Chit di tisi parit enda dipeduli, tikus di baruh rumah enda diperati

Berita bedau lama ti udah madahka mayuh chit bisi ditemu beranak betelesak ba hospital Universiti Sains Malaysia di Kubang Kerian, Kelantan. Anang  nyalahka chit enti sema chit nyerang lalu ngalahka sereta bekuasa ba hospital Universiti Sains Malaysia di Kubang Kerian, Kelantan tauka ba dini-dini endur ke bisi penanggul ketegal chit.

Minta ampun mih enti asai ati tu deka nyebut, nyalahka chit sama mih baka ke nyalahka Petara laban Petara nya mih ke ngaga nempa chit baka Petara ke ngaga semua utai ke bisi ba bumi tu.

Enti kitai bisi untak, kitai tentu nyalahka diri empu. Kitai mih ngasuh rampa menua sereta rampa ke ngelingi kitai kamah, ukai orang bukai. Kitai mih ke enda nemu utai, enda nemu adat enggau ukum rampa menua. Kitai nya mega mih ke ngelanggar adat enggau atur rampa menua.

Lebuh kitai ngelanggar adat rampa menua enggau utai ti udah segenda nyadi, adat ke ditengkebangka Tuhan nya mih ke ngasuh rampa menua nya deka malas ngelaban ulah kitai. Cherita chit ti bisi ditaburka media massa kemaya hari tu nya cherita mensia ke ngelanggar adat enggau atur rampa menua.

Ari aki ini pan kitai sigi udah idup begulai enggau sida chit sereta enggau mayuh macham utai idup ti digaga Petara. Nuan, dek, kua enggau aku bela ada, besai sereta tuai enggau chit. Enda patut kitai bisi berasaika penanggul chit tu penanggul luar ari selama ke enda ulih diputarka.

Utai ti ngasuh chit bekuasa nya pan ketegal ulah kitai mega. Dulu suba kitai nginang mayau. Kitai meri mayau kitai makai semadi aja; enti bisi lauk baru makai, enti nadai peda nadai. Kitai enda ngandaika amat mayau kitai. Lebuh  malam maya kitai tinduk, mayau kitai pansut ngiga sereta nangkap chit. Chit pan ukai nya mapap, enti bisi mayau rari mih iya.

Kebuah Petara nempa chit enggau mayau

 
Baka belayan padi lebat bebuah, tiap utai ti nyadi tentu bisi kebuah. Pemintar Petara nempa ngaga chit sereta mayau sigi endang ukai baruh kuasa kitai mensia. Kemaya hari tu mayuh orang nupi mayau, tang ga tekalih ulah. Orang ke empu mayau makai pemakai menua, mayau makai pemakai import. Lebuh mayau bepansa enggau chit, ukai chit ke rari tang mayau. Nya siti hal.

Udah nya ular. Petara nempa ular sereta ngasuh sebansa ular makai chit. Enti kitai ke diau besai di menua tentu kitai bisi maya tepedaka ular chit ba atas perabung tauka ngelingi rumah.

Ular chit enda bisa, tang manah dikena ngurangka chit. Kemaya hari tu mayuh kebun bedandang besai baka estet bisi nupi ular chit dikena nyaga chit ari makai buah sawit. Tang agi mega mayuh orang kitai ke mapap sereta enda nemu utai. Semua ular, enda ngira bisa tauka enda, dibunuh memagang.

Udah nya burung antu enggau burung lang. Iya pan makai chit. Enti di menua bisi mih kitai tepedaka ba sangkar manuk tau tak bisi burung antu numpang diri tinduk maya siang. Maya malam, burung antu pansut begigaka chit.

Tang lebuh orang di menua diberi senapang patah maya jeman bisi komunis kelia, abis burung antu enggau lang ditimbak sida. Bisi sekeda nya arap sereta ngumbai bunyi burung antu mai kelai bisi orang deka mati.

Enda chukup enggau nya, rachun indu utai, rachun rumput enggau sum kimia dikena ngerachun rampa menua lalu munuh semua jelu enggau utai idup ke nyadi munsuh chit. Chit pan mati mega, tang ga beranak betelesak enggau jampat.

Diatu ba umai di Kedah, chit mih ke bekuasa. Penanam padi takut amat ngagai chit ngujungka sekeda ari sida enda berani agi nyebut ‘chit’. Ku jaku kelaung sida chit nya digelar ‘orang malam’. Chis, naka-naka iya penakut sida ke chit!

Enti suba chit nyadi munsuh utai tanam, kemaya hari tu chit mega mai mayuh macham igi penyakit ti tau ngerampit mensia lalu naka ke diatu sigi nadai ubat sereta tau mai nyawa. Pusat Nyaga Penyakit Amerika Syarikat (CDC) bisi ngerintaika enda kurang ari 10 bansa penyakit ti dibai chit.

Penyakit kemi chit

Bulan Julai tu tadi, Sapit Menteri Pengerai, Datuk Seri Dr Hilmi Yahaya, madah ngagai Dewan Negara, bisi 2,262 kes penyakit kemi chit sereta 22 iku pemati bisi diripot ari bulan January nyentuk ngagai 6 July. Kes penyakit tu majak niki ari 1,976 dalam taun 2010 ngagai 2,268 dalam taun 2011 lalu 3,665 taun nyin kemari.

Ke bendar iya bisi mayuh chara kitai ulih mutar penanggul chit. Keterubah sekali kitai mesti ngelala nama jelu ke dikumbai chit, nyaga rampa alai diau lalu nemu menggal mit pasal chara nagang penatai chit. Nadai salah enti kita masang siti dua panjuk chit di rumah kitai. Ukai nya mar sereta enda tusah amat masang panjuk nya.

Tang ungkup ke iya kelama agi, kitai patut nemu, bebasa lalu idup nengah chara ti serasi agi enggau rampa segenda nyadi ti ditempa Tuhan.

Petara udah ngaga semua utai enggau betul sereta manah. Semina kitai ke enda peduli deka belajar tauka kitai mih ke endang kelalah, pengamah sereta nadai ngembuan tanggung pengawa. Enti sema baka nya, manah agi kitai ngalahka diri ngagai chit.