Tips Nulis Karang

1             Bansa enggau Tukuh Karang

Dalam peresa PMR enggau SPM nembiak ke ngambi peresa ba mata pelajar Bahasa Iban deka diberi empat enggau lima topik karang bepanggai ba tikas peresa. Raban tanya tu deka bebida ninting taun. Taja pia, semua tanya karang ti dibantaika dalam keretas peresa nya deka nyerangkung dua puluh bansa karang ti udah patut dipelajarka nembiak ba dalam kelas. Nembiak dipinta milih siti topik aja ari empat tanya nya.
 

Topik ti dibantaika dalam keempat-empat tanya nya nyengkaum dua puluh bansa karang nya tadi ti tau dibagi ngagai karang beformat enggau enda beformat. Karang beformat nyengkaum 11 bansa karang baka ti dirintaika di baruh tu:

a	Jaku ba mua bala mayuh (ucapan)	f	Surat Enda Formal (Surat Enda Rasmi)
b	Licha (ceramah)	g	Debat (bekelikuh)
c	Pidato	h	Randau
d	Ripot	i	Interbiu
e	Surat Formal (Surat Rasmi)	j	Diari

Karang enda beformat nyerangkaum 9 bansa karang baka ti dirintaika di baruh tu:

a	Pemandang	f	Karang Jurai (Perbincangan)
b	Karang kreatif (Cherita)	g	Sempama
c	Runding diri	h	Jaku Sulu
d	Karang Kenang	i	Artikel (Rencana)
e	Fakta	j	Biografi

2             Ajar sereta Lalau Nulis Karang

Pengelandik sereta penyikar ngarang ukai semina bepanggai ba pengulih  nusun isi tauka fakta dalam pikir nuan aja, tang nuan mega patut pandai nguna semua penemu diri. Pia mega, ukai semua fakta  ti ditemu nuan nya ulih dipasuk nyadi isi karang nuan nya. Nuan mesti pintar milih fakta-fakta ti lebih releven sereta iya ti engkeman aja. Enti enda pia, karang nuan deka tepawah ari topik. 

Kelimpah ari nya, nuan mega patut nyikap diri empu ngena penemu ti dalam sereta tinggi sebedau ngarang. Baka ni chara? Nuan patut rajin macha mayuh leman tukuh karang baka majalah, surat berita, novel, jerpan, bup teks, etb. Nya baru, karang nuan ulih ngundan isi ti chukup, betusun lapis, padat sereta nemban ba topik ti ditanya.

Iya ke bendar, pengawa ngarang ukai pekara ti mar sereta pedis dikereja. Sekeda nembiak nadai konfiden tauka pengarap ba diri empu lalu ngumbai diri enda ulih nulis karang ti chukup manah. Sida takut sereta rawan. Kebuah pia, laban sida tu enggai belatih ngarang sereta enda chukup besedia.

Sebedau ngasilka sebarang karang, nuan patut ngelangkar karang nuan dulu. Langkar tu beguna bendar, kelebih agi ba maya peresa, laban nuan diberi tatak jam endur nulis karang nuan nya. Langkar nya mega patut mandangka pekara ti deka ditulis sereta dikenataika nuan. Enti nuan udah nemu lalu sedia nulis isi ti patut ba tiap-tiap paragraf, tentu nuan enda kakang-kakang  nulis. Nya mih, enti nuan deka ngasilka karang ti chukup manah, endang bisi teknik, tikas sereta proses ti mesti dititihka nuan. Bacha mayuh agi bup tauka majalah.

Sebengkah agi pekara ti patut dikemeratka nuan nya, stail tauka gaya tulis nuan. Tulis nuan mesti terang sereta mudah dibacha pemeresa lalu narit ati pemacha. Anang sekali-kali nguna stail tulis ti bebungai-bungai sereta pedis dibacha. Tulis ti terang sereta  mudah dibacha mega ulih narit ati pemeresa macha karang nuan kedua kali tauka lebih, lalu nambahka sekeda mengga mit mark ti lebih ari enggi orang bukai.

3             Proses sereta Jalai Ngarang         

Pengelandik dalam proses ngarang ukai bepanggai ba pengulih nuan nulis enggau jampat. Pekara ti beguna agi iya nya, nuan patut ngembuan tulis ti perisi, beresi, terang sereta mudah dibacha pemeresa tauka pemacha. Kelimpah ari nya, karang ti bekualiti nya ngembuan kerembai isi ti chukup, berurun sereta nitihka topik ti ditanya. Sekeda karang penulis tepawah ari menasan topik laban sida enda macha enggau silik sereta meretika pekara ti ditanya.

Isi karang nyadi tali seput pekara ti ditulis nuan. Enti nadai fakta enggau penerang ti nemban sereta betul, karang nuan enda ulih narit ati pemeresa. Nya alai, kena nuan nyikap diri empu enggau pekara nya, nuan patut macha sereta bemalinka rengka ti bisi besangkut paut enggau kereban bacha baka: surat berita, majalah, bup akademik, chunto karang, artikel, etb.

4             Teknik Ngarang

Teknik Ngarang manah sereta engkeman ulih ngasilka karang ti bekualiti tinggi. Ngena chara tu, nuan ulih nerima mark ti tinggi. Bisi lima renggat tauka proses ti beguna lebuh ngarang baka ti dirintaika di baruh tu:
•   milih topik tauka tanya ti patut
•   beratika topik tauka tanya
•   nusun langkar karang
•   nulis lalu ngerembaika isi langkar karang 
•   ngedit karang

5             Milih Topik tauka Tanya

Pilih SITI aja ari empat tauka lima topik ti diberi. Bacha semua tanya tauka topik sebedau milih. Tentuka diri empu amat-amat mereti sereta ngembuan mayuh fakta tauka isi dikena nulis sereta bejurai topik ti dipilih nuan nya. Enti sema nuan asaika bisi penemu ba lebih ari siti topik, pilih topik ti ditemu nuan amat-amat. Anang milih topik ti mar ba ati nuan, laban semua tanya nya sama aja mark, 40 % tauka 50%. Nuan patut nentuka diri nemu bansa karang sereta format iya.

6             Beratika Topik

Siti-siti topik patut diperati sereta dipansik enggau silik. Tuju iya awakka nuan enda mudah  salah saut.  Dua pekara berat ti patut dipeda enggau silik maya ti beratika topik iya nya:
•   nemu sereta meretika pekara ti patut ditulis nitihka peneka topik tauka tanya
•   nentuka format enggau bansa karang nitihka peneka topik nya

Kena nentuka peneka topik, nuan patut ngaris pugu leka jaku dalam tanya nya. Ambika chunto, enti tanya nya nanya pasal penguntung aja, nuan nya patut bejuraika pasal penguntung aja, anang nulis pasal pengerugi. Skop tanya patut dititihka nuan. Nya alai, ari nuan ti mereti amat-amat pasal topik tauka tanya sebedau nulis, ulih nentuka kualiti karang nuan nya.

Maya ti nentuka format enggau bansa karang ti patut ditulis, pugu topik tauka tanya ulih mantu nuan. Chunto pugu tanya ti nya baka tu: Tulis sepuchuk surat, Tulis baru teks interbiu, Terangka, Pejuraika, Beri penemu nuan, Terangka, Gaga ripot, Cheritaka, Tulis licha, Tulis berita, Sediaka teks jaku, Punka cherita nuan nya, Kelikuhka, etb.

7             Nusun Langkar Karang

Langkar karang nya sebengkah malin ti beguna bendar kena nuan nulis karang ti chukup manah. Nuan enda deka tepawah ari utai ti ditanya maya nulis enti bisi langkar nya. Tiap-tiap langkar karang mesti ngundan tiga bagi pekara baka: pemuka jaku, isi ti dipeguna, penutup.

Semua isi ti dipeguna mesti ditusun nitihka ripih pemerat iya. Isi dalam langkar karang patut ditulis kedut sereta pandak. Kelimpah ari nya, langkar karang mega  ulih:
•   nentuka semua isi karang nuan nya releven
•   nusun semua isi tauka fakta nitihka ripih
•   natak pemanjai setiap isi ti dipejuraika nuan
•   nentuka pemanjai karang nuan
•   nyeliahka diri ngulang fakta   

8             Nulis sereta ngerembaika langkar karang

Kena nulis karang ti tinggi kualiti, nuan patut bisi pemintar nguna penemu ti meruan dikembuan  dalam ati nuan empu. Nuan patut ngerembaika langkar karang ti udah disediaka nuan nya ngambika nyadi siti karang ti menyana sereta nemban nitihka tanya tauka topik. Kena nuan nulis karang ke baka nya, jaku (bahasa) nya sebengkah pekakas ti beguna. Nya alai, sepil, tanda bacha, gaya jaku enggau grama patut enda salah sereta engkeman ba sesebengkah karang.

Sebaka enggau langkar iya mega, karang penuh ngembuan tiga bagi: pemuka jaku, isi ti dipeguna, enggau penutup. Bagi pemuka patut nerangka pasal topik lalu ditulis ngena chara pandak sereta padat dalam siti paragraf. Taja pan nadai mark ungkup pemuka jaku, tanya iya ulih meransang sereta narit ati pemeresa tauka pemacha  ransing ati deka macha karang nuan nya.

Isi-isi karang nya mih tubuh karang nuan. Bagi isi tu patut ditulis dalam tiga datai ke lima isi pugu. Tiap-tiap isi mega patut ditulis dalam siti paragraf. Tiap-tiap paragraf mega patut kurang lebih sama pemanjai lalu iya ulih nentuka pemanjai karang nuan. Ambika chunto, enti karang nuan patut enda kurang ari 200 leka jaku lalu nuan deka ngenataika empat isi dalam empat paragraf mega. Tiap-tiap paragraf patut ngundan antara 50 – 60 leka jaku. Anang nulis kelalu mayuh, anang mega nulis kelalu mimit. Enti kelalu mayuh dalam siti paragraf, nuan deka kurang ruang endur ngenataika isi ba paragraf ti bukai. Tuju paragraf mega, ambika karang nuan beresi ari sukut gaya sereta mudah dibacha pemeresa. Isi-isi ti dikenataika nuan mega mesti bekaul jaul enggau pangan diri lalu bisi chunto-chunto ti engkeman.

Tiap-tiap karang mesti bisi penutup. Bagi tu patut ditulis dalam siti paragraf aja. Karang ti nadai penutup sebaka enggau rumah ti nadai pintu belakang. Iya mega sama enggau cherita ti nadai pengujung. Ba bagi tu nuan semina tau ngetan sereta ngeringka penemu diri pasal pekara ti udah dibantaika nuan, Anang sekali-kali nambahka isi fakta ti baru.

Karang ti manah, patut ditulis ngena ayat ti pandak. Anang sekali-kali nguna ayat ti kelalu panjai sereta bebelit-belit, enggai ke  pemacha enda meretika pekara ti deka dikenataika nuan nya. Pekara sereta penerang ti deka dikenataika nuan ngagai pemacha tauka pemeresa nya patut terang. Taja pia nuan diperansang nulis mayuh macham bansa ayat baka; ayat penerang, ayat pasif, ayat aktif, ayat selama, ayat tunsang sereta bansa ayat-ayat ti bukai.

Penulis patut nguna penanda kaul jaku (penanda wacana) ti engkeman dalam karang kena  nanda kaul jaul paragraf siti enggau paragraf siti. Penanda kaul jaku tau mega dikumbai penanda kaul penemu. Kelimpah ari nya, penanda kaul jaku mega ulih nyambung ayat enggau ayat. Sekeda ari penanda kaul jaku ti sekalu dikena dalam karang iya nya baka ti di baruh tu:

Penambah jaku	tambah mega, kelimpah ari nya, lebih-lebih agi, udah nya, agi mega, iya ti           bendar, sema jaku, etb.
Jaku penyambung	taja pia, tang, lalu, ambika, enggaika, enti, sereta, enggau, laban, tegal,
Sema banding	taja pia, udah ke dibanding enggau, enti dibanding enggau, bebanding enggau, kebuah pia, enti baka nya, etb.
Rurun jaku penitih	ari nya, keterubah iya, sepengudah nya, ti penudi iya, lebih beguna agi, etb.
Chunto	ambika chunto, ambika banding, baka, reti iya, etb.
Maya	sepengudah nya, ngena jaku pandak, sebedau nya, berengkah ari nya, ke diatu, agi ke diatu, pengujung iya, etb.
Simpul penemu	ari nya, ngena simpul penemu, nitihka penemu,

Nitihka Aminuddin Rosli, (2001) penanda kaul jaku bisi dua bengkah, iya nya:

a.	Penanda kaul jaku ti ti nerangka bantah idea. Ambika chunto, taja pia, enti enda pia, nitihka penemu       orang bukai, etb.
b.	Penanda kaul jaku ti nampung idea baka: kelimpah ari nya, tambah mega, ketegal nya, etb.    Kelimpah ari ke meri kaul jaul paragraf siti enggau paragraf bukai, penanda jaku mega beguna    dikena nyambung siti ayat enggau ayat ti bukai.

   

9             Ngedit Karang

Udah tembu nulis karang, nuan patut ngagihka peluang mimit kena nuan ngedit sereta nyeruri pekara ti udah  ditulis nuan. Sekeda pekara ti patut diedit nuan nya baka:

a	Nombor kad pengelala
b	Format karang
c	Pemuka jaku
d	Isi-isi enggau kerembai isi
e	Chunto
f	Penutup Karang
g	Penyampau leka jaku
h	Sepil
i	Pemeresi tulis
j	tanda bacha

10           Struktur Karang

Tiap-tiap karang ti penuh sereta menyana patut ngundan antara 3 – 5 pugu isi. Taja pia, penyampau paragraf bepanggai ba pemanjai kerembai jurai pugu isi nya. Kekadang, sekeda karang ngundan lebih ari lima paragraf. Peratika langkar strukur karang di baruh tu. 

Paragraf pemuka jaku
Paragraf 1: Isi kesatu
Paragraf 2 : Isi kedua
Paragraf 3 : Isi ketiga
Paragraf 4 : Isi keempat
Paragraf 5 : Isi kelima
Paragraf penutup

Bisi tiga bengkah pekara ti dikemeratka lebuh orang meresa karang nuan lalu meri mark.  Pekara nya baka: pugu isi sereta kerembai isi, jaku (bahasa) enggau gaya nuan ngenataika jurai idea nuan.

10.1       Pugu Isi

Nuan enda diperansang mantaika lebih ari lima pugu isi dalam karang nuan. Kebuah pia, enggaika nuan enda ulih ngerembaika jurai idea nuan enggau lenak sereta dalam. Enti baka nya, karang nuan enda tentu padat sereta menyana.

Sema jaku, enti nuan bejuraika semina tiga tauka lima pugu isi, kelikuh jurai nuan tentu lebih lenak sereta dalam agi. Penyampau isi mega bepanggai ba tanya tauka topik enggau pemintar nuan bekelikuh tauka bejuraika pugu isi nya. Pekara tu mega bepanggai ba pemagas nuan macha bup, majalah tauka surat berita. Enti nuan udah nyediaka diri ngena fakta enggau penerang ti chukup, nuan patut ulih mansutka idea lalu ngasilka karang ti bekualiti.

Nuan mega patut nentuka karang nuan enda kelalu panjai sereta ngundan utai ngapa. Utai ngapa reti nya pekara ti enda besangkut paut enggau topik. Taja pia, enti nuan pintar sereta konfiden nguna gaya jaku ti manah, enda ga ngawa enti karang nuan nya panjai mimit ari ti patut.           

10.2       Guna  Jaku Dalam karang

10.2.1    Grama tauka jalai jaku

Karang nuan mesti ditulis ngena gaya jaku Iban ti standard. Ari nya, nuan patut nyeliahka diri ari penyalah grama, sepil, pengaya jaku, terminologi, tanda bacha enggau struktur ayat. Karang ti nadai penyalah ba grama ngemudahka pemeresa meresa sereta meri mark ungkup karang nuan. Gaya jaku enggau variasyen jaku ti dikena nuan dalam karang patut engkeman enggau bansa karang ti ditulis nuan nya. Ambika chunto, karang ti besangkut paut enggau sains patut nguna variasyen jaku sains. Pia mega, karang kreatif tauka karang litericha patut ngundan gaya jaku kreatif sereta puitis. Ari nya, nuan patut pintar milih leka jaku ti engkeman enggau topik karang nuan nya.

Kelimpah ari nya, enti nuan ulih nyelitka elemen humor tauka bungah, jaku idiomatik,  sempama, elemen saspen, jaku tuai enggau jaku ari orang ke tebilang ulih nambahka mark ba karang nuan sereta mandangka tikas pemanah karang nuan.

Karang ti menyana iya nya karang ti ngundan grama tauka jalai jaku ti betul. Ngena simpul jaku ti pandak, karang nuan patut enda ngelanggar atur jaku ti gramatis ti bisi kaul enggau proses ngaga leka jaku enggau ayat.

Dalam proses ngaga leka jaku nuan mesti nguasa sereta mereti pasal bansa leka jaku baka: jaku nama, jaku pengawa, jaku adjektif, jaku penyambung, jaku penerang. Penulis mega patut meretika proses ngaga leka jaku nya ngena urup penambah lalu nyadi jaku tumbuh baka: jaku nama  tumbuh, jaku pengawa tumbuh, etb.

Dalam aspek ngaga ayat, pekara ti beguna bendar iya nya kaul antara subjek enggau predikat. Ayat ti penuh sereta menyana patut ngundan subjek enggau predikat.

10.2.2    Sistem Sepil
Karang ti manah sereta menyana patut nguna atur sepil ba bup Sistem Jaku Iban ba Sekula, (2007). Semua pengajar Jaku Iban patut nerangka lenak agi pasal pekara ti dipejuraika dalam bup     
nya, lebih agi ba proses nyepil jaku Iban ti ngena urup penambah. Pekara ti suah agi salah sepil nembiak iya nya, leka jaku ti ngundan penambah di..., ke..., se..., di...ka, dipe...ka. diper...ka, dike...ka, m...ka, n...ka, ng...ka, nge...ka, ngem...ka, ngen...ka, be...ka, ber...ka  enggau  ...ka.   

10.2.3    Tanda bacha & Urup Besai.
Karang nuan patut nguna tanda bacha enggau urup besai ti betul ba endur ti patut. Sekeda penulis enda ingat nguna urup besai ba leka jaku keterubah ba pun ayat. Sekeda mega enda ingat nguna tanda bacha ti engkeman ba ujung ayat. Enti pia, karang nuan mar dibacha sereta tusah deka bulih mark ti tinggi. Tanda bacha ti suah agi dikena maya nulis karang iya nya; tanda titik, tanda koma, tanda tanya, tanda seru, tanda pemuka & penutup jaku (tanda petik), etb. Semua guna bisi diterangka ba bup Jalai Jaku Iban tauka ba bup teks.
                               
11           Malin Ngarang Surat Formal

Surat formal (surat rasmi) ditulis selalu iya ditulis nuju opis perintah tauka opis kompeni. Surat formal tau dibagi ngagai sepuluh bengkah baka ti dirintaika di baruh tu.

a	Surat komplin	f	Surat dagang
b	Surat bantah	g	Surat janji jual beli
c	Surat mesan barang	h	Surat formal perintah
d	Surat ngapil	i	Surat formal serikat ukai perintah
e	Surat notis	j	Surat bepadah ngabang

Maya nulis surat bansa tu, nuan mesti nguna jaku sereta sepil ti standard. Anang nguna jaku pasar. Karang ti baka tu mega patut nitihka atur format ti udah ditetapka. Enti enda pia, mark nuan deka dipusil. Format surat kirum formal patut bisi pekara ti di baruh tu:   

Addres pengirum	di tulis ba sukut atas sepiak kiba lambar surat
No. telefon pengirum	ba sukut sepiak kanan
Garis panjai melintang	ba baruh no. Telefon, ari kiba ngagai kanan surat
Nama & addres penerima	ba baruh garis melintang di sepiak kiba, sepengudah langgang dua baris ari garis melintang
Haribulan	ditulis sepiak kanan
Jaku pengelalu	Chunto – Tabi ...
Pekara	topik pekara ti deka dikenataika pengirum dalam surat. Anang engkah tanda titik  ba ujung ayat topik tu.
Paragraf	Paragraf kesatu enggau ti penudi enda ibuh diberi nombor. Paragraf kedua sereta iya ke udah nya aja di beri nombor.
Pengaku pengirum	ditulis ba baruh penutup surat
Nama enggau tanda jari pengirum