Raban nembiak dilalau neladan ‘American Dream’

GEREMPUNG RABAN NEMBIAK NASIONAL BESERAKUP SARAWAK (SABERKAS) ngasuh raban nembiak ba negeri tu neladan ayu ‘American Dream’. Gerempung nya merambu nempa ayu nya ngagai raban nembiak dikena sida nyediaka diri napi menua Sarawak nyadi menua maju maya taun 2030 ila. Presiden gerempung nya, Datuk Amar Abang Johari Tun Openg madahka gerempung nya deka ngatur program sosial kelebih agi dikena nempa semangat nyadi orang dagang ba sida ke nembiak dikena ngubah pengidup diri.

“Ba AS (Amerika Syarikat), sida ngumbai tu ‘American Dream’. Reti nya kitai meri sida raban nembiak peluang. Engggau peluang nya sida deka gawa bebendar agi nyapai pengingin ati diri empu. “Dalam kes tu, Sarawak ngembuan juluk ati ti deka meda nengeri tu maju lalu nyadi menua ke dititih menua bukai ba taun 2030.

“Raban nembiak Sarawak mega patut ngembuan juluk ati kelebih agi senentang jalai sida deka nguna peluang dalam menua ke benung mansang diatu" ku iya madah ngagai pemberita pengudah nyadi chairman Aum Ke-45 Komiti Besai SABERKAS ditu kemari (Hari Enam).

Abang Johari madahka , SABERKAS diatu ngembuan lebih 130,000 iku kaban serata negeri lalu diatu gerempung tu nyau bisi dipasuk raban nembiak ukai Bumiputera.  Ngelama tu mayuh orang ngumbai gerempung tu semina ungkup nembiak Bumiputera aja.

Menteri Pengawa Berumah enggau Dagang Temuai nya mega madahka peratus penyampau penatai raban nembiak ukai Bumiputera ke ngulu aum besai SABERKAS ke sekali tu bisi 30 peratus lalu nyadi siti kelai ke chukup manah laban gerempung tu ulih diterima semua bansa. Iya madahka raban nembiak ukai Bumiputera datai ari sida ke agi biak ti gawa profesional lalu besedia bekunsi penemu dikena sida nyapai juluk ati diri empu.

“Ayu nya nadai bepanggai ngagai perintah meri bantu laban udah lama bisi ba kaban ukai Bumiputera. Nya alai pekara tu patut diteladan semua raban nembiak ba Sarawak,” ku iya. Iya madahka kelab Saberkas mega deka ditumbuh ba semua palan pelajar tinggi prebet enggau perintah ba nengeri tu dikena nambahka pemanah kaul enggau bala pelajar, kelebih agi dikena ngulihka batang pengawa nitihka bidang ti diambi sida. — Bernama.