Tu siti buah kenang ti tau nyadika teladan kitai laban ngelama tu kitai nadai kala ninga senentang siku tuai ti megai menua tang idup miskin. Ngelama tu kitai dinahka enggau berita senentang tuai pemesai menua ke mayuh duit, kaya seret diau ba istana lalu ngembuan kerita besai sereta mar. Mayuh ari belanja tu datai ari duit rayat, duit chukai ti dibayar rayat. Ke sekali tu kitai beratika siku presiden ti pengabis miskin di dunya.
Kena 1 March 2010 Jose Mujica Alberto Cordano udah diberi mandat megai tampuk pemerintah nyadi presiden ke-40 Uruguay. Iya dipilih rayat ketegal ke ngembuan ulah ti kemerah ngagai bala rayat kelimpah orang ke seruran meri pemeri.
Ketegal ulah iya ti kemerah sereta enda sanggup meri pemeri dia iya tu tadi lalu nyadika pun inspirasyen ke rayat iya. Komuniti dunya mega sama-sama berasai temegah meda ulah iya ti baka nya. Enti sekali meda lebuh bepansa tentu kitai enda nyangka iya tu Presiden Uruguay. Kebuah pia, laban chara pengidup iya bebida amat tuai pemesai bukai di dunya. Jose Mujica diau ba sebuah rumah tu udah nyau lama lalu iya semina ngembuan sebuah kerita Volkswagen Beetle klasik ti dibeli iya enggau rega RM6,023.
Lelaki ke berumur 78 taun tu sanggup milih idup jelan pendiau ba sebuah rumah di kebun bini iya, Lucia Topolansky, iya nya ba Montevideo, iya nya indu nengeri menua Uruguay. Taja pan perintah bisi nyediakan sebuah istana presiden ke chukup perengka sereta lantang alai diau, iya tetap milih diau ba rumah kebun bini iya.
Nitih ku Mujica, iya berasai lantang diau ba rumah kebun laban dikelingi utai tanam baka jagung enggau bungai ti ditanam iya empu. Pengidup iya ba orang pesisir. Iya ngena telaga nyadika pun penatai ai kena mandi enggau ngirup. Ba belakang rumah iya bisi alai ngeredaika gari. Pekara ti baka tu ngujungka iya enda dipeda baka siku presiden sebuah menua.
Ketegal nya iya lalu digela ‘presiden ke pengabis miskin ba dunya’, ketegal ulah ti kemerah sereta sanggup meri 90 persin ari gaji bulan iya ngagai raban orang seranta sereta orang ngereja pengawa diri empu. Ninting bulan, tuai ke kemerah tu semina ngena RM2,500 ari gaji iya. Iya ti lebih nya diberika iya ngagai rayat.
Enti tuai pemesai dunya ke bukai dijaga polis elit tang bagi Jose Mujica enda baka nya. Iya semina dijaga dua iku polis aja enggau siku ukui iya empu ti benama Manuela. Semina ukui tu mih ke selalu sama-sama enggau iya sereta bini iya.
Nama tuju ke bendar Mujica milih chara pengidup ti baka tu? Enti nitihka laban ke nyadi orang lumur satu ba menua Uruguay, iya endang patut ngembuan pengelantang baka berumah besai, bekerita mar sereta begaji ti setipak enggau penuduk iya.
Dalam taun 2010, lebuh aset iya ditaburka ngagai mensia mayuh dia reta pengaya iya semina RM3,014 aja. Duit ti nyampau nya ulih dikena iya meli kerita Volkswagen Beetle ti dikeluarka dalam taun 19887.
Dua taun udah iya megai tampuk pemerintah menua Uruguay dia pengaya iya bisi betambah. Nya pan sepengudah iya nambahka aset bini iya baka tanah, sekeda traktor enggau sebuah rumah. Lebuh udah ditambah baka nya dia penyampau pengaya iya bisi datai RM648,117. Penyampau nya agi dikira baruh ba penuduk siku presiden.
Kenu ku Mujica, iya enda ngasaika diri miskin taja pan gaji iya semina RM2,500 sebulan. Ba iya gaji nyampau nya udah chukup dikena seduai melaki bini. Ba penemu iya, orang ke miskin nya ke bendar semina sida ke gawa ketegal deka nyaga gaya idup orang kaya sereta selalu dekaka lebih dalam pengidup.
Kenu ku iya mega, nyau deka selampur pengidup iya enda ditembuka enggau chara pengidup ti jelan pendiau. Tu mega ditambah enggau iya empu ti ngemeranka diet vegetarian. Tu ti ngasuh iya milih diri empu nanam sayur ba kebun iya. Kelimpah ari nya iya mega ulih ngeluarka peluh sereta ngelimatka kos daya idup iya empu.
Aktivis mensia antarabansa madahka gaya merintah Mujica tu endang amat ludas. Iya ngena pengidup iya empu ti jelan nya enggau chara ti mudah amai. Iya ngemeranka pengidup ti jelan pendiau, rindu betanamka utai sereta enda mantaika seraka entara iya enggau mensia mayuh taja pan iya digelar tuai pemesai menua. Iya nyadika teladan ti pengabis manah ngagai rayat iya empu.
Pengidup presiden ke-40 Uruguay tu balat dikuing sejarah lama pengidup iya. Iya endang datai ari orang ke merinsa. Tu mih ke ngasuh iya belajar reti pengidup ti amat. Bala kaban iya ari sepiak indai iya endang orang datai ari menua Itali. Apai iya empu nya sigi siku orang bumai. Dalam taun 1940, apai iya kala diakunka bankrap sebedau iya sempat mutuska seput ti penudi.
Ukai semina nya aja, sebedau iya dichirika nyadi presiden, Mujica regas amat enggau gerempung ngelepaska Tupamaro (MLN-T). Ketegal nya iya kala ditangkap sereta diukum jil 16 taun dalam taun 1986. Enggau peneleba diau ba rumah pasung ti endur fizikal ke jai sereta seruran diseraraka ari orang bukai ngasuh iya ngasaika iya empu ngembuan tanggung pengawa ngubah pengidup rayat.
Bepelasarka peneleba nya mih dikena iya dalam sistem pemerintah iya diatu. Ketegal nya iya nyadi siku tuai pemesai menua ti dikerinduka rayat Uruguay. Gaya pemerintah ti ludas, rindu beberi lalu enda ngena reta tengkira menua ke tuju diri empu ngasuh iya iya siku lagenda rayat Uruguay.
Simpul Penemu
Nya alai kitai ke ba menua Malaysia patut berunding sereta betatika cherita tu enggau lenak sereta silik sereta patut ngauk penemu tu nyadika teladan sereta chuan lebuh kitai bisi dichiri orang nyadi tuai tauka lebuh kitai dipinta milih tuai.
Penyanding penemu:
Majalah Infiniti, Edisi Ke-50, Julai 2013
Tiada ulasan:
Catat Ulasan