Pengarap ti udu ngagai gajet ngerugika fizikal enggau mental

Merati ke ulah anak mit ke agi ba tikas tadika tauka sekula primari gagit bemain enggau gajet kemaya hari tu ukai agi pekara ti tau ngalitka ati kitai. Uji duduk di kedai enda lama seraya ngirup kupi dia kitai ulih meda bala nembiak mit ke jauh biak ari kitai bemain enggai tablet tauka video game. Sekeda ari sida dipeda kelalu serius bemain indah enda baka sida nya diau dalam dunya sida empu. Sida lantang sereta kemerah agi bekomunikasyen enggau gajet, tang ukai enggau pangan diri. 

Nama tu senario ke nyadi pekara ke tebalan dalam pengidup ba jeman digital? Nama kaul diri sebilik enggau proses ngemansangka nembiak diatu benung berubah nengah proses transformayen ti nyelai ari selama? Nama gajet digital ulih ngangkatka kreativiti sereta ngasuh dunya sosial nembiak mit balat agi tebuka tauka gajet nya ke udah ngerampas pengelantang jeman nembiak mit?

Dikena nyaut tanya di atas, kitai patut nimbang pemanah enggau pengurang gajet digital. Kitai tentu nerima fakta ti madahka Internet, gajet digital sereta mayuh aplikasyen ke bukai bisi meri penguntung ngagai mensia.

Internet tau disempamaka baka tasik penemu ke nadai garis pengentara. Penerang ulih dikauk  barang maya ngena ujung jari enggau nadai bebayar.

Ari nya, mensia ngembuan mayuh penerang tauka informasyen, tang baikka sida iya bepenemu sereta ngemeranka penemu sida enggau manah; nya agi bedau ulih tentu dijaminka pengamat iya.

Sistem pelajar kemaya hari tu berubah enggau chukup drastik. Mayuh raban pengajar enggau pengelicha kemaya hari tu ngena Facebook enggau laman web dikena sida meri pengawa sereta bekomunikasyen enggau nembiak sida senentang pengawa ti patut ditembuka nembiak sida.

Kelimpah ari nya, dunya siber nya perais ngagai mensia ke ngembuan tukuh ke deka nemu mayuh bengkah pekara dalam pengidup besehari-sehari. Tu tau bendar ngujungka sekeda sida ke pandai sereta landik agi nya berengkah nengkebang pekara baru jemah ila.

Mayuh ari tanya tauka penanggul kitai ulih disaut ngena gajet digital. Penatai Internet, belajar nengah online, aplikasyen network sosial baka Twitter, Facebook enggau ke bukai deka terus nyadi tawing nembiak serak digital.

Taja pia, kita tetap ngembuan ati nangi sereta pengirau lebuh serak tauka generasyen kediatu kelalu obses enggau gajet digital ti tau ngujungka sida napi risiko pengerai ari sukut fizikal enggau mental.

Ketegal udu gagit enggau gajet ngasuh sekeda ari sida nya nyau enda makai, kurang tinduk, lembau nembuka kereja sekula lalu kurang bekomunikasyen enggau apai indai. Meratika skrin gajet dalam timpuh ti lama sereta nadai belelak ti chukup tau ngasuh ngerusakka mata.

Ngembuan pengerindu sereta hobi berinteraksyen enggau gajet digital mega ngasuh nembiak mit kurang aktif ari sukut fizikal. Tu ngujungka gumpal isi sida nadai aktif engkebut sereta tubuh ke nadai bepeluh.

Nembiak ke kurang besenam, ulih napi risiko gemu, penyakit tungkul atau sereta kemi manis. Bisi mega kes nembiak ke kurus ketegal ati bemain video ngujungka sida enda ingat  makai sereta kurang tinduk. Tu mega deka meri empas ngagai emosyen, ulah enggau pelajar sida di sekula.

Bisi mega apai indai ke meli sereta meri komputer tablet ngagai anak sida ke baruh umur dua taun. Pansik bisi madaka aplikasyen  komputer nyengkaum iya ti digaga ungkup ke sida anak mit enggau nembiak ke beumur dua taun ditemu nadai meri penguntung ari sukut pelajar. Ukai semina nadai meri penguntung tang iya mega mai risiko ngagai pemansang sosial enggau emosyen.

Nembiak mit ke baruh umur dua taun aruh iya belajar ngemansangka diri nengah kereban main kreatif lalu beksperimen enggau rampa ti ngelingi iya, ukai nya skrin gajet komputer.

Peneleba pelajar ti manah iya mungkur pengawa berinteraksyen enggau orang tuai tauka nembiak mit bukai, regas ari sukut fizikal, matau rampa ngelingi sida sereta ngena  semua pengasai peneleba tauka deria lalu belajar ngambika ulih bekomunikasyen enggau orang bukai.

Dikena ngurangka risiko pengerai nembiak mit, apai indai dilalau nekatka awak sida nembiak bekenaka gajet digital. Peransang anak ngaga aktiviti fizikal ngambika sida nerima rangsang selama nyadi ngambika tubuh sida nembiak tu mansang sereta bepengerai.

Semua orang udah nerima fakta ke madah pelajar anak nya endang tanggung pengawa apai indai. Pekara tu sigi enda ulih disakalka agi. Nembiak serak digital kemaya hari tu patut ditarak awakka sida ulih meretika konsep nemu teknologi pemadah enggau komunikasyen (ICT) ke bendar; iya nya landik ngena gajet digital, mereti konsep pengelikun ICT, landik ngena mayuh bengkah aplikasyen ICT ti bisi kemaya hari tu, pandai ngena penemu ICT ke pengelantang diri, gerempung enggau orang bukai sereta ngemeran pengawa ICT ke pengerai sepemanjai pengidup.

Enti apai indai enda ngemeratka aspek pengerai enggau pengelikun ngena gajet digital ngagai anak sida, dia kitai tentu nangi nembiak serak digital tu lebuh besai ila bisi penimpang ari sekeda aspek baka kurang aktiviti fizikal, kurang berinteraksyen betunga mua, ngembuan selangkuh tubuh ke tachat sereta nyangka tau napi penanggul psikososial.

Patut tauka enda kitai irau ke pekara tu?  Nya bepanggai ba kitai empu berundingka pekara tu laban lebuh maya nya ila engka kitai empu pan udah nadai agi di dunya meda nembiak serak ‘generasyen zombie’ idup diri sebilik, idup dalam raban komuniti, ngaturka gerempung sereta merintah dunya.