Mayuh ari beluh ba Letung Kumpang; banyak ari lemetak ba Tinting Kedang, nyampau ari lingkau genggam meranggang

Mayuh ari beluh ba Letung Kumpang, banyak ari lemetak ba Tinting Kedang, nyampau ari lingkau genggam meranggang nya dikena aku ngambarka penyampau mayuh orang Bangladesh tauka balat agi dikumbai Bangla ke datai tama ke menua kitai tu enggau enda beradat. Taja pia, sida tu enda mega tau dikumbai kampar laban kampar dalam jaku Iban nya reti iya orang ke datai jauh ari endur bukai ngiga pengidup lalu diau nyemilik orang ke ukai kaban belayan iya. 

Beribu-ribu iku pengereja pengawa orang Bangladesh ke tama enda beradat tu tama ngaku diri nyadi nembiak ke agi belajar tauka bisi mega sida ke madah diri nyadi temuai.

Aku enda alit meda pemayuh sida tu ba Kuala Lumpur, indah di Kuching pan kemaya hari tu udah mayuh bansa sida tu bejalai segau-segau lebuh ujung minggu. Nyangka nya mih kebuah mayuh restoran mamak di Kuching kemaya hari tu kelebih agi Restoran Bombay Masala nyau berebak di Kuching. 

Nyadi penatai sida tu nitihka siti artikel surat berita madahka sida tu dibantu institut pelajar tinggi ke enda betanggung pengawa beripai enggau sindiket bebaika orang luar tama enda beradat. Nitihka penerang ari surat berita, institut tu sanggup ngaga rekod penatai nembiak ti palsu ba kolej sida sereta nyediaka ripot pemansang tauka “progress reports” ke “nembiak” tu ngambika sida ulih ngidupka baru visa sida ba   Imigresyen Malaysia.

Sindiket tu balat agi mai raban Bangladeshi tu baruh nama nembiak sekula laban sida diberi visa entara dua ngagai enam bulan enti dibanding enggau temuai ke semina diberi timpuh sebulan. Ijensi pengereja pengawa enggau sindiket ke bebaika orang tama enda beradat ngecaj entara RM10,000 enggau RM12,000 dikena sida mai orang Bangladeshi tama ke menua tu nyadi nembiak sekula tauka temuai.

Sida mega nyediaka pengelicha ari kolej jaku nganti ba Padang Bilun Antarabansa Kuala Lumpur International ngambika ulih mantaika dokumen ti patut dikena ngakunka sida nya   “nembiak sekula” datai ke Malaysia laban deka belajarka jaku English. Udah pengereja pengawa  tu ninggalka padang bilun, dia iya deka dibai ngagai rumah ba Lempa Klang ti dikira likun sebedau iya dianjung ngagai kilang di Selangor, Johor tauka Perak. Din, “nembiak sekula” tu bekereja nyadi welder tauka kuli, begaji entara RM30 ngagai RM60 sehari bepanggai ba pengelandik sida.

Sindiket tu majak nyadi taja pan bisi atur pengawa neritka adat dipejalaika Opis Menteri Menua. Opis menteri tu endang nemu bisi institut enggau palan ti baka tu. Palan tu kala ditasat senentang penyampau nembiak ari menua luar ke mayuh tama dibai sida ke menua tu. Mayuh ari institut pelajar tinggi tu ba Lempa Klang. Nitihka penerang ari sapit menteri tu, syarat ngeluarka visa ungkup nembiak sekula enggau temuai diatu nyau diteritka agi ari selama. Kemaya hari tu, kolej enda ulih bulih terus visa maya datai di menua tu. Sida mesti nyuaka dokumen sebedau nembiak sekula nya datai tama ke menua tu. Tu dikena nentuka nembiak nya amat belajar lalu ukai datai gawa ditu. 

Opis menteri tu mega minta kolej nyediaka rekod penatai nembiak sereta chara baka ni atur tu diperatika institut tauka palan pelajar nya. Institut tauka palan ke ditemu ngelanggar atur tu deka dikena ukum ti terit. Naka kediatu, raban polis, imigresyen enggau rela benung bejalaika pengawa neritka adat nangkap orang ke tama enda beradat ke menua tu. Naka kediatu pengawa tu udah bisi mai pangka ti positif. 

Nitihka rekod bisi 2.6 million (The Star 3.11.13) iku orang ari menua luar ngerijista diri nyadi pengereja pengawa ba menua tu.