Tips Napi Peresa Jaku Iban Tikas SPM

Ninting taun kitai ke nembiak sekula bebendar deka nyapai juluk ati ngulihka pemanah sekalika nya ba dalam kelas tauka sekula. Mayuh bengkah chara kena kitai napi hari kepenudi sebedau peresa. Ngagai chalun ke deka napi keretas jaku Iban ba tikas peresa SPM Hari Satu  1 December 2014 tu aku berasai siru sereta deka bekungsi sekeda pekara tauka chara nyediaka diri sebedau hari ke penuh penguji nya datai.

SEHARI SEBEDAU HARI PERESA

1. Bacha enggau ngelansa malin, tips sereta pekara ti beguna dalam nyaut keretas jaku Iban nya.

2. Anang kelalu mayuh berunding tang keringka semengat "AKU ULIH NYAUT!"

3. Sediaka semua kereban tulis (pinsil 2B siap diraut tajam - 2 batang, pengererak - 2 igi, peraut pinsil - 1 & tentuka iya tajam kena nyeliahka pinsil suah patah, penyuran - 1 batang pandak & sebatang agi ti panjai, pen - 2 batang.

4. Minta apai indai bela besampika pemujur nuan.

5. Tinduk tumu, kira-kira jam 9.00 malam ngambika untak ulih meroses semua penerang ke udag dibacha enggau ngelansa tadi.

MAYA HARI PERESA

1. Dani tumu.

2. Sembiang bagi kitai ke bisi pengarap

3. Siap sedia ke sekula

4. Ingat ngirup pagi dulu. Anang kelalu berat. Nangika nuan tak enda nyamai buah lemba tauka berasai enda nyamai maya ba balai peresa.

5. Tentuka nuan mai:-

a) Semua kereban tulis ti udah disediaka nuan demalam.

b) Surat beranak / kad pengelala

c) Slip angka gintir nuan.

7. Tabi lalu sium jari tauka berap apai indai nuan.

8. Langkah kanan lebuh pansut ari rumah lalu anang malik ke belakang.

9. Bekejang ke sekula tumu ari selama. – tuju iya ngambika nuan enda berasai berumban. Laban enti enda pia nuan tau tak ngasai diri panik.

LEBUH DATAI DI SEKULA

1. Lebuh udah datai di sekula, duduk ba siti sukut lalu bacha baru enggau ngelansa semula semua malin, tip-tip ke beguna.

2. Sintak seput panjai udah nya releks.

 3. Sebedau muka keretas tanya, besampi dulu enti kitai nya bisi pengarap sebedau        nyaut.

 4. Enti bisi pekara tauka fakta enda ulih dikingatka, anang beguai panik. Sintak seput  enggau panjai sereta relaks sekejap.

SEPENGUDAH PERESA

Udah tembu nyaut keretas tanya ANANG SEKALI KALI BERANDAUKA KERETAS TANYA TAUKA  SAUT ENGGAU SAPA-SAPA PAN SAMPAI HARI PERESA KEPENUDI.

Aku arapka semua kitai ke ngambi keretas jaku Iban taun tu mujur dalam peresa kita. Amin.