MINGGU tu masuk minggu kedua dalam peresa SPM taja pan
dalam minggu tu nadai keretas peresa ketegal pengerami Gawai Deepavali. Taun tu
bisi 440, 682 calon ngambi peresa
Sijil Pelajaran Malaysia (SPM) ba serata menua Malaysia. Tebal agi calon tu
datai ari sekula perintah lalu kurang lebih 30,000 nya calon ngati kediri tauka
calon prebet. Bisi mega calon baru sereta bisi mega calon ke ngulang peresa SPM
tu. Bisi mega calon ti enggau naka ulih belajar bebendar dikena nentuka sida
mujur dalam SPM 2015. Sekeda ari sida tu nya orang ke timpang fizikal sereta sida
ke kurang pengulih bukai, tang nya ukai penanggul sereta dalih sida enggai
belajar bebendar. Kelimpah ari calon, apai indai mega meri perati ti berat
ngagai anak-anak ke ngambi peresa ti berat tu.
Senario tu ngayanka pemesai sukung mensia mayuh ngagai
pelajar sekula. Tikas penyedar mensia mayuh ngagai pemesai reti pelajar sekula
ba siti-siti ruang bilik tau dikiraka udah majak niki sereta ba rampa dandang
ti luas.
Dipelabaka aku tentu bisi sekeda ari kitai ti kala macha
ba surat berita senentang siku calon di Perak ti dikiraka chukup mai reti
ngagai kitai semua. Chong Sing Woh, taja pan udah lunggar umur, 60 taun nadai
kala ngalahka diri baka rambai jaku agi
idup agi ngelaban. Nitihka berita, iya kala puntan dalam lima peresa SPM sebedau
tu. Tang pekara nya enda kala nagang iya ari majak nguji deka ngulihka pemujur.
Indah ku iya, iya udah bisi juluk ati deka nampung pelajar iya ngagai Universiti
Pendidikan Sultan Idris (UPSI). Enti sema iya enda mujur sekali tu, Chong
enggau terang madahka enda ngaku diri alah. Iya bepegai ba philosofi: nuntut
ilmu biar datai ke kitai parai.
Nya mih chunto teladan pengering semengat Chong ti patut ditanam
dalam roh semua nembiak redak enggau peturun Malaysia jemah ila.
Tiada ulasan:
Catat Ulasan