Dekaka jaku Melayu tang ngenggaika jaku English

Isu pemesai guna jaku English kemaya hari tu balat amat nyadika buah kenang ukai semina mensia mayuh tang mega raban politik enggau raban aktivis jaku bansa. Bisi seraban ke suah ngumbai diri negi sereta ngetanka nasionalisma  sereta pemesai guna jaku Melayu kalih-kandih ngenggaika jaku English ngeruga jaku bansa. Sida tu mati idup, telentang tungkup endang enggaika jaku English.

Nadai salah kitai ngembuan ulah nasionalis baka nya tang ba maya ti sama kitai mega patut ngembuan ulah ti pragmatik. Katika kitai ulih idup enggau semina ngembuan ulah nasionalisma lalu ngembuan pengarap jaku Malaysia nya ulih ngerakupka rayat menua tu? Naka ke udah diperatika aku, nadai udah siti jaku di dunya tu ulih ngerakupka rayat iya. Indah jaku English ke udah pegari sereta tebilang dikena serata dunya pan enda ulih ngerakupka orang Irish, Scottish enggau English (England) taja pan sida bejaku ngena jaku ti sama.

Ba penemu aku, jaku English ukai agi jaku dikena orang megai sereta merintah menua bukai baka dulu suba tang jaku nya kemaya hari tu udah mayuh dikena ba pengawa dagang. Ngembuan pengelandik jaku English mega enda chukup. Kitai mega patut ngembuan pengelandik bejaku jaku bansa bukai baka jaku Mandarin enggau jaku Arab. Ngembuan pengelandik jaku Mandarin ukai ngasuh kitai nyadi orang China baka nya mega jaku Arab. Jaku Arab mega beguna kelebih agi enti kitai bisi ati deka bejalaika pengawa dagang ba menua Arab. Jaku tu mih chara ngasuh kitai semitan sereta ulih enggau nampil randau orang bukai.

Senentang tuduh penemu ti deka ngadaka sekula sebansa aja nya ba penemu aku semina ulih mujur enti kitai ulih ngenataika diri ba tikas ti ideal baka ke bisi di Thailand. Indah Thailand kemaya hari tu udah mupuk muka sekula China enggau sekula agama. Ba penemu aku deka tusah mimit madahka jaku nya kunchi penyerakup. Kitai semina nemu sereta mereti ketegal jaku ti sebaka tang iya ukai mesti nya kitai deka besetuju sereta sepenemu entara kitai.

Ambika banding, parti ke ngena jaku Melayu aja mega bisi tanda-tanda bepechah ketegal bida ari sukut penemu taja pan sida semina ngena jaku Melayu ti sama. Peluang gawa enggau pengawa dagang nya nyangka dipelaba ulih mai penyerakup ngagai semua orang. Ba penemu aku sekula semina ulih ngadaka pemereti ati ti manah tang kitai ulih ngiga mayuh chara ti bukai dikena beserakup enggau pangan diri. Kitai udah kala nguji muka sekula baruh siti perabung tang mih puntan baka jelan jalai jelu, labah baka baka buah merunjau ulu.