Nyeliahka ari belaya pasal pengarap

Perintah udah seruran dilalau ngambika enda mai menua enggau rayat ngagai seraka konflik pengarap ke tau ngerugika semua.

Pengawa ngerampaska Bup Kudus jaku Melayu nya ukai utai ti sengenda nyadi piak aja. Kenu ku sekeda orang, pekara tu patut diperatika ari langkar ti besai iya nya pengawa ke nguji deka ngelaungka isu rega barang niki.

Serang senentang pengarap bukai ukai isu ti baru. Menua kitai kala dikenyitka enggau insiden betunuka Gerija Metro Tabernacle ba Desa Melawati, Selangor urung taun 2010. Lebuh kes nya dibai ngagai court nemu nya pengawa penyukung sebuah parti politik ti besai ba Tanah Malaya. Baka nya mega insiden ke mandang diri ringat ba mua rumah tinggi Opis Sekretari Perintah Nengeri Selangor sereta ngindik pala sapi laban deka mantahka pengawa ngaga kuil Hindu dalam taun 2009 mega pengawa penyukung part ti sama.

Enda ngalitka ati enti pengawa sekali tu mega diperambu enggau chukup silik ari sida ke bebendar deka ngetanka kuasa diri, pia ku penemu sekeda berita media sosial ba laman internet. Ngelama tu mega sekeda raban endang kala dikumbai ngepunkan laya maya 13 Mei 1969 laban deka muai Tunku Abdul Rahman. Nyentuk ngagai sehari tu lalu nadai bisi siku didawa ketegal pengawa nya.

Urung taun 2014 pan bisi berita ti madah pekara ke nyau deka sama deka nyadi laban deka muai tuai pemesai menua. Tang laban ti ngembuan penyukung ti kuat ari raban menteri kanan parti nya pengawa tu puntan baka menasan jalai jelu.

Taja pia, empas ari pekara nya ngujungka rayat kena kapit di tengah-tengah. Seraya enggau nya mega, sida ti bisi kuasa nguji ngalihka isu rega barang ti niki ngagai isu penanggul beripih bansa enggau pengarap. Kedua-dua piak begunaka pengawa besai nyadi baka pengawa ti ngeruga pengelikun menua nyadi ngambika bisi orang ke patut disalahka ngambika ulih menang.

Pengawa ti begunaka raban polis dikena ngenakutka mensia mayuh ngambika enda mandang diri ringat diperatika enda tentu nyadi. Tang meniga minggu tu tadi diperatika pengawa ngeruga kaul entara pengarap enggau chara nyerungkai sereta ngerampas bup kudus nyadi ketegal gerempung bekuasa pengarap ari asuh orang ti bekuasa.

Sida ke nyadi dalang ba belakang pengawa tu tentu deka ditemu enda lama da agi. Kitai mega sama bela udah ninga tauka macha ba surat berita ti madah sapit menteri besai enggai masuk hal raban sida ke deka mandangka diri ringat ba mua gerija di serata nengeri.

Pengawa ti mandangka pengasai ati nya enti amat nyadi tentu deka sabotaj pengawa transformasyen perintah. Taja pia, pengawa ti ngeruga sentimen pengarap lalu melakangka undang-undang perintah besai tentu enda manah enti diperatika ari sukut menua Malaysia ti udah betamadun.