebedau dichirika nyadia kepala pengajar berengkah ari taun 2014.

Lebuh bisi puang iya deka diisi enggau pengajar ke manah. Taja pan ngelama tu endang udah digaga baka nya tang sekali tu kitai mega ngira tisih enggau pengulih pengajar dikena nentuka semina iya ke pengabis manah aja mangku pengawa nyadi kepala pengajar.

Nengah proses NPQEL, iya ngerampit pengajar ke lati nitihka rekod tauka ngembuan sejarah gawa ke badas ba sekula ke alai sida gawa. Endang patut mih opis pelajar ngeletakka atur nadai bekompromi dalam hal tu laban sekula ti mujur nya bisi kaul enggau faktor kepala pengajar ke nyadi tuai sekula. Kitai endang ngembuan penuh pengarap kepala pengajar jemah ila nya kepala pengajar ke ulih ngiring ngembing meri sukung meri bandung ngagai raban pengajar sereta nembiak sekula ngambika ulih nyapai tuju falsafah pelajar bansa. Kebuah pia laban sekula tu tau disempamaka baka bandir tapang ti enda ulih ditingkuh enggau lungga.