Polemik enggau anarki sosial

Pengawa nyekat mensia mayuh ari bejaku sengapa ukai dikena nyaga perintah tang ngambika semua kitai enda mungkal ngeloan laya enggau pangan diri.

Kitai udah dipadahka demokrasi nya sistem ti pengabis badas ba dunya. Aku setuju amat enggau penemu tu. Kebuah pia kitai begunaka orang merintah kitai mayuh ukai tak sehari dua tang sampai uchu ambu jemah ila. Iya ti badas agi nya orang ke nerima sukung ari raban majoriti. Lalu aba sistem demokrasi nya mih ke bisi prinsip bebasaka penemu majoriti. Taja pia, demokrasi mega ukai chara ke mudah kena merintah sesebengkah menua. Suah agi iya nadai tentu stabil, nama agi pengelantang ngagai mensia mayuh.

Iya balat agi mai pengerusak laban ninting kali bisi ubah ba parti ke merintah dia empas iya balat ngagai polisi sereta tuju enggau kuing ke dibai perintah baru. Mensia mayuh enggau orang ke merintah begunaka awak ke panjai ngatur sereta nelebaka diri enggau sistem. .

Ba Malaysia demokrasi udah dikemeranka kitai lebih ari 50 taun lalu iya tau dikiraka naka ke diatu bejalai nitihka pengingin mensia mayuh. Ba penemu aku demokrasi tu tau dikiraka kasar taja pan kitai serebanaka bisi aja orang ke ngajum orang bukai. Raban luyar enggau aktivis hak mensia mayuh nyangka enda setuju enggau penemu tu.

Taja pia, enti diperatika nengah chara rama, mayuh orang Malaysia sigi bisi peluang betalat, bekelikuh, bejurai sereta mantaika penemu diri; ambika banding baka betalatka penemu senentang uduk enggau beer. Nadai udah kitai ninga bisi orang kena tangkap. Uji bacha utai ke ditulis raban orang Malaysia ba sosial media.

Nyangka bisi mih sekeda kes orang ke enda patut didawa ketegal ngenataika komen senentang pengarap enggau raja. Taja pia sida tu pan agi dipechara enggau rentang ba court.

Ba sekeda menua ke udah “tuai ba demokrasi”, sida ke ngaga komen jai senentang Semitic deka dijil betaun-taun lalu enda dipechara enggau rentang.

Ba raban orang Malaysia semua utai dipetalatka sida. Indah utai ke mit-mit pan dikemesaika sida. Ambingka banding mayuh “isu intellektual” ti dipejuraika tauka ditweet ba sosial media. Nama tuju ngepunka siri “intellectual exercises” ba isu bakai “muaika kelai bansa/ pengarap ba kad pengelala tauka isu “negu uduk di Malaysia”?  Tentu utai ke baka tu nadai mai pengujung semina nambahka pengeringat entara raban konser­vatif enggau raban liberal.

Raban ke baka tu semina deka mai kitai betatika pekara ke ukai isu. Mayuh ari pekara dipejuraika sida lebih ngagai “kati enti” tu enggau nya. Kati enti kitai enda tulihka merdeka ari British? Kati enti kitai nunda chara perintah Indonesia nyerapka peranak menua iya? Kati enti Polisi Ekonomi Baru nadai kala nyadi 45 taun ke udah? Kati enti orang lelaki majak begari baka orang indu? Rintai tu panjai lalu enda nemu apus. Ba penemu sida isu ke baka tu ulih ngelanchamka runding. Tang patut tauka enda kitai muai jam ba isu ke sengapa kada tu taja pan ba penemu sida nya ngelatihka runding intelektual.

Ba Malaysia lebuh bejuraikaka sesebengkah pekara sida ke ngetanka penemu seruran agi dikumbai orang ke bepisin lama, konservatif lalu kadang-kadang nya dikumbai ekstrimis. Lalu sida ke nguji ngelaban penemu lama suah agi dikumbai liberal sereta progresif.

Sida ke “liberal” enggau “konservatif” ke bejuraika pekara nya ukai ari aspek pemanah enggau penyai, penguntung tauka pengerugi tang ari sukut ke madahka sida nya bisi hak dalam raban tauka individu dalam sistem demokrasi. Sekalika hak nya diterima mensia mayuh nya nadai dipejuraika. Utai ke patut dikingatka kitai nya hak ngenataika penemu diri nya endang patut bendar ditanka. Munyi ku Volataire, “I disagree with what you say, but I will defend to the death your right to say it?”

Kitai suah amat ninga menua Malaysia tu menua ke diwan pupu raban bansa enti dibanding enggau menua bukai. Nya mih kebuah chara logik iya endang patut bisi adat nyekat sekeda pengawa orang ke bejaku ngeruga orang bukai. Sekat tu baik nya betukuhka udang-undang tauka ukur pemanah pendiau ukai dikena nyaga sereta ngetan sida ke merintah menua maya nya. Tang tu lebih ngagai nyaga mensia mayuh ari ke kena loan laya pangan diri.

Sigi amat perintah ti majoriti iya kurang ari dua pertiga napi penanggul nyaga sereta merintah menua. Perintah ti lemi baka tu enda tentu ulih mutuska penemu enggau nemban. Sida udu takutka raban penyakal. Penguji ke ditapi perintah ulih datai ari mensia mayuh lalu ukai semina raban penyakal. Mensia mayuh patut mega dipesalahka kitai enti pengelikun enggau pemaik menua udah bebali. Kemaya hari tu raban politik nyau nyadika kereban ketawa orang Malaysia. Kemaya hari tu mega, enda milih sapa-sapa tau nganu, mejah tuai sida tauka komuniti bukai. Adat enda ulih diteritka laban raban penerit adat takut dikumbai nyalah guna kuasa sida.

Raban ke mutuska undang-undang baka raban akim mega bisi nerima empias diserang mensia mayuh. Dulu suba enti bisi orang enda bebasaka pemutus raban akim, sida tau didawa ketegal ngemaluka court. Tang kemaya hari tu indah tuai pengarap pan berani ngasuh raban penyukung sida anang nitihka utai ke udah diputuska court.

Endang amat kitai kemaya hari tu mayuh agi peluang ngenataika pengingin ati. Kitai udu agi bisi ruang ke enda besekat. Tu bepun ari budaya berani mandangka asai ati diri ba mua mayuh. Ulah ke enda diterima dulu suba udah nyadi pekara selama kemaya hari tu. Perintah diperatika nadai kuasa laban nama-nama pekara ke digaga sida deka disakalka orang.

Nya alai sigi patut bisi tekat ngagai pengawa ke deka dikerejaka mensia mayuh kelebih agi ba pengawa mantaika runding diri. Ulah mensia ke nadai besekat ngenataika penemu diri tua ngujungka anarki sosial. Udah nyadi tanggung pengawa perintah ke dipilih nentuka sekat ti patut lalu ngeletakka ukum ti patut ngagai sapa-sapa ke ngelanggarka pekara nya.

Orang ke ngundi sida nya ukai ngundi sengapa. Kitai ukai milih perintah ketegal deka muai iya ke benung merintah. Kitai milih sida ngambika sida ulih ngubah pendiau pengidup rayat. Nadai mega guna enti kitai nganti parti ke merintah enggau parti bukai ke kurang lebih sama enda ulih mai pemansang ngagai mensia mayuh. Kitai bebelanja mayuh dikena kitai milih sida ke patut megai menua. Nya alai enti pekara ti baka tu majak nyadi dia iya deka mai empas ke negatif ngaga menua Malaysia ke dikumbai kitai diwan pupu raban bansa. Tu ukai betegalka sida ke merintah kemaya hari tu balat lemi. Indah sida parti penyakal pan enti merintah deka napi penanggul ti sama enti mensia mayuh nadai mandangka basa ngagai perintah tauka sida ke bisi autoriti.