Ngepunka randau dalam Pengelandik Bejaku

Panyun jaku

Bejaku tu siti ari pengelandik ti bisi diajar sereta dipelajar ba sekula ba semua mata pelajar jaku nyengkaum pelajar jaku Iban. Kitai selalu ngumbai jaku ke dikena kitai besehari-sehari di rumah enda ibuh dipelajarka agi laban udah ditemu sereta dikena kitai kenyau ari ada sema ke jaku. Nya penemu ti salah. Enti baka nya nadai ibuh mih bala anak China belajarka jaku Mandarin, anak Tambi enda ibuh belajarka jaku Tamil lalu pia mega orang Melayu. Pia mega, lebuh peresa UPSR, PMR enggau SPM ukai semua nembiak China bulih A ba keretas jaku Mandarin, nembiak Tambi ba keretas jaku Tamil sereta nembiak Melayu ba keretas Bahasa Malaysia. 

Nama pengurang iya enggau jaku Iban dih? Agi mayuh apai indai bansa Iban baik nya ke bisi ngembuan pelajar tinggi, pelajar setengan tauka nadai ke nadai pelajar nganggapka pengawa belajarka jaku Iban nya nadai guna, muai awak sereta nadai mai penguntung. Enda ibuh mega sida apai indai ke endang nadai besekula; bah kati dih runding sida apai indai ke besekula ti ngembuan runding ti baka nya? 

Tu semua runding mitos ukai fakta; ukai bepelasarka evidens enggau data. Indah sekeda pengajar bansa Iban mega ngembuan runding ti baka nya. Iya ti balat ngenyinuka ati nya penemu ti sama dibantaika pengajar ke ngajar jaku Iban. Chis! Baka ni jaku Iban ulih ngerembai ba bansa diri empu, jauh pawie enti deka bejakuka ngerembaika jaku nya ngagai bansa bukai.

Pemesai guna 

  

Pengelandik ngepunka randau nya pengelandik ti patut dikemisika siku-siku lebuh nampil orang berandau sereta dikena neruska kaul. Pengelandik tu patut dikembuanka orang ke deka nyadi tuai ke bisi ati deka ngena kuasa personal, raban politik ke deka minta sukung undi, tukang jual ke deka narit ati pemeli, raban dagang ke deka ngepunka kaul dagang tauka individu ke endang bisi pengerindu deka bekelala enggau orang bukai.

Uji peratika enti sema nuan bisi dikangau ngabang ngagai sebengkah pengerami lalu nadai siku orang dia dikelalaka nuan. Dikena muai awak ke sengian, nuan nguji nanya orang ke  di sepiak nuan. Baka ni nuan deka ngepunka randau? Tanya "Nama gaga?" tau dikiraka enda tentu engkeman. Pia mega enti sema nuan nanya, "Nama runding aya senentang pengawa politik?" baka ke kelalu formal sereta drastik. Bah, baka ni chara ti pengabis badas dikena ngempunka randau? 

Ngepunka randau enggau orang ke enda dikelalaka kitai ukai sebengkah pekara ti mar dikereja enti kitai nemu chara. 

Keterubah,  tentuka orang ke deka enggau kitai berandau nya ngembuan gaya ti tebuka lalu mudah nampil randau. Kitai ulih meratika gaya iya ari mesej nonverbal ke ditunjukka iya. Sida udah suah agi mudah tuchum, selangkuh tubuh baka jari enggau kaki dalam gaya tebuka. Sepengudah nuan nentuka gaya orang nya, dia langkah rapat ti entudika nya tuchum, ngepunka kontak mata lalu ditangkanka enggau pun randau. Dikena ngepunka randau, kitai mesti milih mesej "Pemuka Pintu" kitai. 

Dikena muka pintu randau, kitai ulih milih tiga topik ti seruran nyadika buah kenang orany iya nya:

• situasyen
• orang bukai
• diri empu

Dikena ngepunka randau, kitai tau milih tiga chara ti suah dikena iya nya:

• Betanya
• Meri penemu
• Madahka fakta

Situasyen

 

Ngepunka randau enggau pekara tentang situasyen nya suah iya mudah agi enti dibanding enggau topik-topik bukai. Kebuah pia, laban iya enda nangika orang ke enggau berandau sereta ulih mudah ngepunka randau. 

Dikena ngepunka topik tu mudah amat. Kitai semina patut meda pekara ti ngelingi kitai lalu nanya pekara tauka mantaika sesebengkah pekara ti narit ati kitai enggau orang bukai. Ambika  chunto baka ti dirintaika di baruh tu: 

Nuan benung nganti bas ba sebuah palan penganti bas. Ba sepiak nuan bisi sekeda orang bukai ke sama bela benung nganti bas. Nuan ulih ngepunka randau enggau chara tanya, "Pukul berapa bas tu datai?" tauka, "Bas tu selalu launka?", tauka tanya ti dikerinduka nuan maya nuan agi mit suba, "Deriba tu mai bas ke ngaga bas?". Tauka nuan ulih mega madahka fakta, chunto iya, "Bas tu dipelabaka 5 jam da agi baru datai!" tauka "Bas tu selalu laun datailah!" enggau pekara bukai. 

Orang bukai

 

Mayuh orang rindu meri reaksyen ngagai tanya ti bisi kaul enggau diri sida. Sebedau nuan ngepunka randau, peratika pekara ti benung digaga orang nya, tauka nama gari ti dikena tauka bup ti benung dibacha enggau pekara bukai. Ambika banding, "Nuan baka ke bisi utai digiga. Ulih aku nulung?", tauka "Tanya ti dituju nuan ngagai pengelicha nya manah amat" tauka "Pendiau nuan nyau deka baka pendiau tawing aku" enggau ke bukai. 

Pemuka pintu ti pengabis manah nya mesej ti nunjukka nuan nya bisi pengerindu deka berandau. Ambika banding, "Aku selalu meda nuan lalu bisi ati deka bekelala enggau nuan" tauka "Aku rinduka  chara nuan nya alai aku datai deka betunga mua enggau nuan". Pemuka tu semitan agi enti dibanding enggau pemuka bukai ti enda mandangka pengerindu orang ke nanya. 

Diri empu  

Topik bekait enggau diri empu ukai chara ti pengabis manah dikena ngepunka randau. Kebuah pia, laban orang bukai seruran iya balat agi rindu bejaku senentang sida empu bebanding enggau engkitai. Taja pia, kitai ulih meri penerang diri enti sida bisi mandangka diri rindu lebuh betanyaka pekara senentang diri kitai.

Nengkebang tanya

 

Pengelati nuan dalam kaul mayuh bepanggai ba chara nuan nengkebangka tanya dikena muka randau. Tanya ti digaga enggau manah ulih narit ati orang lalu tanya ti enda patut ditanya deka ngujungka orang bukai enda rindu. Tanya ti enda digaga enggau manah deka ngasuh orang ke nanya nya ngasaika diri iya baka ke benung nasat. Bisi dua tukuh tanya iya nya tanya tetutup tanya tebuka. 

Tanya tetutup

 

Tanya tetutup nya bansa tanya ti nanya amat salah tauka mayuh macham pilih saut. Ambika chunto, "Nuan datai ari ni?", "Kitai deka bekejang pukul 4 ke pukul 5?"Amaika nuan enggai datai?" enggau ke bukai.

Tanya tetutup beguna maya deka meransang orang bukai meri penenrang senentang diri sida enggau spesifik agi. Tanya baka tu nya tanya ti dikerinduka raban bala loyar dikena sida ngulihka penerang ti lenak tauka spesifik senentang sesebengkah kes kot. Taja pia dalam konteks kaul besehari-sehari, enti tanya baka tu enda badu-badu ditanya, nyangka randau nya pan enda narit ati sereta deras ngasuh orang leju. Peninga deka ngasaika diri sida baka ke ditasat pegawai polis. 

Tanya tebuka

 

Tanya tebuka nya baka tanya esei ke begunaka saut ti lebih ari dua tiga leka jaku. Tanya baka tu ukai semina minta peninga meri penerang tang mega mandangka orang ke nanya nya rindu enggau pekara ti udah dikejakuka peninga. Tanya ti bansa tu suah agi bepun ari leka jaku "Lapa" enggau "Baka ni". Siti sesi randau  seruran agi bepun enggau siti tauka dua tanya tetutup, udah nya baru ditangkan enggau bansa tanya tebuka. 

Penyilap lebuh ngaga tanya

 

Di entara penyilap ke suah digaga iya nya:

1. Nanya tanya ti kelalu tebuka. Chunto, "Baka ni pengidup nuan?" tauka "Nama cherita?".

2. Bepun enggau tanya ti mar disaut. Chunto, "Nama penemu nuan senentang lumba senyata nuklear?".

3. Tanya ti betukuh kuing tuju. Chunto, "Nuan enda deka ngirupka?" tauka, "Nuan sigi enda rindu ke iya, amai enda?".

4. Madahka diri enda besetuju sebedau minta penerang.

5. Enda nemu nama utai ti patut ditanya. 

Majakka randau  

Dikena nerus lalu meransangka randau, chara nangka tu selalu dikena:

1. Jaku kunchi

2. Jaku penyambut

3. Nganggutka pala

4. Penggalak minima 

Jaku kunchi

 

Lebuh orang nya bejaku, iya deka ngenataika perecha penerang senentang iya empu. Perecha penerang tu penerang ti pechuma dikeulihka nuan lalu ulih dikena neruska randau. Chara iya nya nengah chara meri komen lalu betanya saut. Penerang ti diberi ulih dikena nuan nentuka sekda jaku kunci ti ulih dikena nyambungka randu. Ambika banding enti orang nya madah ngagai nuan, "Aku nembiak UPM" jaku kunch ti ulih ari penenrang nya, iya nya "nembiak" enggau "UPM". Enti nuan milih jaku kunchi "nembiak" tanya ti patut iya nya, "Nama kus ti diambi nuan?". Enti jaku kunchi nya "UPM" dipilih, nuan engka nanya munyi tu, "UPM nya dini dih?". 

Jaku penyambut

 

Jaku penyambut diguna maya deka meransangka orang ke ngerandau nya meransang iya ke dikerandau nya nerangka nama ke udah diterang sebedau nya. Antara jaku penyambut ti suah dikena nya "Jadi?", "Reti nya?", "Chunto?", "Dah nya?", enggau ti bukai. Dalam jaku English, jaku ke selalu dikena nya baka, "meaning?", "For example?", "Therefore?", "Which means?", "Therefore" enggau ti bukai. Jaku penyambut mesti ditangkan enggau situasyen ti sengian sekejap dikena meri tanda ngagai orang ke ngepunka randau nya nerangka pekara ti udah disebut sebedau nya. 

Nganggutka pala

 

Nganggutka pala nya kelai universal ti mai reti besetuju. Dalam konteks tu nganggutka pala mai reti orang ke mending nya agi enggau orang ke ngerandauka iya. Teknik tu ulih ngasil situasyen positif lalu meri peransang ngagai orang ke ngerandau nya tadi rindu deka neruska jaku iya. 

Pengalak Minima

 

Pengalak minima nya reti iya nguna jaku pandak  sereta ngelansa dikena meransang orang ke ngerandau nya tadi neruska randau iya. Ambika banding, "Ya, ya", “Pia”, “Au pia”, “Ya mih”, "Ha a", "Ooo", enggau ti bukai. Dalam jaku English, jaku ke selalu dikena nya baka, "I see", "Really?", "Yes, yes", "Yeah, yeah",  enggau ti bukai.

Penutup

Nadai nyadika penyalah enti kitai nadai belajar nengah chara formal baka ni deka ngepunka randau. Kitai agi ulih ngena peneleba kitai besehari-sehari lebuh nampil orang bukai berandau, tang chara baka tu lungat amat laban kadan-kadang kitai napi penyilap. Kebuah pia kitai bepanggai balat ba chara ti betul enggau salah lebuh berandau. Nya alai kadang-kadang orang bukai enda ngemuningka jaku kitai. Ngagai kitai ke agi di bangku sekula patut bendar ngena peluang ti bisi maya proses belajar enggau ngajar belajarka chara ngepunka randau enggau betul.