Napi rega minyak ti niki enggau chara pro-aktif

Isu rega minyak petrol RON95 enggau disel ke baru udah niki 20 sen seliter bisi bendar meri empas ngagai perspektif pengidup rayat kelebih agi sida ke ba raban kelas jelan penatai pemisi enggau ke baruh. Semina orang ke sut aja ke madah isu minyak ti niki nya nadai mai nama-nama ngagai pengidup sida. Nya kira ke ngemulaka ati diri. Sigi bisi sida ke baka tu; uji peda komen sida ba facebook. Aku ke bendar lembau deka bekenangka pekara senentang rega minyak tu tang munyi ku sekeda orang nyau enda ulih ke enda, mau enda mau bejaku ga ngenataika buah runding senentang isu tu.

Enti diperatika enda ngena untak tauka runding, minyak ti niki 20 sen nya sigi mih mimit. Is semina 20sen aja nih, mensa nya! Ku sekeda bala iban. Tang 20 sen ari nama? Uji padah ke aku. Betambah 20 sen reti nya iya nambah ba tiap-tiap liter minyak – sebedau niki RM1.90 tang diatu nyadi RM2.10.  Dini bisi orang ke empu kerita; indah iya ke bisi motosikal kapchai ngisi minyak seliter aja ninting kali ke stesyen minyak.

Minyak dikira niki lebih 10 persin; reti nya tiap-tiap kali kitai ngisi minyak kerita enggau RM10 dia kitai patut nambah RM1 lalu enti RM30 kurang lebih RM3. Enti dalam sebulan guna minyak kitai nya RM200; lebuh ke udah niki tu kitai patut nambah RM20. Nya baru ngira rega minyak wai, empai ngira rega barang enggau servis. Bula madah barang enggau servis enda niki rega; munyi ku sempama jaku tuai – nadai kala ninga baya nulak bangkai, manuk nulak jagung. Selama jaga tu nama rega minyak niki lalu senurut mih rega barang niki.

Nya mih kebuah mensia mayuh kelebih agi kitai ke jelan penatai pemisi sereta bala ke begaji mit sereta sida ke nadai meruan gaji serebana mutap ketegal pekara tu. Taja pia, beserebana mutap nadai tentu mantu kitai rayat biasa tu. Nadai pengujung serebana kitai nya. Nadai kini-kini. Orang ke pandai bisi meri sadang penemu madahka bisi dua jalai dikena napi isu tu; keterubah nya nguji enggau naka pengelengkas nambahka lubang penatai pemisi kitai lalu iya ke kedua nya ngurangka kos pengidup kitai.

Ba sadang ti keterubah nya, sida ngasuh kitai ngangkatka prestasi kereja enggau produktiviti. Ambika banding, enti kitai nya pedagang mit tauka rumpas, suba kitai nyual ruti canai 50 iti; diatu kitai patut nambahka nya ngagai 70 iti. Tauka tanka 50 iti nya tang gaga mipau agi ari selama (hahaha...tu bedosa tuai; ukai utai ti tau ke chunto). Enti kitai gawa nyadi kuli (kuli king ku orang kelia), lebuh malam hari kitai kereja nyadi atenden ba pam minyak tauka sida ke bisi manah nyawa tau nyadi penyanyi sambil ba kelab malam.  Nya langkah rapat ti keterubah.

Nangkan tu nya langkah rapat ti kedua iya nya nengah chara ngurangka kos; bekelimat ku jaku Iban klasik. Anang rua enggau belanja. Ambika banding, enti ngelama tu kitai suah kediri nurun gawa tang udah tu ila kitai tau bekunsi kerita enggau bala tawing kitai tauka ngena kereban pengangkut rama baka bas tauka van siwa nyengkaum van sapu mih nya. Enti ke gerija ti semak rumah kitai, manah agi ngena ensikal tauka bejalai kaki. Chara nya mai pemanah ngagai pengerai tubuh kitai!. Enti dulu suba meli surat berita tang udah tu ila tau enda ibuh agi kelebih agi surat berita ke semina mantai penyai orang tauka berita negatif aja. Manah agi ke librari laban dia kenu ku jaku orang tuai gedung penemu lalu sigi bisi surat berita disediaka dia tauka macha surat berita ke bisi disediaka ba opis diri empu! Kapa mansau duit meli surat berita, wai?

Nya ney, dua langkah rapat pro-aktif dikena kitai mayuh napi kos ngidupka diri – nambahka lubang penatai pemisi enggau ngurangka kos idup. Bah katika chara kitai bejalaika langkah rapat tu dih? Lebuh rega minyak niki dalam taun 2006 suba, Sapit Menteri Besai (diatu udah niki pangkat) madahka chara ke engkeman dikena mutarka penanggul tu  iya nya – UBAH GAYA IDUP.

Nama pemula. Sigi amat kitai aruh iya patut ngubah gaya idup dikena ‘survival’ ba dunyi ti mayuh penguji tu. Tang kitai mega patut bisi orang ke chunto munyi ku sulu jaku ‘kepimpinan melalui teladan’. Enti sida ke tuai ke ngulu kitai megai menua enda sanggup betekis, bekelimat baka ni kati kitai rayat selama tu ulih ngubah gaya idup? Tu semina baka kepayang ngadaka dilah, mulut nyebut tang patung enda nyaut. Sida patut sanggup ninggalka ‘istana meligai’ sida  enggau bil utiliti ke nyau datai juta ringgit nya; mentin diri ari ngena kerita ke mar sereta mutung mayuh macham elawin awakka sama bela ngasaika penusah ti ditapi mensia mayuh. Sida mega patut sanggup ngajar bala bini anak sida ngambika enda rua enggau belanja, enda ngabiska reta menua. Ubah mih gaya idup kitai, wai!  Enti deka alah enda, enti enggai bisi tau mih nadai!