Napi Kos Daya Idup Ti Tinggi

Berapa kini gaji ti patut dikena napi daya idup di Malaysia? Tu mih ke nyadi penanggul ti pedis disaut kemaya hari tu taja pan bisi orang nerima gaji RM12,000 sebulan di Pulau Pinang. Tu ukai semaya pengidup ti lantang.

Caroline Wong, 34 nya siku kerani ke diau serumah enggau laki iya, iya nya siku menija bejual barang sama enggau siku anak indu seduai ke agi mit. Ninting ujung bulan, seduai nerima upah RM12,000 nyadi gaji bulan. Tang kemaya hari tu seduai ngasaika iya udah enda tentu chukup.

"Kami diatu dipejal makai ba rumah lalu enda ulih agi bebelika barang mar nyengkaum gari bejenama baka ti dulu suba," pia ku cherita Wong ngagai surat berita The Malaysian Insider.

Nitihka penemu Wong semua orang diatu dipejal bekelimat nengah chara ngurangka belanja enggau naka ulih dikena napi kos daya idup ti majak niki ninting hari.

Wong madahka, iya enggau laki iya dipejal mayar RM4,000 ke rumah enggau kerita, RM1,500 ke pemakai lalu RM1,500 nya kena nyaga, pemakai enggau tusu anak seduai iya.

Iya mega dipejal ngeluarka belanja RM750 kena mayar insurans enggau kad berubat sida sebilik; RM700 ke minyak; RM600 ke bil telefon, broadband enggau wifi; RM120 ke Astro; RM140 ke ai enggau karan; lalu RM110 kena mayar amah ti datai ngemas rumah seduai ninting minggu.

"RM500 laluh nya kami enda ulih enda simpan ninting bulan ungkup ke chukai jalai enggau insurans kerita. Bulan Mei lagi, kami dipejal ngeluarka belanja RM1500 sebulan da agi ungkup anak kedua kami ke ada maya nya ila," pia ku Wong.

Tu mih nasit ti diterima Wong sebilik ke diau ba Pulau Pinang, bandar raya ti pengabis mar kos daya idup di Malaysia. Semua tu diasaika Wong maya taun 2014 ti deka datai enda lama da agi.

Berengkah ari bulan January 2014, semua rayat Malaysia dipejal napi penguji baru dalam pengidup sida lebuh sekeda rega barang enggau servis deka niki.

Enggau status kesemua pulau dikumbai endur ti narit temuai datai, kos daya idup Wong sebilik jauh tinggi agi ari sida ke diau ba tempat bukai enda nyengkaum ba indu nengeri, Kuala Lumpur.

Tu mih asil pansik raban pengarang berita, The Malaysian Insider senentang kos daya idup ba serata menua tu. Pansik tu berengkah dipejalaika pun bulan Disember lalu mungkur menua Kuala Lumpur, Pulau Pinang, Johor Baru, Kuala Terengganu, Klang, Kuching enggau mega Alor Setar.

Pekara ti dipansik tu mungkur rega barang ti diguna ninting hari baka manuk, sayur baka sawi enggau chabi mansau, ikan, bayar sewa rumah enggau mega barang ke patut ke gaji minima dikena napi idup ti menyana.

Pansik tu berengkah dipejalaika lebuh nyau deka semak taun 2014, ke alai rayat semua deka napi bil tarif elektrik, tol, sewa bas sekula, bayar chukai enggau ti bukai. 

Enggau rega ti udah tinggi bebanding enggau penatai pemisi rayat, taun 2014 deka ngasuh sida balat agi ngasaika pemerat nama agi lebuh rega barang enggau servis deka ditikika.

Ba penemu Tuai Pemesai Eksekutif (CEO) Gerempung Penguna Bansa (Fomca), Datuk Paul Selvaraj madahka perintah ngembuan tanggung pengawa ngurangka impak tu.

"Rega barang ditentuka maya proses bejual beli lalu bepanggai ba penguna ngaturka belanja sida.

"Sigi tanggung perintah ngeminimaka impak nya ngagai penguna, tang taja pia ba sesetengah kes , iya mega tanggung pengawa individu," ku iya.

Enggau bayar sewa rumah sereta rega rumah ti tinggi lalu enggau rega barang ti diguna besehari-hari ke mar dia siku-siku individu begunaka gaji abis kurang iya RM4,000 sebulan enti sema sida diau ba sebelah pulau di Pulau Pinang.

Nya dikira pengabis tinggi enti dibanding enggau  nengeri-nengeri bukai di Malaysia. Kelimpah ari Pulau Pinang pasar industri Bintulu di Sarawak enggau Paka ba Terengganu.

Tang rega barang di Pulau Pinang jauh baruh agi enti sida diau ba tanah besai iya nya di Seberang Prai. Nyangka ketegal nya mih mayuh rayat Pulau Pinang diau ba tanah besai taja pan sida bekereja ba pulau.

Tu nyangka mega nyadi pun jalai dia penuh dedat ninting hari kelebih agi ba jematan Pulau Pinang lalu enggau ba feri ngujungka jematan kedua enda ulih enda digaga dikena nyambungka endur nya enggau pulau Mutiara nya.

Rega sekilo manuk ba pasar George Town nya RM9 enti dibanding enggau RM7.00 di Kuala Lumpur, RM6.50 di Klang.

Bayar sewa rumah mega tinggi di Pulau Pinang. Sebuah rumah teres seringkat tiga bilik di Tanjung To Kong disewa enggau penyampau RM1,000 sebulan. Taja pia bayar sewa baruh agi di Batu Kawan tauka Nibong Tebal; iya nya kira-kira RM500 sebulan.

Taja pan kos daya idup agi tau dikira baruh ba Kuala Terengganu, tang rega barang diguna besehari-sehari nya antara ti pengabis tinggi bebanding enggau nengeri-nengeri bukai ba Semenanjung Malaysia.

Rega manuk ba Kuala Terengganu nya RM7.50 sekilogram bebanding enggau Kuala Lumpur  RM7.00 lalu ba Klang semina RM6.50. Baka nya mega rega ikan, taja pan ba Terengganu mayuh orang berikan tang rega ikan dia entara ti pengabis mar nyangka ketegal iya agi baru.

Rega ikan kembung ba pasar Chabang Tiga, Kuala Terengganu nya entara RM10.00 ngagai RM15.00 sekilogram bepanggai ba kualiti ikan.

Tang laban kos sewa rumah enggau jalai raya ti nadai tol di Kuala Terengganu, nya ke ngasuh kos daya idup dia enda kelalu tinggi. Enti gaji RM2,500 sebulan, sepintu bilik ulih idup ba Kuala Terengganu lalu ulih tebelika sebuah kerita enggau nyewa rumah.

Tang ba Paka enggau Kerteh ti enda tentu jauh ari pelilih menua Kemaman, kos daya idup dia bisi deka tinggi mimit. Tu nyangka ketegal kedua-dua pasar tu nya nyadi palan alai raban pekereja industri gas enggau petroleum diau. Tu bisi meri empas ti berat ngagai genturung rayat dia empu laban sida dipejal besemekih enggau raban pekerja tu kelebih agi lebuh bebebelika barang ti diguna besehari-sehari laban raban pekereja industri ti ngembuan gaji ti jauh manah agi enti dibanding enggau sida.

Pekara ti sama mega nyadi ba Sarawak, baka ba pasar Bintulu enggau Miri ti alai pusat industri gas enggau petroleum. Tu ngasuh rayat ba pasar kedua-dua bengkah tu napi kos daya idup ti tinggi.Rega rumah ba endur tu mega niki enggau ngenyit kelimpah ari rega barang bukai.

Nya alai dikena nyimpulka runding, kitai ke rayat selama begaji mit tauka jelan pemesai enda ulih enda bekelimat dalam taun 2014 tu ila.

Penyanding Penemu:

Malaysian Insider