Ken Robinson, siku orang ke landik ba sukut pelajar bisi nulis ba dalam bup iya Out of Our Mind madahka, "Being creative is not only about thinking: It is about feeling".
Aku tetarit ati enggau sebuah restoran Pakistan ke bisi dibuka ba Kuching, semak enggau roundabout Simpang Tiga, entara palan ke tebilang di Kuching. Utai ti narit ati ba kedai tu, iya nya baka ni iya ulih ngentapka diri dia, besaruk lalu maju laban nemu tentu peluang sigi bisi dikena ngerembaika idea baru, sereta jalai iya ngaturka idea nya.
Ba restoran tu, iya ulih ngidangka panduk Asia Tengah,Timur Tengah, enggau sumai orang dia empu baka mee kolok, laksa Sarawak sereta enda tinggal mega asi kerabu. Utai ti naritka ati nya pengelandik tauke tauka kedai tu ti ulih nyediaka mayuh bengkah menu sereta ulih ngetanka pengasai orang menua tu empu lalu ngelakuka asai pemakai tradisional ti dipanduk sida di Kuching. Sida mega ulih muka restoran tu 24 jam (ti tusah deka bisi ditemu di Kuching) lalu mega ngembuan sistem penempara ti teratur amat, jampat lebuh nyediaka pemakai lalu ulih meri “predatory pricing” ke alai rega pemakai sida balat agi baruh ari kedai bukai di Kuching taja pan endur kedai sida ba palan ti mar ba peragam ati aku.
Enti kitai pulai ngagai jaku Ken Robinson di atas, ba penemu aku kitai rayat Malaysia kurang ngena “common sense” (dalam jaku English “feeling”) ti bisi ba kitai lebuh ngemajuka mayuh bengkah sektor ti bisi. Nyata bendar pedagang Pakistan tu mujur ngena “common sense” iya lalu nukarka nya ngagai idea. Iya mujur mutarka peminta ti bisi di Kuching, lalu nguji ngemajuka idea nya.
Ba penemu aku, kitai balat agi nitihka trend bebanding enggau pengawa ngemansangka siti-siti idea ngambika iya nyadi manah agi. Ambika chunto mayuh orang ke bedagangka pemakai enggau ai irup sigi tebilang ba sebelah endur di Kuala Lumpur baka beberapa bengkah francais manuk guring enggau ai irup ice blended ti suah laku maya iya keterubah dijual suba. Udah nya, mayuh francais ti bisi udah tumbuh kulat maya ujan bela ngeluarka produk ti sama. Sida iya nya nadai ngemajuka idea nya ngambika iya ulih nyadi produk ti manah agi sereta laku dibeli orang. Ujung-ujung peminta pan bekurang ari selama ketegal produk nya udah datai ba renggat “plateau” enggau “saturated”. Aku ngasaika pekara tu nyadi laban kurang iya pengawa kena nambahka pemanah idea lalu ngiga chara baru dalam industri.
Aku teingatka baka ni pemintar Sony lebuh besemekih enggau Toshiba maya ngeerevolusyenka disk padat HD. Sony ngeluarka Blue Ray lalu Toshiba ngeluarka HD DVD. Dua buah kompeni besai tu sama-sama berebut deka nyadi pugu pengempu revolusyen disk padat HD. Utai ti digaga Sony iya nya ngemasukka pemain Blue Ray ba injin pemain konsol Playstation 3 sereta dijual nengah rega ke murah agi enti dibanding enggau kos ngaga nya. Toshiba ti bepanggai ba pengawa bejualka kereban pemain disk padat HD, ujung-ujung iya pansut ari ke sama-sama besemekih nya tadi. Sony ulih nemu sereta ngabungka kereban pemain cakera Blue Ray ba main konsol iya. Enggau tu Sony mujur nutup pengulih munsuh iya taja pan iya begunaka ungkus ti besai lebuh baru deka ngepunka projek nya suba.
Enti deka nyadi “world player” aku pechaya bendar kreativiti nya beguna amat. Enda kira dini-dini endur kitai, aku pechaya enti kitai ulih berunding luar ari kutak, kitai ulih jauh nyulut ke mua. Ngambi idea orang bukai lalu nadai ngemanahka iya, nya siti pekara ti nadai mai kitai kini-kini.
Aku arapka kitai ulih maju lebuh kitai ngerevolusyenka idea ti bisi taja pan kitai agi bepegai ba adat tradisional kitai. Kitai tau enda ibuh baka orang Jepun,Korea tauka Barat enti deka maju enti tak semina nitihka trend fesyen kemaya hari tu. Kitai mesti meda baka ni sida ngangkatka diri ari jeman petang suba (baka Korea, udah Perang Korea, Jepun, udah perang dunya kedua lalu Barat udah jeman petang.)
Baka mega pizza, burger, sushi, kimchi, kebab enggau ke bukai udah ngerenchah mayuh menua ketegal pengulih bansa sida ti sanggup berunding luar ari kutak, enda buyan nguji idea baru sereta enda takut labuh. Sida udah mujur mantaika asil sida ba mata dunya taja pan maya iya mula berengkah iya bedau tentu dikelala orang.
Kitai aruh iya arap ngagai diri empu, ubah lalu gawa ngena “common sense” ti bisi sereta ngemansangka idea-idea nyelai nengah pengingin ati ti tinggi. Idea enda ulih dikalih enti nadai dikerejaka, semengat begunaka minda enggau pengasai ati enti deka maju agi ke mua.
Tiada ulasan:
Catat Ulasan