Barcelona Dalam Krisis, Presiden ngemaduka diri

Rosell ba Sidang Pengarang

SANDRO Rosell udah badu nyadi Presiden Barcelona sechara ngenyit.

Rosell madahka ba siti sidang media ti diatur maya malam Hari Empat udah aum luar biasa raban lembaga pengarah.

Rosell ngenamaka Naib Presiden Josep Maria Bartomeu nyadi pengganti iya nyentuk taun 2016.

Pemutus nya digaga udah akim kot Sepanyol, Pablo Ruz, minggu tu tadi nerima dawa Rosell nyalahgunaka duit tabung ari 49 juta pound dikena mai penyerang Neymar ari Santos Jun suba tama ke kelab Barcelona.

Siku raban kelab Barcelona, Jordi Cases, madahka penyampau bayar nya nyau lebih ari bayar 48.6 juta pound ti diripotka maya nya.

Lebuh ti nerangka pemutus kebuah iya badu, Rosell madahka; 'Aku enggau kami sebilik udah kala digapka orang. Hal nya ti ngasuh aku berunding enti pengawa nyadi presiden udah ngerusakka kami sebilik.

"Baru-baru tu, dawa ti enda patut udah ngujungka siti tuntutan kot ke atas aku udah difailka. Dulu ari nya, aku madahka proses mai tama Neymar nya sigi betul lalu ngujungka sekeda munsuh dengki enggau pemujur kami ngulihka iya.

"Raban lembaga pengarah nya siti raban. Sida ngemudi siti projek ti mai kelab nuju pemujur. Aku enggaika pengawa ti nyerang aku tau mai pengerusak ngagai raban pengatur sereta imej kelab. Nya alai, udah datai maya aku ngundur diri," ku iya.

Rosell, 49, mangku pengawa nya kenyau ari musim panas 2010 udah ti bulih undi ti pengabis tinggi dikena ngantika Joan Laporta.

Lebuh era iya, Barca kala menang trofi Liga Juara-Juara Eropah, Copa del Rey, Mangkuk Kelab Dunia Fifa, Mangkuk Super UEFA, Supercopa de Espana (tiga kali).

"Dalam timpoh empat taun tu, aku bisi ngasaika pengelantang enggau penusah laban kitai endang orang Barcelonistas.

"Aku gaga amai laban diberi peluang gawa ke Barcelonistas. Aku temegah amat laban nyadi siku ari presiden Barcelona," ku iya.

Bartomeu, ke duduk betiban enggau Rosell madahka: "Juluk keterubah aku nya deka neruska projek raban lembaga pengarah nyentuk taun 2016. Aku ngarap amatka sukung ari raban kelab. Aku minta sida terus ngembuan pengarap ngagai projek tu."

Barca ti udah ngangkatka trofi keempat La Liga musim nyin kemari, diatu ba penuduk ti pengabis atas lalu tulihka 51 poin ari 20 kali main. -mstar