Baka ke nadai orang lokal

Berita siku ustaz ti dichiri nyadi prinsipal ba SMK Sungai Paoh, ti tebal agi nembiak dia raban bansa Iban udah nyadi buah kenang bala Iban baik nya ba surat berita tauka media sosial. Nyadi aku sekali tu sama mega bela deka enggau orang ngeruh ai meri penemu diri senentang pekara tu. Sebedau aku majak ngeranjai penemu enggau runding aku ditu dulu aku meri jaku sebar enggau minta ampun enti sekeda penemu ditu bisi mangki sekeda ari bala kitai pemacha. Penemu ke dikenataika aku ditu sigi datai ari runding aku empu lalu ukai ngarika sebarang gerempung tauka palan alai aku gawa.

Nyadi bisi bala pemacha tentu nanya kebuah aku bisi laun mimit bekunsi runding enggau penemu senentang pekara tu. Kebuah pia laban asai ati deka nganti pengujung isu pekara tu lalu nganti iya belega dulu, nganti iya chelap embap pia. Tang munyi ku utai naka kediatu lalu bedau temu pengujung.

Berita pasal orang Malaya mangku pengawa ba menua Sabah enggau Sarawak ukai pekara baru. Pekara tu udah masai bendar didinga kenyau ari menua kitai sama-sama enggau menua Malaya enggau Singapore numbuhka gerempung Malaysia. Nama agi pengawa ke ulih alai sida gawa ba menua kitai endang dibaruh pegai opis perintah besai.

Isu nyadi kepala pengajar ba sekula primari enggau ba sekula sekondari nya ukai pekara baru ba aku. Maya urung taun 1980an suba lebuh aku agi di Lawas endang udah kala ninga berita tu nyadi tang ukai ba menua kitai Sarawak. Iya nyadi ba menua kaban kitai di Sabah. Din sida ke nyadi kepala pengajar sekula primari endang udah lama bisi. Kebuah aku tu nemu laban sida maya nya suba kala nemuai ke Lawas dibaruh Gerempung Kepala Pengajar Sabah (MGB Sabah). Iya ke agi dikingat aku nyentuk ke sehari tu nya kepala pengajar ari sekula ba pelilih menua Sipitang. Kebuah sida din udah dulu ngasaika pekara tu munyi ku sida nya laban orang empu menua maya nya suba agi mayuh bedau tepelajar sereta ke bisi nya enda tentu deka nyadi pengajar.

Pulai ngagai kes ke nyadi di Sarawak tu kiraka utai ke baru nyadi dipelabaka aku. Kebuah pia laban nadai mega udah ninga bisi berita orang mantah penatai kepala pengajar baru ba sesebuah sekula di Sarawak.

Naka ke temu aku nadai nenggala bisi atur rasmi senentang pekara tang lebih ngagai budi basa orang ke di atas. Tang sekula China enggau sekula ke di baruh pegai misyen agi ngenanka kuasa sida milih sapa ke patut nyadi kepala pengajar laban sida bisi komiti Lembaga Sekula. Tambah mega perintah nitihka pekat semina nyediaka pengajar, kurikulum enggau bup teks aja. Ke bukai nya endang ari baruh sekula tu empu.

Taja pan baka nya tuduh penemu ke ngengkah siku-siku kepala pengajar ba sesebuah sekula ba penemu aku patut bepelasarka budi basa pemesai ari opis pelajar belalauka sekeda kriteria baka bansa sekula, endur enggau majoriti nembiak ke sekula dia. Sida patut enggau naka ulih nyiri orang ke empu menua tauka sekurang-kurang iya orang ke berimbai pendiau laban sida nya nemu agi utai ke nyadi dia. Pelaba aku tentu mayuh orang setuju sekula China, sekula misyen enggau sekula agama endang patut dipegai orang ke bisi kaul enggau sekula bansa tu. Uji sekali kitai nganjung orang ke nadai kaul enggau sekula tu enti kitai deka ninga mensia mayuh begau senentang pekara tu, pelaba aku endang munyi langit deka runtuh orang mantah. Baka nya mega enti siku pengetua Iban diasuh pindah ke Kelantan megai sebuah sekula dia, pelaba aku charut mih dunya. Nama agi diatu pekara ngeringka bansa udah tebalan bendar didinga kitai enda milih pengari ari parti perintah tauka parti penyakal kelebih ba Malaya.

Baka nya mih isu ke nyadi ba sekula SMK Sg. Paoh tu. Menua ke majoriti Iban tentu enti ulih orang Iban enti enda bansa lokal bukai. Kala mega siku ari pangan aku ke bebansa China nyadi kepala pengajar dia suba nadai ninga sida gerempung apai indai dia charut enggai nerima iya. Tu ukai semina iya ari Malaya tang megai kala nyadi pengajar pengarap ke suah agi dikumbai ustaz megai sebuah sekula ke tebal agi bansa Iban. Udah mayuh kes nyadi ngujungka pengari kitai ditu minta mayuh agi orang menua tu empu ngajar laban pekara ti enda tentu manah seruran nyadi kelebih agi ba kitai ke diau ba menua pesisir.

Enti nitih ke ditemu aku mayuh amat raban pengajar Iban ngajar ba sekula sekondari. Nama pengurang sida tu enti dibanding enggau ustaz. Bisi beberapa kebuah bala Iban enda tentu deka enggau orang nyadi kepala pengajar baik nya di sekula primari tauka sekula sekondari.

Ke diperatika aku Iban tu kelalu balat ngemaruhka diri sereta suah ngelakka orang bukai. Kemaya hari tu orang ke deka dipadu nyadi kepala pengajar baik nya di sekula primari enggau sekondari mesti bisi enggau kus kepala pengajar ke dikumbai enggau jaku puntang NPQEL. Amat mih pengajar Iban tu mayuh ari beluh di Letung Kumpang, banyak ari lemetak di Tinting Kedang, nyampau ari lingkau genggam meranggang tang sida tu mayuh ke enggai enggau orang ngeruhka ai bepinta masuk kus nyadi kepala pengajar. Nya mih tadi laban deka ngelakka orang bukai. Nya nyau baka ke udah nyadi budaya bansa Iban ke enda mudah ngayanka pengulih diri ngagai orang bukai. Pengawa nyadi kepala pengajar tu utai ke dipinta lalu ukai utai ke dichiri ngagai siku-siku orang ketegal pengulih kereja ti lati. Nya alai ketegal nya bala Iban ukai ketegal enda lati dalam pengawa sida tang ulah ke balat ngemaruhka diri sereta enggai nyingkang ke mua minta pengawa tu nyadika batu penagang dalam meransang sida megai pengawa tu.

Bisi mega ba sekeda pelilih menua ke ditemu aku bala Iban ke nyadi pengajar enda sanggup nyadi kepala pengajar laban ku sida nyamai agi ngereja pengawa sambil baka enggau orang projek nanam sawit. Ba sida pengawa tu nguntungka agi ari sukut duit ringgit sereta nadai ngasuh stres. Sekeda ari sida tu ke temu aku ulih meli orang sebuah agi ketegal bekebun sawit. Ni ke bumai sereta ngereja pengawa bukai. Ba penemu aku nya sigi nadai salah asal enda ngereja pengawa nya maya sekula. Semina pengerugi iya ngagai bansa Iban empu mih.

Ketiga nya laban kelalu nyamai ngajar tauka balat rindang sereta semampai ba zon lantang. Sida ke ba zon lantang sigi pedis deka bejalai ngagai zon baru. Sida enda sanggup napi pengawa baru, palan baru sereta pemedis ti baru. Nya ngasuh sida enda kiruh enggau orang bepinta nyadi kepala pengajar.

Nya sekeda ari kebuah ba penemu aku, pengajar Iban enda tentu enggau orang bepinta pengawa niki pangkat laban ba runding sekeda sida pangkat tu enti nitihka ke patut utai ke diberi ari atas lalu ukai utai ke dipinta.

Pulai ngagai kes nya tadi, bala Iban ke bejaku pasal pekara tu ba penemu aku ukai ketegal sida deka ngeringka bansa diri tang laban sida mega pelabaka aku baka orang bukai mega bisi pengirau ati senentang sapa ke patut nyadi tuai ngiring ngembing raban pengajar ngajar sereta narak anak sida nyadi nembiak ke lati sereta ulih mantaika seregah sereta ulah ti manah. Enti diperatika bala Iban kemaya hari tu bala bendar nelap sereta meri peluang ngagai raban bansa bukai dalam mayuh pekara. Bansa bukai ke kala didinga kitai baik nya ba surat berita tauka media sosial sigi terang-terang niri negika bansa sida. Enti nama-nama utai bisi nyadi ba sida, sida sigi lalu ngeligan, muras sereta mantaika serebana ati kemaya nya. Bala Iban enda mudah baka nya amat mih Iban kala digelar bujang berani.

Nya alai kitai bela ngarapka isu tu ulih diputarka enggau manah sereta enda nyima ati orang empu menua sereta mega orang ke udah dipadu mangku pengawa nya. Sema jaku ukai dipilih baka antah lalu ukai mega dicheruh baka kubah. Enti deka, alah enda enti enggai nama-nama utai enda ulih nyadi. Kuasa madu sereta milih orang ke patut bisi ba jari sida ke di atas semina runding patut panjai sebedau sepeneka ngasuh orang nyadi tuai ba sesebengkah endur laban munyi ku jaku tuai baka merau endang nitihka ai lalu baka nya mih lebuh ngereja pengawa endang patut nitihka atur. Kitai sama bela ngarapka isu tu nyadi teladan jemah ila ngagai sida ke di atas.