Enggaika Jabah, Jabah ga ke mentua

Kitai diatu diau ba jeman ke begunaka smartfon taja pan udah maju tang agi bisi besekat senentang sekeda pekara. Kenu ku semua pekara ulih dikereja ngena kereban ke maju baka smartfon. Ukai baka maya taun 60an, 70an enggau 80an, bala mensia agi bekirumka surat ngagai pangan diri. Maya nya mih bisi raung pen pal ba surat berita dikena bala mensia ngansahka penemu diri betulis surat seraya ke begigaka tawing baru.

Tang taja pan orang madahka kemaya hari tu orang udah nadai agi tentu begunaka keretas; agi mayuh mega pengawa begunaka keretas. Enda ulih dikeenda, enda ulih dikeenggaika baka sempama jaku tuai; enggaika Jabah, Jabah ga ke mentua. Ambika banding agi mayuh pengawa begunaka chara lama; iya nya beguna hard copy, baka sempekat tauka agreement ke begunaka tanda jari sereta surat ke patut dianjung ke rumah.

Bisi mih sekeda ari bala kitai ke arap agi ke pengelaju Internet enti dibanding enggau pengelubah surat pekirum tang iya ukaika dalih kitai nadai agi nganjung berita tauka nama-nama pekara ngena surat pekirum. Tu mih pekara ti deka dikenangka sekali tu senentang guna posmen ke nganjung surat besehari-sehari.

Kitai anang enda ingat agi bisi 39% ari peranak Malaysia ba menua tu ke nadai akses Internet. Reti nya opis pos ke ba pasar enggau pelilih menua mengkang nyadi palang perengka guna ti pemadu semitan. Ba sekeda ari kitai, servis dipejalaika opis pos nya enda ulih diganti enggau servis bukai ketegal iya ngembuan rega enggau kualiti ti sama enda milih menua. Nya alai ari nya, dua pekara ti patut dikeingatka kitai.

Keterubah iya, iya nya opis pos endang tetap agi bisi, enda milih dini-dini endur baik nya di nengeri, pasar tauka di menua pesisir. Lalu kedua nya pekerja tauka orang ke gawa ba opis pos nya orang ke patut bendar dikerarapka kitai. Enti ukai sida sapa agi? Nama nuan deka pia diasuh orang nganjung surat? Enti aku enggai pan. Adai pan tan gawa nganjung surat ukai ngeleseyka orang ke gawa nganjung surat.

Gambar ari The Star

Ukai pia, laban empai lama ti udah nitihka ripot pengarang surat berita The Star (July 21, 2013) madahka, sida ba genturung pendiau Ukay Heights bisi tetemuka beribu-ribu puchuk surat dibuai ke dalam darung, ukai agi disimpan ba dalam peti surat munyi ke endang dikerejaka sida ngelama tu. Enggau ulah ti baka nya pengarap bala mensia ngagai sida ke gawa ba opis pos mega baka ke sama udah labuh ke dalam darung.

Nitihka penerang berita madahka posmen endang udah setaun ngereja pengawa ti baka nya. Kompeni Pos Malaysia enggau naka pengelengkas madahka sida ke beulah nya diatu benung nganti ke deka dibuai kereja.

Siti pekara ti patut bendar nyadika tanya kitai sebuat iya nya; katika ulah ti baka nya tau dikiraka kitai nya penyalah tauka jenayah ngerusakka reta tengkira?

Nya mih tanya ti patut bendar ditungkap raban Menteri Komunikasyen enggau Multimedia besereta enggau autoriti bukai ke engkeman enggau pekara nya. Sida patut bendar nyidi sereta berundingka pemesai pengarap mensia mayuh ngagai opis pos ke nyau majak kurang ari sehari ke sehari.

Posmen nya entara orang ke balat bendar dikearapka mensia mayuh tang pekara ke nyadi ba genturung pendiau Ukay Heights udah meri pemalu ke udu amat ngagai profesyen sida. Sebedau tu suba, asai ke bulan May tu tadi enti enda salah ingat bisi mih pekara ke nyau deka engkabih enggau pekara nya nyadi ba RPR Batu Kawah iya nya pengawa siku posmen ke betunuka bauchar BR1M. Bauchar tu patut dianjung ngagai orang ke patut nerima nya tang nyangka ketegal ari ati ti ninding sereta kepapas mih posmen tu lalu nunu bauchar nya.

Empas ari pengawa sida tu tadi balat bendar meri impak ngagai mensia mayuh. Orang mayuh udah ditagang ari ngereja tanggung pengawa sida. Utai ke bisi ba mel nya nyengkaum bil, chek, statements bank, surat nuju orang ke dikesayau. Sekeda ari sida sigi lalu nadai nerima nama-nama dalam timpuh beberapa bulan.

Penyalah ti baka tu udah bisi presiden sereta kala diukum. Ambika banding dalam taun 2004, siku posmen ba Jinjang ke ditemu nyimpan 21,655 puchuk surat udah didawa sereta diukum jil dua taun sereta diukum mata duit RM4,000.

Sadang enggau tuduh penemu udah mega kala dikenataika ngagai Pos Malaysia minta sida serius agi milih sereta nyerenih orang ke patut gawa ba Pos Malaysia. Naka kediatu, aram mih kitai sama-sama nganti penyadi raban posmen sepengudah tu.