KUCHING: Siku ari pemain Bujang Senang ke kala ngarika team main bol Sarawak ke dulu suba iya nya Sazali Mohd Ramli, 45, parai pagi kemari udah iya tembu besenam ba rumah iya empu di Taman Millinium, Tanjung Kidurong, Bintulu. Pemarai Sazali nyadi siti utai ke chukup besai reti ngagai pengawa main bol di Sarawak. Nitihka penerang anak tuai Sazali iya nya Sharir Shazni, 17, apai iya mutus seput pukul 10.00 pagi ba Hospital Bintulu.
"Udah besenam apai aku enda mukai-mukai luput lalu terus dianjung ngagai hospital lalu beberapa jam udah nya kami sebilik nerima berita ke chukup ngenyinuka ati. Iya ngembuan penyakit darah tinggi," ku Sharir lebuh dirandau Utusan Sarawak kemari. Kaban niang iya nya, Dahlan Matusin ke mega kala nyadi pemain team Bujang Senang chukup tekenyit ninga berita nya.
"Dua hari ke udah kami duai chukup ranchak berandau enggau pangan diri nengah telefon ...tang pagi tu enda mukai-mukai aku nerima berita ke chukup sinu," ku Dahlan ke sama kala besaup enggau Sazali nyaga binting team Sarawak. Enggau ati ke chukup sinu, Dahlan madah pekara nya endang pengelenyau ke chukup besai ngagai iya empu enggau pengawa main bol Sarawak. Siku agi kaban niang iya nya, Ibrahim Mantali lebuh ke dirandau mega mantaika penyinu ati.
"Apin lama ke udah aku bisi betemu enggau niang, lalu iya madahka diri deka pulai ke Kuching, tang juluk iya nya enda ulih japai. "Laban ke nyadi kaling aku, Sazali endang siku orang ke manah. Iya bisi pengelandik ke diri empu, ukai semina ulih bemain nyadi back sepiak kiba, tang mega ulih nyadi pemain sayap," ku Ibrahim ti mega kala nyadi pemain tengah Sarawak jeman Bujang Senang.
Niang endang orang Kuching tang gawa ba MLNG Petronas Bintulu. Sazali berengkah nyadi pemain Sarawak taun 1991 lalu dilatih Alan Vest. Kepenudi iya enggau team Sarawak maya taun 1996. Sepemanjai nyadi pemain Sarawak, Sazali kala nulung Sarawak Champion Mangkuk FA 1992 pengudah ngalahka Kuala Lumpur 2-1 ba renggat final di Stadium Negeri. Nya mega nyadi champion keterubah team Sarawak dalam pekit Liga Malaysia. Iya kala ngemasukka gol maya nya enggau sigi gol dipasukka penyerang import ari Australia, John Hunter. -Dibali ari Utusan Sarawak
Tiada ulasan:
Catat Ulasan