DONA Aida de Jesus nyau udah beumur 96 taun, tang taja pia iya agi regas ngaturka pengawa ba restoran sida sebilik di Macau. Taja baka nya, bisi siti pekara ti narit ati senentang indu tu – agi tegap ngetanka jaku ti nyau deka pupus iya nya jaku Patua.
“Semua bala tawing aku udah nadai, nadai agi orang ke bejaku jaku Patua enggau aku,” ku iya sambil ngenahka pemakai ngagai orang ke datai di restoran iya, Riquexo.
Patua nya jaku asal Dona Aida lalu kelia iya kala dikumbai ‘jaku Kristian’ tauka ‘jaku manis Macau’ – iya nya dialek Kreole ti ngelumuka tiga bansa jaku iya nya jaku Portugis, Kantonis enggau Melayu, tang bisi ngemasuk mimit jaku Hindi, Jipun sereta sekeda jaku bukai ti dikutip lebuh saudagar Portugis belayar ngerembaika dagang sida beberapa abad ti udah.
Dulu suba jaku tu nyadi jaku ke dikena sida peturun Serani (penakan Eropah enggau Asia) di Macau dikumbai orang ‘Macan’ (disebut Ma-kan): iya nya orang ke bekereja nyadi tukang ngalihka jaku enggau kader ke komuniti Portugis ba tanah jajahan China ti balat ngemeratka identiti sosial sida.
Dalam taun 2009, Gerempung Pelajar, Sains, enggau Kebudayaan Bansa-Bansa Besatu (Unesco) ngelaska Patua nyadi sebengkah jaku ‘balat enda tegap’. Aktivis jaku menua madahka semina tinggal seraban mimit aja komuniti Macau ke agi ulih bejaku jaku tu enggau lanchar.
Kenyau ari Macau ti diserah pulai ke menua China dalam taun 1999 iya lalu berubah nyadi nengeri alai bejudi ti pengabis besai di dunya. Tu ngujungka jaku bahasa Patua majak pupus.
“Jaku tu udah lenyau ari dilah mensia mayuh,” ku Miguel Senna Fernandes, loyar ke ngangkatka jaku tu ke awakka jaku tu nyadika medium budaya orang Macan.
“Ngidupka jaku Patua baka ke meri pengidup baru ngagai orang ti udah lenyau pengingat,” ku Fernandes. Penatai Fernandes ke mega enggau ngangkatka jaku tu kelimpah ari ti udah nemu pemesai guna ngetanka budaya bisi mantu ngidupka baru jaku Patua dalam komuniti.
Kebuah pia laban Fernandes bisi mega nulis lalu nyadi direktor cherita kelulu ngelugi senentang komuniti Patua ti dibantaika ninting taun di Macau. Dalam teater ngelugi nya, Fernandes ngena jaku Patua dikena iya ngemaleka jaku kontemporari Macau.
Cherita kelulu Fernandes ti pengabis baru iya nya Que Pandalhada! Ngena panda nyadika tema – sepengudah dua iku panda ti diberi perintah besai datai di Macau nyadika tanda ulang taun ke-10 menua nya diberi pulai ke China.
Dikena belajarka jaku Patua, Fernandes ngumbuk ini iya nerangka reti tiap-tiap leka jaku. Entara kebuah jaku Patua majak nadai dikena nya ketegal ari polisi ke ngena jaku Portugis di sekula kelimpah ari ke enda meransang sida ngena sereta ngukum bala nembiak ke bejaku dalam jaku nya.
Dalam abad ke-16, lebuh pematau Portugis datai di Macau ari Melaka dia jaku Patua tu endang balat bendar diguna kelebih agi lebuh bisi jadi belaki bini champur entara bansa. Nambahka nya mega, pematau Portugis tu empu bisi mai tama sekeda leka jaku ke seruran dikena bala ulun Afrika sida.
Taja pia, lebuh pelajar ke teratur berengkah dipejalaika ba abad ke-19, jaku Patua berengkah kurang dikena lalu ba abad ke-20 iya semina dikena raban orang indu aja lebuh ke bejaku enggau pangan diri. Jaku Patua mega semina dikena di rumah, enggau bala anak lalu kadang-kadang nya di pasar, tang ukai di sekula tauka tempat kereja.
Reti nya guna jaku tu majak besekat, tang tukang syair abad ke-20 baka Jose dos Santos Fereira ke pegari enggau nama Adé balat bebasaka jaku Patua tu laban ku iya jaku tu lambang budaya komuniti.
“Tu mih sada nyawa raban bansa Macan,” ku Fernandes.
Entara leka jaku ti dikerinduka iya nya leka jaku ‘saiang’, leka jaku ke asal iya ari jaku Melayu ti mai reti rindu tauka lelengau ti sama bunyi iya enggau leka jaku Portugis ‘saudade’.
Manuel Noronha ari Universiti Macao, dalam tesis iya senentang Patua madahka, jaku nya bisi ngembuan kuasa nguingka runding antarabansa. Ambika banding leka jaku ‘babacai’ tauka anak mit nya leka jaku ti dipegulai ari jaku Hindi (baba mai reti apai) lalu chai (ujung leka jaku dalam jaku Kantonis ti mai reti anak mit).
Taja pan pugu jaku Patua tu datai ari jaku Portugis, jalai jaku iya kurang lebih jaku Kantonis laban iya nadai ngembuan leka jaku pengawa enggau leka jaku betandu nyadika tanda penegas. Indah, Noronha empu enda nemu baka ni deka nerangka iPhone tauka cappucino dalam jaku nya.
Identiti orang Macan ke betubuh kira-kira 8,000 orang di Macau udah majak lundas. Mayuh udah pindah sebedau Macau diserah ke China ketegal faktor ekonomi sereta nangika nyadi mansa tauka dengah diskriminasyen perintah China.
Kemaya hari tu orang Macan nyamai agi ngumbai diri sida orang China lalu semina bejaku jaku Portugis di sekula. Taja pia, budaya Macan agi ulih ditan nengah chara bukai iya nya pemakai. Agi mayuh nembiak rebak baru ke nemu nyumai tauka makai ‘ta-chu’ iya nya pemakai angat Portugis ti ngundan sosej China, dinah enggau sos undang orang Melayu iya nya sos belachan.
Sepengudah Fernandes ngepunka kimpin iya pun taun 1990-an, nyau majak mayuh orang enggau masuk raban teater iya. Ukai semina nya aja, iya mega nerima duit bantu ari perintah.
Taja baka nya, ba pelilih menua ke nyau deka 95 peratus ari peranak rayat dia bansa China, dia Fernandes ngumbai duit bantu perintah nya semina baka ke ngudahka aja laban ‘sida enda nemu nama utai ti patut ditanka’.
Indah nya bisi penulis di Macau Daily Post ti ngasuh jaku randau sekeda individu ke agi lanchar bejaku Patua baka Dona Aida nya direkod kedungka sida agi idup.
“Jaku tu indah enda baka pesakit ke raya sakit, jejengap nganti maya ke deka mutuska seput. Diatu kitai bisi peluang dikena ngemanjaika pengingat senentang jaku tu,” ku iya. - Agensi
Tiada ulasan:
Catat Ulasan