Tengah bulan June tu tadi, raban net tauka netizen-hyped ngerintaika Bandar Raya Kuala Lumpur nya sebuah ari bandar raya ke pengabis mayuh penusah nyadi ngujungka media menua tu empu enggau naka pengelengkas lalu ngeluarka artikel madahka raban polis nyangkal berita nya sereta ngumbai artikel nya apocryphal tauka dalam jaku mudah reti iya bula, enda amat. Tang enti meratika baru jaku sida polis nya nyangka kelalu jampat dikeluarka sida.
Artikel dalam 10awesome.com ti betopikka ‘10 Dangerous Cities In The World’ nyangka enda tentu pegari baka pengeluar media ke bukai ke ngena mayuh macham kereban, tang ngengkahka Kuala Lumpur ba penuduk keenam bandar raya ke pengabis mayuh penusah nyadi nyangka bisi sekeda pengamat laban pengawa salah bekenaka senapang nyau majak nyadi ngujungka pengawa beranakka puku nyau majak kurang baka nya mega enggau penyampau penatai temuai.
Sebulan sepengudah ngerintaika Kuala Lumpur dia Hussain Ahmad Najadi, orang keterubah muka bank kelima pengabis besai di Malaysia, Ambank, bisi kena timbak maya siang hari di Kuala Lumpur. Polis ngumbai nya pengawa orang ke digaji munuh iya ketegal bisi penanggul dalam sempekat bejualka tanah.
Kenyau ari 26 July 2013, enda kurang ari 10 bengkah kes insiden betimbak bisi nyadi ba Malaysia. Tu tau dikiraka gumbang pengachau tauka penyarut ke pengabis besai kala nyadi sepengudah penusah ke dibai raban komunis dalam taun 1950an enggau 1960an pia ku sekeda ke landik. Taja pia tu ukai reti menua tu enda kala diregau sepengudah kes komunis nya.
10awesome.com madahka diatu, indu nengeri tu tau dikumbai sebuah ari nengeri ke pengabis mayuh penyarut laban penyampau kes jenayah udah niki ngagai 70 per cent dalam kandang tiga taun ke udah. Tu ukai reti iya kelia menya menua tu likun tang iya mandangka menua tu nyau majak jai-sejai.
Indah surat berita ari Singapore bisi meri komen madahka “Welcome To Malaysia Where ... Death Is Cheap And Staying Alive Costly.” Berita tu madahka enti deka idup kiraka mar agi ari parai. Enti nuan bisi RM5000 nuan ulih ngupah orang munuh munsuh nuan.
Enti di Borneo kitai pan bisi ninga kes nimbak siku orang dagang Sarawak ari Kuching (http://www.theborneopost.com/2013/08/11). Iya ditimbak ba genturung pendiau orang kaya ba Kota Kinabalu, indu nengeri menua Sabah kena 3 haribulan August tu tadi. Teong Choon Kwong, 44, ke bisi muka resort tauka palan makai angin di Dinawan, Sabah, parai lebuh kena timbak orang ari sebuah kerita ke benung bejalai pia ku statemen ari polis.
Taja pan nadai kaul ke terus enggau penyarut ti nyadi di Malaysia tang iya mega nadai nyaup ngangkatka sentimen raban ke beranakka puku. Pia mih komen nitihka agensi pengerintai - Fitch cut Malaysia meri penemu ti ‘negative’ maya pengujung bulan June, bepelasarka enggau tikas utang sereta kurang iya pengawa dalam budgetary reform.
Penyarut ti nyadi tu mega terus muntanka pengawa ti deka ngemansangka industri dagang temuai. Tu mega meri empas ngagai rintai penuduk Malaysia dalam rintai palan ke ditujuka temuai nitihka rintai the United Nations World Tourism Organisation. Malaysia semina ulih nudukka diri ba ranking ke-10 ari sepuluh buah menua.
Nitihka pansik The United Nations (UN) penyampau penatai temuai ke Malaysia bisi mandangka penambah ari 25 million dalam taun 2012, niki ngagai 24.7 million taun sebedau tu. Tang menua Russia ulih ngelihka menua ba Asia Tenggara lebuh iya diengkah ba penuduk ke-9 sereta nerima penatai temuai sepenyampau 25.7 million iku.
Industri dagang temuai di Malaysia endang udah nerima empas negatif dalam taun 2013 kelebih agi sepengudah raban soldadu penyelawai bansa Filipino bisi datai enda beradat lalu deka ngambi Sabah pun taun tu tadi.
Insiden ba Sabah nya aja udah mai empas negatif ngagai industri dagang temuai kelebih agi ba pelilih menua Tawau, iya nya tempat ke manah alai nyelam di Malaysia. Respons ari polis ari insiden tu madahka sida udah enggau naka ulih nyaga pengelikun menua taja pan insiden ti ngeruga pengelikun majak nyadi-senyandi.
Penyuah kes betimbak “ukai reti iya menua Malaysia tu menua ti enda likun,” pia ku komen Inspector-General of Police menua Malaysia, Khalid Abu Bakar madah ngagai pengarang berita sepengudah kes munuh orang dagang Sarawak.
Baikka nya kes gangsterism tauka perambu lama, enda mayuh orang kampar, tauka ketegal busines tauka begigaka utai nyamai– kitai semua pelabaka tetap deka nemu.
Tiada ulasan:
Catat Ulasan