Entara dua pangkat: Marcus Malone enggau Carlos Santana

Ninting kali bisi konsert maya jeman 70an, orang ke empu pengawa deka ngambi raban muzik dikena merindang bala pengabang. Nya mih maya aku berengkah nemu muzik Santana, maya jeman sekula suba kelebih ba Skrang, Melugu, Sebintik enggau Nanga Sekuau, kira-kira ujung taun 70an.

Lalu raban muzik tu suah nebah lagu ti enda tau enda ditebah baka Black Magic Woman, Samba Pa Ti, Oye Co Mova, She’s Not There sereta mayuh ke bukai. Semua lagu tu dipopularka Santana. Nya alai aku ngelala Santana nengah muzik sida ti penuh enggau mood latin rock, salsa, blues, afro-cuban, latin jazz. Nya alai kesekali tu aku nguji mai bala pemacha ngenangka pemain muzik ti tau dikumbai tebilang maya jeman 70an.

Carlos Santana tauka nama bendar iya nya Carlos Augusto Alves Santana (ada 20 July 1947) nya entara gitaris ari Mexico ke pengabis landik ba dunya sereta nyadi lagenda ke agi idup.

Lebuh ti bemain muzik ba kaki lima sebelah San Francisco taun 60an menya, iya begulai enggau Gregg Rollie (organ), David Brown (bass) ke sama-sama pemuzik ba jalai, numbuhka raban muzik Santana Blues Band dalam taun 1966. Kenyau ari nya sida lalu tebilang kelebih agi maya empat iti album keterubah sida meletup iya nya Santana (1969), Abraxas (1970), Santana (111) (1971) enggau Caravan Serai (1972).

Santana meletup sereta nama sida pegari sepengudah pengerami Woodstock dalam taun 1969. Maya nya suba sida semina dibayar AS$2500 aja bebanding enggau Jimi Hendrix ke dibayar AS$30 ribu.

Udah album Caravan Serai sereta dikeluarka mega album-album bukai, dia prestasi enggau populariti sida mega niki nurun tang ujung-ujung Santana pulai pegari baru lebuh album Supernatural meletup dalam taun 1999. Maya nya iya beganding enggau penyanyi popular maya ti nyadi formula pemujur ke ngujung iya nyadi siku pemuzik tebilang. Terang amat nya mandangka iya tu siku pemuzik tulin ke agi majak nengkebang lagu ketegal pengerindu enggau nilai ‘spiritual’iya ti enda bebelah bagi entara muzik enggau penengkebang.

Bup senetang Santana, ke benama ‘Soul Sacrifice-Santana Story’ ditulis Simon Leng pun taun 2000 suba bisi kala dijual ba Tower Record di KL Plaza, Bukit Bintang.

Pemain conga Santana ke dulu suba, Marcus ‘Magnificient’ Malone nya siku orang ke beridup nadai rumah nitihka berita udah dibai betemu baru enggau Santana udah seduai beserara ari pangan diri sepengelama 40 taun.

Marcus Marlone tu kala enggau raban Santana ari taun 1966 nyentuk ke taun 1969. Maya nya suba Santana baru berengkah lalu sida mega agi nyadi sebuah band amatur ti benung ngiga kuing tuju enggau trademark dalam muzik sida.

Marcus nya siku pemain conga ti landik lalu iya mih ke ngemasukka elemen Afro-Cuban ke dalam muzik Santana.

Taja pan baka nya personliti enggau gaya Marcus bisi nyelai mimit ari karektor sida ke bukai baka Santana, David Brown, Gregg Rolie. Berita enda manah kala nyadi ba Marcus lebuh iya bisi enggau dalam kes bunuh dalam taun 1968 ti ngujungka iya dibuai ari raban Santana. Kes nya ngujungka iya dijil nyentuk ke taun 1973. Marcus lalu diganti enggau Michael Carabello.

Semua tu bepun ari segmen pengarang video, Stanley Roberts ‘People Behaving Badly’ ba program KRON 4 ti sempat berandau enggau Marcus. Maya nya Marcus benung ngasaika penyinu diri ba Oakland, California. Iya sinuka diri ti nadai rumah, nadai semua utai semina gambar foto maya iya agi nyadi raban band Santana maya taun 1966 suba.

Pekara ti pengabis badas iya nya lebuh Santana madahka diri sanggup betemu baru enggau pemain conga nya. Nya mandangka Santana seruran ingatka ‘roots’iya. Maya ti nemban udah dilanggur sereta muka penampak sereta lambar pengidup baru ti balat agi mai reti ngagai Marcus Malone, agi mega iya nyadi sebedau Krismas.

Pengawa ti dikerejaka Carlos tu ukai utai ti ngalitka ati laban iya nya siku pemuzik ti udah neresa peneleba spiritual dalam pengidup iya. Awal taun 70an, iya empu atas lalau bala tawing pemuzik ke mega pengajar muzik iya, John McLaughlin kala enggau masuk palan pematih spiritual Sri Chinmoy ti bepusat ba bandar New York. Sri Chinmoy maya nya nitah nama ‘Devadip’ ngagai Santana.

Begulai enggau McLaughlin lalu ngena nama Devadip Carlos Santana, iya udah ngasilka album spiritual baka lagu Love, Devotion enggau Surrrender (1973) sereta mega album-album spiritual bukai baka Illuminations (1974 – kolobrasyen iya enggau Alice Coltrane) sereta Oneness - Silver Dreams Golden Reality (1979).

Gaya main Santana nyangka enda manah baka John McLaughlin ari segi ‘feel’, teknikal tauka ‘speed’. Tang lebuh kitai mending tauka meda chara iya ngenataika lagu sida di video, Santana tau disema baka B.B King tauka Jimi Hendrix laban ba tiap-tiap ‘note’ iya ngundan seribu cherita enggau reti ti dalam.

Nya mih mega ti ngangkatka nama pegari baka semua gitaris ti bisi di dunya ngujungka majalah Rolling Stone ngangkatka iya nya pemain gitar ti duduk ba tangga ke-20 diantara 100 gitaris ti tebilang dunya sepemanjai jeman ti dipilih.

Sida dalam raban muzik Santana seruran beselih ganti sepemanjai musin karier sida. Neal Schon lebuh agi biak maya umur bebelas taun kala enggau Santana dalam album Santana (111) enggau Caravan Serai sebedau ninggalka band nya begulai enggau Gregg Rollie laban deka numbuhka raban Journey ba taun 1973.

Berita ti baru bisi ngerindas pending madahka Santana deka begulai enggau Marcus Malone sereta raban bukai band Santana ke lama suba ba sebuah album pun taun tu. Nyata bendar pengidup tu penuh enggau misteri ti ngundan mayuh leman cherita, gelema enggau resia.

Baka belayan padi lebat bebuah; tiap utai ti nyadi tentu bisi tuju enggau kebuah. 40 taun nya ukai siti maya ti pandak dikena mai seduai tu betemu enggau pangan diri – Carlos Santana pemuzik sejati sereta Marcus Malone, pemain conga bepengelandik ti ngeradai sama-sama enggau takdir pengidup ti enda ngarika iya.