Misteri Batu Nabau

Batu Nabau terus nyadi misteri taja pan iya udah kala diripot ba media sekalika ba nengeri tu empu tauka ba luar Tanah Kenyalang. Ketegal nya kita enda tekenyit enti bala temuai ke bisi datai enda muai peluang nemuai ngagai Bukong, urung 50 meter ari Rumah Nyalau Muang, Engkilili.

Kebuah baka nya laban bisi tekang batu ke baka nabau sebaka enggau siku ular gerasi ke dipelabaka lebih ari 1,000 taun. Pemanjai batu nya lebih ari semilan meter lalu ukir ngelingi iya urung dua meter. Orang ke keterubah iya kala meda nya udah tentu ngasaika diri takut laban sigi endang sebaka enggau siku ular ke benung nganti mansa. Siku orang ke kala ngelawa endur nya Sirat Marikan, 45, madahka, pemanjai batu nya ke betul enda ditemu laban sekeda ari batu nya tengelam ke dalam tanah.

“Rumah Nyalau tu urung 15 minit pengelama pejalai ari Pasar Engkilili. Taja pia, enti deka ngelawa endur nya bala temuai deka niki sereta nurun sebuah bukit ari Rumah Nyalau. Pengelama pejalai ngagai endur nya lebih ari setengah jam,” ku iya. 

Nitihka orang ke ngempu menua, batu nya keterubah iya burak sereta berubah kediri empu betukar nyadi chura sebaka enggau siku ular. Ku Joseph Mirai, 81, raban bansa Iban ke diau ba endur nya pechaya batu nya bisi jerita kediri empu. “Nyentuka sehari tu nadai mayuh orang nemu jerita batu nya iya ke betul.

Iya semina baka batu ke bisi dipeda ngelama tu tang engka iya bisi jerita bukai. “Ketegal nya, sebarang orang ke bisi datai ba endur nya sigi enda diasuh bejaku peneka ati diri empu. Anang sekali-kali ngachau iya ngena leka jaku tauka nikauka sebarang objek ngagai iya. Penusah ke enda manah tau nuntung enti pantang ke baka nya enda dititihka. “Dulu suba siku nembiak manchal kala kemi ba atas batu nya. Enda lama udah nya iya lenyau chara misteri ke dipelabaka labuh lebuh maya mulaika diri. Nyentukka sehari tu nembiak lelaki nya nadai ditemu.

“Penusah bukai ke bisi nyadi ba siku nembiak mit ti lalu sakit udah iya nikauka objek ngagai batu nya. “Sida ke diau ba endur enggau naka ulih ngubat iya tang enda mujur. Nitihka jerita orang tuai, nembiak nya mujur diselamatka udah sida ke ngempu menua nya ngatur pengawa miring enda jauh ari batu nya,” ku iya.

Nitihka jaku ari Joseph, batu nya berengkah bisi ditemu sepengudah siku lelaki bansa Siam bemimpi betemu enggau siku ular gerasi ti disumpah nyadi batu. “Mimpi misteri nya ngasuh lelaki nya ngiga ular nya. Pemuas ngiga, iya tetemuka ular nya. “Udah nya jerita ke baka nya berengkah disebut semua orang ke ngasuh batu nya tebilang ngagai orang ke deka ngelawa endur nya,” ku iya. – Dibali ari Utusan Sarawak