Resolusyen dalam Simposium Iban Ke-Enam

Empai lama ti udah, Dayak Cultural Foundation bisi ngaturka Simposium Iban ke-6 di Sibu. Simposium nya aum ke endur bala orang ke pandai sereta ngembuan pengelandik ba sekeda penemu dikangau betemu sereta bejuraika sekeda pekara ti udah diperambu. Ba pengujung simposium suah agi semua penemu ti udah dipejuraika nya tadi deka disimpulka tauka diraup sereta digaga nyadi resolusyen ngambika ulih diperundingka chara mutarka pengawa nya tadi.

Resolusyen nya pemutus penemu ti rasmi ke udah disetujuka raban ke baum dalam simposium nya, tauka pekara ti udah ditetapka deka dikereja dudi hari. 

Maya Simposium Iban ke-6 ti diatur Dayak Cultural Foundation (DCF) di Sibu, bedau lama tu tadi bisi enam resolusyen bisi udah dibantai ba pengujung aum nya.

Nitihka penerang ari surat berita Utusan Borneo(August 28, 2013), entara sekeda resolusyen nya baka ti dirintaika di baruh tu. Amat nya enam resolusyen tang dirintaika ngagai lapan pekara ngambika mudah kitai ke raban pemacha meratika isi pekara resolusyen tu. 

1.      minta perintah menua nyerenihka baru Kod Tanah Sarawak kediatu ngambika ulih ngemendarka pengawa nyual tanah NCR ngena chara bayar nitihka adat ‘tungkus asi’ tauka chara bebeli ngena mata duit antara raban bansa Dayak nya empu.

2.      minta perintah besai meri ungkup ke besai agi ngagai sekula di menua pesisir, ngungkupka mayuh agi peluang tauka netapka nengah kuota ungkup nembiak Iban nampung pelajar ba institut pelajar tinggi baka ba Maktab Rendah Sains Mara (MRSM) enggau UiTM. Pia mega nambahka ungkup kuota ke tetap bekaul enggau pemeri sekulasip ari MARA enggau nambahka penyampau sekulasip ngagai nembiak bansa Iban.

3.      minta Opis Adat Istiadat (MAIS) mansik semua undang-undang adat ke enda ulih nyaup ngemansangka komumiti Iban.

4.      minta Opis Menteri Pemansang Rama bekerejasama enggau Direktor RTM beratika pengereja pengawa di stesyen radio Servis Iban dilatih ngena Jaku Iban ke betul lebuh nabur berita sida iya. 

5.      minta Menteri KPS (Pemansang Rama) ngemeratka isi program ba bagi RTM Iban ba pekara nyadung pemadah, nerangka polisi perintah, ngangkat sereta nyaga adat Iban enggau ungkup alai masang lagu muzik popular Dayak.

6.      minta perintah besai nengah Opis Menteri Penyambung enggau Multimedia meri ungkup ngagai Servis RTM Iban sereta nyengkaum pegawai bebansa Iban dibungkur nyadi tukang interbiu lebuh ngambi pengereja pengawa ba servis nya.

7.      minta perintah ngaga siti pelin besai bekaul enggau pekara pemansang ke disadung ngagai menua pesisir ngambika komuniti di sitak nya ulih bekunsi penguntung dalam pemansang ekonomi. 

8.      minta Perintah menua enggau perintah besai meri mayuh agi ungkup pengawa dagang ngagai raban bansa Dayak. Ambika chunto, baka ngaga rumah (kontraktor), diberi ungkup ke tetap ngagai kontraktor Dayak lalu ulih ditinda antara raban bansa Dayak nya empu.

Simposium ke diatur kena 22 nyentuk ke 25 Ogos tu tadi digulu urung 470 iku orang  nyengkaum ari raban menteri enggau menteri muda Dayak, pengereja pengawa opis perintah, tuai-tuai raban bansa, orang dagang, kaban politik enggau kaban akademik. 

Simpul Penemu

Laban ke nadai diletakka timpuh resolusyen tu patut dipejalaika, raban bansa Iban dipelabaka sama bela ngarapka baka sempama jaku tuai nganti engkabang lebat bebuah, ngarapka pekara tu ulih dipejalaika baka ke udah diperambu sereta dipejuraika sida tuai-tuai orang Iban ke pandai di chunggai tunjuk jari. Kitai rayat selama semina baka telu di tapa, enti dipichit tentu pechah laban orang bukai ke megai ulu kitai semina megai mata.