Pemujur berakup nengah jaku

Sekeda bida entara jaku Melayu Malaysia enggau jaku Melayu Indonesia iya nya asal penatai sesebengkah leka jaku ti bebida. Jaku Melayu Indonesia mayuh agi ngena leka jaku ti asal ari jaku Sanskrit tang jaku Melayu Malaysia asal penatai iya ari jaku Arab. Ambika banding, ideologi menua Indonesia diberi nama Pancasila, leka jaku asal ari jaku Sanskrit. Di Malaysia ideologi nya dikumbai Rukun Negara. Rukun asal iya ari leka jaku Arab.

Kedua-dua jaku Melayu Malaysia enggau jaku Indonesia nya sama dikategorika jaku Melayu. Semina jaku Melayu di Indonesia kuat agi datai ari jaku Sanskrit ketegal penuduk tamadun Jawa ti dipegai kuasa Hindu-Buddha ke balat bepelasarka jaku Sanskrit. Tang jaku Melayu ba Malaysia bepaksika Kesultanan Melayu di Melaka sereta balat agi dipegai kuasa Islam ngujungka jaku Arab nganti jaku Sanskrit nyadika jaku dikena ngusa penemu.

Nya mih pelasar pemansang jaku Melayu. Lebuh perintah Inggeris enggau Belanda magi pelilih menua Melayu nyadi dua iya nya Indonesia enggau Malaysia, dia jaku ba kedua-dua buah menua tu bela mansang ngati kediri. Nya alai mayuh leka jaku English dipasuk ke dalam jaku Melayu Malaysia, lalu istilah Belanda masuk ke jaku Melayu Indonesia. Nya alai istilah kantor, kamar enggau koran ke asal iya Belanda nyadi leka jaku dalam jaku Indonesia tang di Malaysia, iya ngena istilah pejabat, bilik enggau akhbar.

Enti sema dulu suba proses ngemansang pengarap Islam nadai nyadi di Indonesia, dia jaku Melayu entara kedua-dua menua tu deka jauh agi ari pangan diri. Jaku Indonesia deka balat agi ngena leka jaku Sanskrit lalu jaku Melayu Malaysia penuh enggau leka jaku Arab. Enti baka nya, dia jaku Indonesia enggau jaku Malaysia deka nyadi baka jaku Hindi enggau Urdu. Iya asal nya semina siti jaku aja. Lebuh perintah Moghul merintah India, mayuh istilah Parsi dipasuk ke dalam jaku Hindi ngujungka iya nyadi jaku Urdu. Kemaya hari tu jaku rasmi Pakistan iya nya jaku Urdu, ti penuh enggau istilah Parsi lalu Hindi nyadika jaku India, penuh enggau leka jaku Sanskrit.

Ngelama tu orang ke bejaku jaku Urdu enggau Hindi agi ulih meretika jaku pangan diri tang ujung-ujung hari nyau enda nemu jaku pangan diri. Nya alai nyangka jemah ila enda ngalitka ati enti sida udah enda nemu jaku pangan diri. Kelebih agi tulis kedua-dua jaku tu mega bebida. Urdu ngena tulis jawi Parsi lalu Hindi ngena tulis Devanagari.

Baka nya mega enggau jaku Indonesia enggau jaku Malaysia jemah ila deka bebida jauh ketegal bebida istilah lalu tu tau ngujungka orang ke bejaku nya enda mereti jaku pangan diri. Tu balat agi nyadi enti jaku Belanda balat nguasa jaku Indonesia lalu jaku English bekuasa ke atas jaku Malaysia sereta ditambah enggau bida ari sukut tulis.

Lebuh Indonesia bulih merdeka dalam taun 1945, tulis jaku Indonesia nya tulis rumi tang jaku Melayu di Malaya maya nya ngena tulis Jawi. Semina sepengudah tulihka merdeka baru perambu bisi diatur ngambika jaku Melayu mega ngena tulis rumi tang sepil rumi Melayu di Malaya bebida enggau jaku Indonesia. Nitihka rasmi iya jaku Melayu di Hindi Belanda nyadi jaku Indonesia kena 28 Oktober 1928 nengah Sumpah Pemuda.

Beserara

Jaku Melayu di Malaya nyadi jaku Malaysia kena 16 September 1963. Iya majak nyerara ari pangan diri ketegal sepil ke bebida. Nya alai, iya ke disebut jaku Melayu nya jaku Melayu di Thailand enggau Brunei ke ngena tulis jawi.

Singapura laban ke ari pun nya sebagi ari nengeri dalam Malaysia, nya alai iya mega ngena jaku Malaysia. Lebuh iya beserara ari Malaysia dalam taun 1965, jaku ke dikena din nya dikumbai jaku Melayu. Tang tulis iya ngena chara rumi jaku Malaysia.

Sepengudah Konfrontasyen iya nya maya perintah Presiden Suharto enggau Menteri Besai Tun Razak, dia seduai iya sama bela ngasaika kedua-dua jaku, jaku Malaysia enggau jaku Indonesia enda patut dilakka anyut baka apung balu laban iya tau majak nyeraraka diri jauh ari pangan.

Nya alai kena 16 August 1972, sepil kedua jaku tu pan disemakaka. Komitmen nyemakaka sepil tu mandangka kedua-dua jaku tu bisi ati deka disatuka. Nya alai sepil rumi disemakaka lalu dititihka jaku Melayu di Thailand, Singapura enggau Brunei ke meda Kuala Lumpur tu nyadika paksi jaku nya.

Jaku Indonesia ke balat ngemerat jaku Belanda sebedau tu pan nyau majak kurang di Indonesia lalu digantika enggau jaku English ke ngujungka jaku Indonesia pan lalu nitih jaku Malaysia iya ngambi istilah-istilah ke asal iya ari jaku Englis. Dominasi Amerika Syarikat ke atas Indonesia sereta pemansang teknologi pemadah nya ngujung kedua jaku Malaysia enggau Indonesia nya rapat agi.

Jaku Malaysia mega mayuh ngambi istilah jaku Indonesia ke asal iya ari Sanskrit baka leka jaku wisma, siswa enggau pustaka. Nama tempat di Malaysia mega bisi ke asal iya Sanskrit baka  Titiwangsa, Mahameru, Suria enggau Damansara. Istilah Sanskrit enggau Arab dampih amat enggau dilah jaku Melayu.

Jaku Malaysia mega enda sanggu ngambi leka jaku Indonesia ke asal iya ari Belanda baka  organisasi enggau prestasi.

Jemah ila pemujur jaku Malaysia bepanggai bendar ba penyerakup semua jaku Melayu baik nya enggau jaku Indonesia tauka jaku Melayu di Thailand, Singapura enggau Brunei. Munyi ku sulu jaku kedua-dua menua: Bersekutu Bertambah Mutu enggau Bhineka Tunggal Ika, dalam jaku Sanskrit mai reti Penyerakup dalam mayuh bengkah.

Endang enda ulih dikenda mega pemida di entara kedua-dua jaku tang langkah rapat seruran digiga ngambika kedua-dua jaku tu majak rapit enggau pangan diri. Nya mih juluk ati jaku kitai.