Asal Penatai Musik Dangdut

Panyun Jaku

Kemaya hari tu mayuh macham genre musik ulih didinga kitai baik nya nengah radio, televisyen, mp3, youtube tauka vcd. Kitai mega ulih milih genre lagu setipak enggau pengasai ati kitai empu. Sekali tu aku deka bekunsi penemu sereta ngusai sebengkah genre musik ke mega dikerindu sekeda ari raban bansa Iban sereta udah nyerap masuk dalam lagu Iban, iya nya musik dangdut.

Asal penatai

Dangdut nya siti ari genre seni musik ti majak mansang di Indonesia. Bentuk musik ini bepun ari musik Melayu dalam taun 1940-an. Dalam evolusyen nuju tukuh kontemporer kemaya hari masuk mih biuh musik India (kelebih agi kereban musik ke benama tabla) enggau ari Arab. Ubah  alur politik Indonesia maya pengujung taun 1960-an muka peluang tama kuing musik barat ke kuat disempulang enggau penatai kereban musik baka gitar karan sereta mega chara musik tu dipasarka. Kenyau ari taun 1970-an dangdut kiraka tau dikumbai udah tuai ari sukut tukuh iya ke kontemporer. Ketegal ti dikira musik tebilang, dangdut balat bendar nerima kuing tukuh musik bukai, berengkah ari keronchong, langgam, degung, gambus, rock, pop, sereta mega house music.

Lebuh besebutka nama "dangdut" iya tu onomatope ari bunyi kereban musik ti dikumbai tabla (dalam dunya dangdut disebut gendang aja) ke endang lain ari kereban musik bukai sereta bebunyi dang enggau ndut. Nama tu ke bendar nguji leka jaku sindir ti bisi disebut dalam sebuah artikel majalah pun taun 1970-an dikena sida ngela tukuh musik melayu ti tebilang amat ba raban bansa Melayu kelas pengereja pengawa maya nya suba.

Sekeda penyanyi ke kala didinga aku lagu sida ari radio enggau kaset nya baka sida Rhoma Irama, Elvy Sukaesih, Mukhsin Alatas, Reynold Panggabean, Camelia Malik enggau Inul Daratista. Pemansang musik dangdut di Indonesia tau dibagi ngagai tiga raban kronologis, setipak enggau pemansang musik dangdut; iya pra 1970an, 1970an enggau paska 1970an.

Dangdut dalam budaya kontemporer Indonesia

Lebuh dilaguka Rhoma Irama, dangdut digaga iya nyadika kereban dikena iya ngerembaika pengarap Islam. Tu terang bendar diperatika ari lirik-lirik tauka leka lagu ti ditengkebangka iya empu. Pekara tu mih ngujungka bisi siti polemik besai ngegarka  budaya bansa di Indonesia dalam taun 2003 ketegal protes gaya panggung penyanyi dangdut ari Jawa Timur, Inul Daratista, besereta enggau gaya iya nguyangka punggung lebuh belagu. Mayuh rayat Indonesia madahka gaya penyanyi tu tau bendar "ngerusakka moral".

Sebedau nya, isu dangdut mega udah kala ditalatka mensia mayuh ngujungka ba sekeda endur enda tau ditumbuhka panggung dangdut lebuh pengerami Sekaten di Yogyakarta. Kelikuh pasal pekara tu bisi baru ketegal gaya panggung penyanyi indu ke dipeda kelalu "tebuka"  sereta betikas baruh, ngujungka iya enda engkeman enggau misyen Sekaten ti dikira pengerami dikena ngemesaika pengarap.

Dangdut nitihka penemu mayuh endang dikira musik ti ulih mai aspirasyen ba raban bansa komuniti kelas baruh bepelasarka gaya iya ke jelan dipeda. Biuh ti nyelai baka tu ulih diperatika ari leka lagu sereta pemansang lagu tu. Gaya iya dikenataika ba panggau  ti sensasional mega sekeda ari biuh-biuh lagu tu.

Musik dangdut ti tebilang nya mega diparit sekeda parti politik nengah media massa. Isu dangdut nyadika kereban alat politik lalu iya balat bendar nyata dikena maya Basofi Sudirman, ke dikira nyadi fungsionaris Golkar, belagu lagu dangdut.

Taja pan dangdut bisi dikaitka enggau raban komuniti kelas baruh ke miskin, iya ukai madahka dangdut nya semina dikerinduka sida ari kelas baruh aja. Ninting kali bisi pengerami pemerindang, dangdut endang sebengkah ari program ti ulih narit penatai mayuh temuai. Panggung dangdut ulih dipeda ba mayuh bengkah endur. Palan pemerindang ati enggau diskotek ba nengeri sereta pasar besai ke endang disediaka tuju tu mutar lagu-lagu dangdut. Baka nya mega stesyen radio ti ngela diri  "radio dangdut" mayuh ditumbuh ba pasar-pasar besai.

Kaul enggau musik bukai

Dangdut endang elastik. Nya alai iya ulih napi sereta marit tukuh musik bukai ngambika nitih enggi iya. Lagu-lagu barat ti tebilang dalam taun 1960-an enggau 1970-an mayuh bendar udah didangdutka. Genre musik gambus enngau kasidah ujung-ujung nyau anyut dalam alur chara bemusik dangdut. Hal ti sama nyadi mega ba musik tarling ari Cirebon ngujungka agi bisi nyentuk ke sehari tu musik ti udah bechampur-baur ke dikumbai musik tarlingdut.

Musik rock, pop, disko, house beridup manah lebuh dipegulaika dalam musik dangdut. Baka nya mega enggau musik-musik ari pelilih menua baka jaipongan, degung, tarling, keronchong, langgam Jawa (dikumbai sebengkah musik champur sari ti benama congdut), tauka zapin.

Musik dangdut mudah bendar nerima elemen 'luar'  baka lagu-lagu ari film ala Bollywood enggau lagu-lagu latin. Kopi Dangdut, ambika banding, lagu ti diambibali ari lagu ti tebilang ari Venezuela.

Pemansang lagu dangdut

Taja pan lagu-lagu dangdut ulih nerima mayuh macham elemen musik bukai enggau mudah, tang pemansang kemayuh ari lagu dangdut agi tau dikumbai agi balat konservatif. Ngagai orang ke landik pasal musik tentu nemu; agi mayuh lagu dangdut ditusun siti ari lapan munyi 4/4. Jarang bendar bisi lagu dangdut ke bemunyi tiun iya 3/4, semadi mih baka lagu-lagu Melayu Deli (ambika chunto: Burung Nuri). Lagu dangdut mega miskin ari improvisasyen, baik nya ari sukut melodi tauka harmoni. Lebuh dijadika musik dikena betanda, dangdut balat ngandalka bunyi tabla enggau sinkop.

Intro ulih mega vokal aja nadai musik tauka semina mainka suling. Ke bukai nya semina gitar tauka mandolin. Pemanjai intro ulih datai ba melodi ke lapan. Entelian keterubah ditusun ari melodi ke lapan, baik nya bisi betandu tauka nadai. Enti sema bisi betandu, ulih disela enggau sebaris main jeda. Ba tu suah agi bisi beleka (bisi lirik) senentang isi lagu, situasyen ti ditapi penyanyi.

Lagu dangdut standard nadai ngembuan refrain, tang bisi munyi melodi ti bebida ari keterubah. Sebedau  masuk ngagai entelian kedua suah agi bisi dua kali delapan birama jeda ti nadai beleka tauka lirik. Entelian kedua suah agi panjai munyi sereta disela siti baris jeda nadai beleka. Ba pengujung entelian kedua kadang-kadang bisi kod sepemanjai empat birama. Lirik entelian kedua suah agi ngembuan isi konsekuens ari situasyen ti digambarka ba entelian keterubah tauka langkah ke diambi penyanyi dikena iya nyaut situasyen nya.

Udah tembu bagi kedua, lagu ditandu enggau penuh ari pun nyentuk ke ujung. Lagu dangdut  bepengujung enggau entelian ti keterubah. Jarang bendar ninga lagu dangdut bepengujung enggau fade away.'

Lagu Dangdut Iban

Kati bisi lagu Iban ke ngembuan rentak dangdut? Nama penadai; sigi bisi. Semina nadai udah bisi dokumen ti nyerita senentang pemansang musik genre tu dalam lagu Iban. Tu mih pekara ti tau disidi sereta dipansik sida ke bisi pengerindu senentang pemansang genre musik dangdut Iban baka sida ke benung belajar ba palan pelajar tinggi tauka baka pengarang surat berita.

Naka ke ditemu aku sigi mayuh mega raban bala penyanyi Iban ke bisi nyada lagu Iban nengah rentak dangdut. Uji peratika rintai sekeda ke ditemu aku ditu;

No	Nama Penyanyi	Nama Lagu
1	Sijah	Pengerindu nyau bekulat
2	Mr. Os	Dangdut rumah panjai
3	Diana Nini	Bonnie
4	M Bujoi	Dangdut dara lawa
5	Eddie Kuing	Dangdut lelingai
6	Timothy	Indu menaul lemai
7	Ranee Paat	Tua semina bepangan