BETONG : Anang ngelakka bala anak nyinuk bepedaka
perengka bacha ke nadai meri penguntung sereta penerang ari internet ke ulih
ngerusak runding enggai penemu sida udah tu. Kebuah pia laban penerang ke nadai
penguntung baka nya ulih ngasuh bala anak puntan nyadi orang ke menyana jemah
ila, ku Menteri Pengawa Ladang enggau Komoditi Malaysia, Datuk Amar Douglas
Uggah Embas. “Apai indai patut bejalaika tanggung pengawa besai iya nya
ngemataka perengka bacha ke dipeda bala anak sida sereta lebuh maya sida nya bepedaka
laman web ba internet.
“Peransang sida ngiga penemu ari laman web ke
manah-manah. Tang enti penerang nya dipeda enda manah, mesti berumban ngerara
sida macha iya udah tu," ku iya. Uggah ti mega nyadi Kaban Parlimen Betong
madah munyi nya rambau Pengerami Nyuaka Wang Bantu Besekula (BKAP) ke diatur ba
Dewan Tan Sri Jabu, Sekula Sekondari(SMK) Saint Augustine, Betong apin lama ke
udah. Kelimpah ari nya atur ke bebendar ngajar bala anak ku iya patut dikemerat
ngambika sida ulih nulung ngemansangka menua dudi hari ila.
"Sebengkah ari chara nya baka meri Bantu Dikena
Besekula RM100 ngagai genap iku nembiak enda ngira penyampau penatai pemisi
ruang bilik sida. “Tu endang sebengkah ari chara digaga perintah dikena nulung
apai indai bebelika perengka kena anak besekula. Nya alai kena enggau manah
duit nya udah tu,” ku iya. Berebak enggau pengerami nya, Uggah udah ngemendarka
agih belanja kira RM150,000 dikena ngemanahka SMK Saint Augustine awakka terus
meransang bala nembiak sekula nyadi nembiak pandai.
Sama bisi datai iya nya Residen Pelilih Menua Betong,
Datu Romie Sigan Daniel, Prinsipal SMK Saint Augustine, Paul Langang, Chairman
Komiti Sekula , Nelson Kloni Kanang, pengari PPD Betong, Anis Madeli enggau
bala pemesai opis perintah ke bukai.
Bisi 951 iku nembiak sekula SMK Saint Augustine,
Betong nerima duit BKAP RM100 ungkup siku-siku lalu penyampau semua iya bisi
RM95,100. Udah nya, bisi lapan iku pelajar lepas peresa Taun Enam (UPSR) enggau
tujuh iku pelajar lepas Peresa Pom Tiga (PMR) ari sekula nya nerima perais asil
ari pemandai ke disuaka Uggah. – Dibali ari US
Tiada ulasan:
Catat Ulasan