Pending enggau Dilah

Pending enggau dilah nya kereban pengasai ke pengabis beguna dalam nukuh pemaiulah kitai. Kedua-dua kereban tubuh tu balat amat bekait rapit enggau pangan diri. Orang ke bengal kenyau ari ada deka napi penanggul lebuh bejaku. Baka nya mega orang ke agu laban sida enda ulih niru munyi ti diasilkan ari jaku. Kelimpah ari nya bisi sekeda orang ke bengal ketegal penyakit tauka faktor umur balat agi deka bejaku inggar tauka nyaris. Nya mih pemesai guna pending enggau dilah.

Petara tauka Tuhan udah meri ngagai kitai dua iti pending enggau siti dilah. Nya alai St. James madahka ‘Kitai menyadi ke dikerinduka aku, enda tau enda jampat mending, lubah mansutka jaku, ...’.  Kitai patut balat agi mending ari mayuh bejaku. Taja pia iya enda ngemudahka munyi ke disebut. Mayuh ari kitai rindu agi bejaku ari mending. Bisi sekeda nya nama udah diberi peluang bejaku lalu enggai badu-badu.

Ba dalam kelas bisi sekeda nembiak bejaku enggau pangan diri maya pengajar benung ngajar. Maya bisi pengerami, nyawa orang pemesai ke bejaku udah ditenggelamka nyawa mensia mayuh ke chapuh bejaku enggau pangan diri taja pan pemesai nya nguna mikrofon. Baka nya mega ba gerija tauka ba alai sembiang ti bukai. Kemaya hari tu taja pan sida enda bejaku nguna mulut tang sida agi ulih bekomunikasyen nengah ‘whatsApp’, ‘WeChat’ enggau ke bukai.

Ba sesetengah orang, bejaku nya siti pekara ke beguna.  Sida enda mudah lelak bejaku lalu nadai kala kurang kereban topik ke deka dicheritaka sida ngagai orang bukai. Sida ke baka tu lumpak bendar tulihka bakih ke mayuh ketegal pemaiulah sida ke kemerah tauka mentas nya. Bulih mayuh bakih nya sigi pekara ti manah. Tang bisi mega ari ke bebakih nya sida lalu ngambi peluang bejakuka orang. Pekara ti mit dikemesaika sida, pekara ke nadai dikemisika sida ngambika sensasional agi. Patut diingatka, ‘Mayuh agi jaku disebut, mayuh agi penyalah ba orang ke bepengarap Kristian tauka Islam. Tang orang ke enda pejaku nya orang ke pintar’ (Jaku Dalam 10:19). Bejaku jai pasal orang bukai nya pengawa ke enda manah sereta salah.

Nyangka kitai kala ninga rambai jaku, ‘dilah enda betulang; pedis deka nyaga jaku’. Dilah ke enda dijaga tau ngemediska kitai empu tauka orang bukai. Nya alai bisi rambai jaku munyi tu, ‘jai santan laban pulut, jai tubuh laban mulut’. Enti kitai nadai daya nyinakka dilah kitai patut nyerahka nya ngagai Tuhan, ‘Awakka orang ke bisi pending, ninga’ (St. Matthew 11:15)

Munyi ku kitai tadi kitai endang bisi dua iti pending sereta siti dilah. Ngagai orang ke bepengarap Kristian guna mih kedua-dua kereban pengasai nya kena muji sereta muliaka Tuhan.