Ninting taun Malaysia ngintu pengerami Hari Merdeka; ngintu menua ke udah nyadi sebuah menua ke mujur. Semina kemaya hari tu peranak menua Malaysia kelebih agi di Sabah enggau Sarawak ngasaika Hari Merdeka ke bendar nya patut diintu kena 16 September. 56 taun enggau 50 taun endang bisi bida. Pia mega taun 1957 enggau 1963. Enti dikenangka lagi bisi mih orang ke sensitif senentang pekara tu. Baik kitai sama belematika utai enggau pekara ti udah mujur sereta enda mujur dikereja dalam timpuh kitai udah merdeka.
Evidens pemujur ari sukut material chukup mayuh, ambika chunto baka rumah Parlimen, tugu bansa, Museum Bansa, Panggung Bansa, Galeri Seni Bansa, padang bilun bansa, penyangkai kapal bansa, Bank Darah Bansa enggau Bank Negara.
Perengka fizikal bukai baka Kuala Lumpur City Centre enggau Putrajaya International Convention Centre, mandangka pengaya sereta penyelai simbol menua Malaysia.
Taja pia, bisi mega assets pemujur bukai ti enda ulih dipeda tang enti dikira mega tau ngasuh rayat Malaysia temegah ati meda pemujur pekara tu.
Tu nyengkaum pemansang dalam multimedia enggau pemansang korridor bukai, universiti perintah enggau prebet, sekula, institut pematih pengajar, politeknik, kolej komuni, enggau semua institut pematih ke bukai ke bisi ditumbuh mungkur semua menua di Malaysia.
Menua Malaysia ngembuan palan pelajar enggau sistem pelajar ti pengabis manah di dunya taja pan bisi penimpang mimit. Servis senentang pengawa pengerai majak mansang baik nya disediaka hospital perintah tauka prebet. Malaysia mega bisi nyediaka industri dagang pengerai.
Bejuta-juta peranak Malaysia udah belajar tauka nemuai ke menua tasik tauka gawa ba menua bukai enggau ba gerempung antarabansa. Nambahka nya mega, peranak Malaysia patut berasai temegah laban bisi sekeda rayat iya ke udah niki Bukit Everest, matau Antarctica, terebai enggau belayar ngelingi dunya, nyemberai English Channel lalu enggau bejalai nyadi astronaut ngelingi singkamiga.
Iya ke bukai, bisi nya udah numbuh universiti ba menua diri enggau menua tasik, muka restauran, nengkebang flash drive enggau gajet bukai, nengkebang kerita bansa, ngaga Putrajaya enggau Cyberjaya, nyadai pemeri mata duit ti kemerah sereta mayuh bansa pemujur enggau pemeri ti patut ditemegahka kitai.
Menua kitai udah ngubah diri ari ke semina naka ke ngidupka seput nyadi menua ke mansang dalam penemu enggau pengawa nengkebang barang. Mayuh penemu enggau idea baru ngerembai sereta nyadi menua demokratik tu temegah ke lalu nyadika chunto menua ti likun di dunya.
Ngemasa sereta ngenangka pemujur ti baka tu endang tau bendar meri peransang. Taja pia, bekenangka penanggul begunaka pengering sereta pengeliat ati ke enda ulih semina disalamka raban pemesai menua ke nadai ngembuan tanggung pengawa. Nerima enggau ati ti tebuka senentang mayuh pengawa ti empai tembu nya siti ari ulah ti patut dipuji dalam sesebengkah komuniti. Uji kitai sama bela belematika pekara ti nangkanka tu.
Perambu senentang sistem kereban pengangkut bansa agi minta diperatika enggau silik. Pia mega enggau persepsyen mensia mayuh senentang pengelikun menua.
Ba sukut ekologi -- flora enggau fauna enggau spesis pengidup siga – udah majak abis sereta pupus.
Pengelemi lebuh bejalaika polisi sereta pengawa baik nya projek mega tauka iya ke mit tau bendar ngelemika chara perintah bejalaika pengawa.
Kelimpah ari nya peranak menua Malaysia agi balat bendar kurang mantaika ulah serea basa ti manah, penemu sivik, enggau penemu ti berundingka orang bukai. Kaul entara bansa nyau majak kurang-sekurang.
Perengka guna endang majak mansang ari sehari ke sehari. Tang taja pia, ari pemansang nya, sungai kitai nyau majak kamah, rumah nyau majak repuk, mayuh rumah ke lalu empai tembu digaga, flet enggau apartmen ti enda meruan dijaga, uras enggau reba nyau betemarung, bunyi inggar ke enda ulih ditagang sebelah menua, parit ke penuh enggau reba, palan perindang enggau pengelantang ti enda meruan dijaga sereta enggau ulah mensia mayuh ti kurang bisi penemu sivik. Baka nya mega enggau restauran enggau dapur sida, agu enggau palan alai makai ti kamah ti tau ngeruga pengerai.
Kelimpah ari nya, kitai nadai kurang orang ke rindu ngambu dengah kediri empu, ke ngaku diri nyadi tuai sereta pengulu, bejaku ngeringka bansa diri, nyadi ektremis, ngembuan idea enggau penemu ti tau ngerugaka bansa enggau menua Malaysia.
Sekeda segmen dalam komuniti udah jauh bendar berubah ari raban ti ulih nerima penemu orang sereta kemerah nyadi raban ke semina ngeringka raban diri empu aja sereta mantaika penemu ti ekstrem ti tau ngerugaka pengelikun menua. Budaya ngegap sereta ngenakutka, benchi enggau xenophobia ngagai orang bukai enda patut bendar nyadi kemaya hari tu dalam menua kitai ke mansang maju. Bisi nya udah nadai bebasa ke orang bukai lebuh bebaris.
Nya alai, peranak menua Malaysia patut bendar nikal ke pun (need to go back to the basics) pengidup sereta ngembuan pengarap dalam diri sebilik enggau komuniti. Enda chukup enti kitai semina berami ninting taun taun tang nyalamka utai ke jai baruh tikai.
Orang ke ngembuan tanggung pengawa patut nguji mutar mayuh macham pekara ti nyadi ba menua pesisir, pasar enggau nengeri ngambika semua komuniti ulih mansang; duduk bela pemaruh sereta bediri bela peninggi.
Lebuh ngintu pengerami ti besai baka Hari Merdeka, pengawa ti patut dikerejaka aruh iya diberi fokus enggau naka penyampat. Pengerami ukai agi nyadika dalih pengawa ti berat enda ulih digaga sereta enda ulih tembu. Pengerami ngintu Hari Merdeka kemaya hari tu ukai semina ngenang pemedis ngelepaska diri ari diperintah orang bukai sereta mega ukai agi ngenang senentang pemesai pengawa ti udah dikereja tuai pemesai menua ke suba tang lebih ngagai pengawa ti ulih dikerejaka tuai pemesai menua ngagai peranak iya ngambika sida meruan bisi semengat ke tinggi, pengarap ke besai ngaku diri rayat menua Malaysia.
Nya alai, kitai semua ke ngaku diri peranak menua Malaysia patut bejimat enggau sekeda orang ke tau ngeruga sereta nguing runding kitai ngujungka kaul kitai enggau pangan diri nyadi puntan baka menasan jalai jelu. Kitai mega patut bejimat enggau sekeda orang ke deka meda kitai berubah ngena mayuh macham chara; bisi nya ngena sistem demokratik, lalu bisi nya ngembuan timpai penemu ti alternatif. Nerima utai ti baru ukai reti nya semua pemanah mega datai. Semua utai datai enggau pakej. Selamat ngintu Hari Merdeka.
Tiada ulasan:
Catat Ulasan