Belematika 50 taun penumbuh Malaysia

Belemati sesebengkah sejarah indah enda baka ke meda rumah lama ari penjan rumah baru. Nama agi enti iya digaga betiban entara dua buah rumah nya. Rumah baru ti digaga udah tentu manah agi sereta moden ari sukut kereban luar enggau dalam, enti dibanding enggau rumah lama ke mayuh ninggalka seribu satu nostalgia ti disempamaka baka kenang ngeruga runding.

Malaysia udah ditumbuhka kira-kira 50 taun ti lalu kena 16 September 1963, asil ari ngelumuka nengeri ba Semenanjung Tanah Melayu enggau dua buah nengeri Borneo iya nya Sabah enggau Sarawak. 

Dalam timpuh 50 taun tu mega sekeda endur udah diangkat nyadi Wilayah Persekutuan iya nya Kuala Lumpur (indu nengeri), Labuan enggau Putrajaya. 

Pengada menua Malaysia ti entap bekau ari ngelumu semua 14 nengeri ba baruh Perintah Parti Perikatan ti udah nya ditukar enggau nama Barisan Nasional (BN) amat balat meri temegah ati baka pemanah iya Bukit Kinabalu di Sabah enggau Gua Niah di Sarawak ba mata dunya. 

Kemaya hari tu Malaysia nya siti ari menua ke benung ranchak mansang ba sukut  ekonomi lalu iya mega entara menua ti pengabis mansang ba dunya. Diatu iya benung masuk fasa baru dalam pemansang teknologi moden.

Malaysia kemaya hari tu ukai semina diuan kira-kira 30 juta peranak ari mayuh raban bansa baka raban bansa Melayu, etnik Sabah enggau Sarawak, China enggau India sereta mega nyengkaum peranak menua luar baka sida ari Bangladesh, Indonesia, rayat ari menua Afrika enggau menua Arab ti majak mayuh ketegal sida milih menua Malaysia tu nyadi tempat ngiga jereki laban kena tekan pengidup ari sukut sosial enggau ekonomi ba menua sida empu.

Nama kitai rayat Malaysia udah enda ulih meda pemujur tuai pemesai menua sampai iya ulih ngangkatka Malaysia ke legit dunya? Enti kitai ngumbai pemujur menua kitai baka utai ti datai labuh ari langit; nya reti iya kitai udah ngaga pemutus penemu ti salah. Enti nadai sida ke tuai dulu suba udah tentu kitai enda ba penuduk status quo baka ti dipeda kitai kemaya hari tu.

Penyerakup semua bansa Malaysia kenyau ari setengah abad menya udah ngujungka rayat menua tu bediri bela peninggi enggau bansa bukai di dunya, lalu duduk sama pemaruh enggau rayat menua bukai ti udah mansang baka United Kingdom ti udah kala merintah menua kitai. 

Pekara ti patut bendar dipejalaika Perintah Besai kemaya hari tu nya ngeringka semengat peranak menua sereta nerenak sida enggau penerang senentang sejarah Malaysia ti nemban, maya iya berengkah ditumbuhka suba, baik nya dikeluarka ba media massa tauka ngeluarka bup ti setipak enggau nya. 

Cheritaka mih senentang pengawa tuai pemegai menua lalu mega bantaika cherita Suruhanjaya Cobbold ke betanggung  pengawa nyadika menua tu besatu ari Perlis nyentuk ke Sabah. Sejarah patut didokumentasyenka lalu dokumen sejarah patut dibelematika nyadi semengat enggau kereban dikena ngerakupka kaul sebuah menua ti ngembuan seregah diri ti tinggi.

Generasyen nembiak redak serak dudi tentu enggaika insiden baka ti udah nyadi ba Lahad Datu enggau Semporna taun 2013 nyadi baru enti sejarah enggau semangat sejarah nya enda meresap tama ngagai runding sida. 

Kitai patut ngelaban nama-nama utai jai ti ngasuh pelilih menua ba dalam Malaysia nyadika barang ti dipinta sereta diperebutka sekeda tuai kitai dulu suba. Sida udah mutus ati sereta sanggup segulai sejalai niri sereta negika menua bepelasarka prinsip idup enggau mati ba baruh nama Malaysia ti bedaulat. Baka nya mih kitai kemaya hari tu.

Nya alai, beserimbai enggau pengerami Hari Malaysia Ke-50 taun tu, kitai patut nyadika hari pengerami nya diintu enggau penuh semengat kaul nengah nama rayat Malaysia ti merdeka. 

Biar mih sehari aja, kitai patut sama bela ngelengkaka dulu bida ideologi politik entara pangan diri lalu sama-sama nuatka Jalur Gemilang baik nya ba rumah tauka ba pengerami ngintu Hari Malaysia.

Tema pengerami Hari Merdeka iya nya 'Malaysiaku Bedaulat: Tanah Tumpah iya Darahku' amat engekeman bendar enggau pengawa perintah ti terus nerenakka ukur pemanah ulah, ngangkatka semengat penyerakup kaul entara raban bansa sereta beterima kasihka utai ti udah diterima lebuh kitai udah merdeka. 

Enda baka menua bukai ti bisi penyarut, kitai agi ulih ngasaika pengidup nyadi rayat Malaysia ke ukai semina idup dalam pemaik sereta senang bulih pemakai tang mega ulih dani pagi meda matahari mirah manchar ari adap timur; ulih tinduk enggau nyenyak sereta disempulang enggau mimpi-mimpi manah. Nya alai kitai sama bela ngarapka ulih nyadika menua tu sebuah menua harmoni ti benama Malaysia. Ba Malaysia nadai utai enda ulih. Enti deka alah enda. Selamat Hari Bansa! Selamat Merdeka, Malaysia.