Mindset Iban

Tiap-tiap kali orang bejaku pasal pemansang, iban enggau bala raban bansa Iban mega enggai jauh tinggal sama bela nampil orang bukai bejaku pasal pemansang. Baka nya mega lebuh nampung randau nya ngagai bala Iban bukai baik nya ba rumah panjai tauka ba menua pesisir. Ni naka pemansang raban bansa Iban enti dibanding enggau orang bukai?

Baka nya mega lebuh orang bukai bejaku pasal penyerakup, iban enggau orang raban bansa Iban mega bejakuka penyerakup. Sida mega enggai alah penemu lebuh ngenataika runding pasal penyerakup; penyerakup 1Malaysia taja pan reti jaku nya enda sama reti enggau ke dikenataika orang bukai. Lebuh orang bejaku pasal penyerakup bansa diri empu, dia kitai bisi lubah mimit ngenataika runding madahka kitai enda patut kelalu bejaku pasal diri empu aja laban kitai di Malaysia begulai enggau bansa bukai; tambah mega enggaika kitai dipeda orang ngelaban perintah.

Enti bejaku pasal ekonomi nyangka kurang mimit bala raban bansa Iban ke deka nampil diri bejaku pasal pekara tu. Ukai ketegal nadai orang Iban ke bisi marit diri dalam pengawa ekonomi tang endang bansa Iban ba penemu sekeda Iban nya bansa ke lubah deka bejaku senentang nya laban ngasaika diri bedau tentu mujur kenu ku sida.

Semua tiga pekara ti udah disebut di atas tu asal iya asil ari siti leka jaku iya nya mindset. Mindset Iban nya mih penanggul besai. Pemujur enggau penekul pemansang orang Iban bepanggai bendar ba mindset lalu ditu nya mindset Iban.

Bah nama mih utai ke dikumbai mindset? Dipelabaka aku seruran mega kitai ninga leka jaku mindset tang nyangka bisi sekeda ari kitai ke bedau tentu apal senentang reti leka jaku mindset nya. Taja pia enda nya bangat ngawa, aram sama beratika leka jaku mindset tu.

Mindset ke bendar nya dua leka jaku bansa Ribai ti dipegulaika nyadi siti tauka dalam aspek linguistik Iban iya dikumbai jaku turu; iya nya "mind" enggau "set". Mind mai reti runding, pikir, akal, pengingat, untak (Handy Reference Dictionary of Iban and English). Nyadi "set" nya raban tauka regan. Peratika mega sekeda penerang bukai senentang reti leka jaku mindset.

W. Gunawan dalam bup iya The Secret of MINDSET madahka mindset nya kepercayaan-kepercayaan yang mempengaruhi sikap seseorang; sekumpulan kepercayaan atau suatu cara berfikir yang menentukan perilaku dan pandangan, sikap dan masa depan seseorang. Reti nya ulah enggau sekeda mental tauka watak ti nentuka respons enggau pemeri reti siku-siku ngagai situasyen ti ditapika iya. Nitihka definisyen web, mindset nya a habitual or characteristic mental attitude that determines how you will interpret and respond to situations (wordnetweb.princeton.edu/perl/webwn).

The free dictionary.com madahka dua reti mindset, iya nya 1. A fixed mental attitude or disposition that predetermines a person's responses to and interpretations of situations enggau 2. An inclination or a habit (http://www.thefreedictionary.com/mindset).

Lalu kepenudi bendar nya diambi ari Concise Oxford English Dictionary, 2002, University Press; madahka mindset nya A habitual way of thinking.

Ari kerembai kenang diatas dia ulih disimpulka mindset nya pengarap tauka seraban pengarap tauka chara bepikir tauka berunding ti ulih nguingka ulah enggau sikap siku-siku ke nentuka pemujur pengasil pengidup iya. Enti dikena ngagai raban bansa Iban, mindset nya mih ke ulih nguingka runding lalu iya mega tau ngujungka pemujur tauka pemuntan bansa Iban. Reti nya dalam jaku mudah, mindset Iban ulih nguingka runding raban bansa Iban; nguing runding ke positif ti mai pemujur tauka nguing runding ke negatif ti mai penanggul.

Bah nama mih pugu mindset raban bansa Iban? Naka ke udah ditemu nadai udah bisi review litericha senentang mindset orang Iban ke udah dikeluarka. Nadai mega udah kala macha pansik senentang mindset orang Iban. Nyangka udah bisi dipejalaika tang aku bedau udah tepansaka bup ti baka tu.

Nya alai mindset ke dirintaika di baruh tu diambi bali ari penemu dibisi dikenatai ba laman web iya nya http://hornbillunleashed.wordpress.com. Penemu enggau buah runding ti dikenataika ditu ukai reti iya selubang penemu enggau raban pemacha laban iya semina ari runding penyanding penemu ba blog nya sereta enggau penulis aja. Tuju ngenataika iya semina dikena bekunsi sereta bebagi penemu enggau bala mayuh. Nitihka udah dibacha, bisi lima pekara ti bisi bekaul enggau mindset raban bansa Iban.

1. KEPAPAS enti dikalih ngagai jaku English iya dikumbai covetous, greedy tauka selfish. Nitihka Bup Sereba Reti Jaku Iban(2011) kepapas nya reti iya enda lantang ati tauka begedika orang (ketegal ti alah pemisi, pemandai, pemajik, penyigat, etb.) laban iya; ngembuan ulah ti rindu meda orang pedis (tusah, enda mujur, etb.) Raban bansa Iban endang mayuh nya dikumbai bansa egalitarian; reti nya sida tu raban bansa ti ngumbai diri bela sebaka, pukul rata nadai tinggi nadai baruh ari pangan diri. Nitihka penemu ti endang udah lekat dalam runding kitai kenyau ari kelia madahka tiap iku indu tauka lelaki endang disadang ngangkatka tikas diri jauh ngelui ari pangan diri dikena mandangka diri pegari sereta tebilang ari orang bukai. Orang English ngumbai ulah ti baka nya sindrom “Better than the Jones”. Orang Malaysia ngumbai nya “Crab Mentality”; niki ari atas sereta ngenjun orang bukai ngambika datai di legit.

Dalam konteks raban bansa Iban, tiap-tiap bilik nguji ngalahka bilik bukai. Tiap-tiap rumah panjai mega nguji deka ngalahka rumah panjai bukai. Lalu pia mega, ai siti nguji ngalahka ai siti. Ulah egalitarian baka tu semina manahka diri empu aja nadai nadai mai penyerakup ketegal bisi elemen ngulih kediri sereta ngembuan ati KEPAPAS. Tu mih ke nyapat sereta magi Iban sama Iban. Tu mega nyadi dilema ngagai orang Iban. Kala tauka enda kitai berunding lebuh deka ngangkatka diri ke atas; kitai sanggup ngenjun orang bukai tauka sama-sama besaup mantu sereta bekerejasama niki ke atas? Ibuhka kitai ari ni penatai tuai kitai? Ari menua ni? Ari ai ni? Katika patut tiap-tiap ai menua ngaku ngembuan tuai ke pengabis tinggi (Paramount Leader)? Sama-sama mih kitai berunding dalam ati diri. Enti sema bisi orang Iban ke ba penuduk ke tinggi dia iya nguji naka ulih nyekat orang Iban bukai niki sama enggau iya. Baka nya mega raban Iban ke mayuh ba baruh nguji ngelabuhka Iban ke udah duduk ba atas.

2. PENEMU tauka knowledge or opinion dalam jaku English. Tiap-tiap iku raban bansa Iban ngembuan penemu baikka nya penemu ti manah tauka penemu jai. Demokrasi bisi dua pugu penemu, iya nya: (i) Tiap-tiap individu bisi hak meri penemu diri. (ii) Tiap-tiap individu mesti bebasaka penemu orang bukai taja pan penemu nya enda selubang enggau penemu diri. Tu mega siti agi dilema ke orang Iban; kala tauka enda kitai bebasaka penemu orang bukai tauka semina penemu kitai empu aja ke betul diasurka kitai ke mua? Pekara tu mai kitai ngagai faktor ti nangkanka tu.

3. MALU berasai baruh tauka nadai guna; berasai dipegedi orang ketegal bisi ngereja ulah ti salah, ke ngasuh nama enggau rita diri jai; silamka penyai diri (or shame or the loss of face). Enti udah salah tauka bisi evidens dipeda salah; kala tauka enda iya ngaku fakta nya? Ni penyampau orang Iban ke sanggup ngaku diri kala ngaga pekara ti salah tauka nguji ngemetulka pekara ti udah salah digaga iya ? Tu mih siti agi dilema. Raban bansa Iban ukai bansa ke mudah ngampunka penyalah. Kitai nyimpan dengki, nyungut dalam ati sereta mega nguji ngingatka tusut penatai pangan diri. Kadang-kadang kitai bisi angka enggau fakta ti terang tang pama orang Iban udah mutuska enggi iya nya betul, nadai utai di dunya tu ulih ngubahka runding enggau penemu iya. Meri malu ngagai diri empu nya bangat bendar ngasuh diri baruh sereta dikemaruhka orang. Nya alai bisi sekeda orang Iban sanggup bebalas ketegal deka nyaga imej diri munyi ku sempama orang English to cut off their nose just to spite their face. Tu mai kitai ngagai siti kebuah utai ti baka tu nyadi.

4. BINGKING sama reti enggau kih tauka tengik (stubborn). Kitai nemu kitai salah tang kitai lubah deka ngaku. Iya ke balat agi nyadi enti kitai empu enda nemu diri salah tang majak mega madahka diri kitai nya betul. Tu mega nyadika dilema. Bingking bepun ari metaliti ti introvert, sempit runding sereta enggai berubah tauka nerima utai ke manah agi. Kitai berasai lantang agi enggau chara lama lalu ngereja utai ke tebalan enggau utai dikerejaka kitai. Kitai enda ulih meda kampung dalam utan, enda ulih meda pekara ti besai agi, utai ke manah agi ari selama. Kitai nyau temengkang ba pantai, terunjam laban enda berani nyemberai nangika bisi jagu. Kitai milih utai ke likun, pekara ke ditemu kitai, utai ke udah diajar ngagai kitai, pengelantang. Lapa? Tu mai kitai ngagai faktor ti penudi.

5. RUNDING PANDAK (short-sightedness). Kitai enda ulih rari ari realiti- kenyau ari aki ini Iban kelia, pengidup ari taun ke taun. Ukai ga reti nya baka idup manuk. Tang ninting taun kitai bumai semina chukupka taun nya aja. Taun siti kitai bumai baru. Enda baka orang China ke besimpan sereta beranakka puku ke jemah ila. Bala Iban balat agi ke rinduka pengerami ngirup kediatu. Nyimpan sereta beranakka puku nya ukai biuh bansa Iban. Nya alai lebuh bulan begantung senduk, dia kitai suah amat ngasaika diri lapar. Tu mih maya kitai nyanda beras, minta duit ban ari tauke. Fakta ti baka tu agi mengkang nyadi nyentuk ke kemaya hari tu. Statistik enda kala bula. Raban bansa Iban agi mayuh ke merinsa mensena, dipanyuk penyeranta, bansa ke miskin di Sarawak.

Penanggul tu ukai penanggul ti mar diputarka. Tang mayuh orang Iban rindu ngagai pekara tu nyadi pekara ti mar sereta tusah ngambika dipeda baka ke pandai. Tu mih siti agi dilema ke nyadika batu penekul.

Raban bansa Iban ulih mutarka dilema Iban enti berani nerima sereta ngubah utai ke udah nyadi pugu pengelami dalam pengidup Iban. Bakani chara dih? Mutarka pekara tu ukai mudah tang ukai mega utai ti enda ulih diputarka. Iya baka entelah bisi ba dalam diri Iban empu; semina minta orang Iban empu meda enggau ati ti lurus ba cheremin.

Aku bisi saut aku empu ngagai entelah nya, pia mega kita. Chara kitai mutarka iya ukai chara rama; laban iya unik sereta subjektif. Enti kitai nya bansa Iban, langkah rapat ti keterubah nya ngubahka mindset diri empu. Tu begunaka kuasa mindahka paradigm ngena kuasa ti tegap. Amat mih sempama jaku tuai bisi madah; dilua mati apai, ditelan mati indai; mansang parai apai, surut parai indai; bediri tepantup pala, duduk teachuk tuga. Tang ukai nya baka nya mih iya. Uji perundingka dulu.