Ngenuluka peluang ngagai peranak menua

Jaku gerah ti madahka 1.5 juta pengereja pengawa bansa Bangladesh ke deka dibai tama ke dalam menua kitai dalam timpuh tiga taun ti deka datai udah nerima mayuh macham timbal penemu ari raban gerempung serakup pengereja pengawa, gerempung ukai kuasa perintah (NGO) enggau sekeda tuai politik. Timbal penemu ari mensia mayuh ba laman sosial mega enda besetuju enggau tuduh penemu tu.

Penyampau pengereja pengawa ari menua luar kemaya hari tu udah datai ba tikas  kritikal laban kitai ulih meda enggau mata diri empu pekereja luar tu ulih dipeda gawa ba dini-dini endur ba menua kitai tu. 

Dalih ti diberi madahka raban pengereja pengawa ari luar nya diansak bai tama ke menua kitai ketegal rayat menua tu empu enda rindu bekereja ba sekeda sektor tang nya ukai dalih ti chukup tegap laban bisi mega bala pekereja luar tu ngisi pengawa ti ke bendar ulih diiisi peranak menua tu empu. Ambika banding, pengawa penyaga pengelikun, mekanik kereban bemoto, tukang wang, pemantu katering, juruteknik airkon enggau mayuh agi ti bukai udah diisi peranak menua luar. Tu ngeyempitka peluang jereki rayat kitai empu menua. Aruh iya enda patut enti pengawa ti begunaka setipikit enggau pengelandik mega telepas ngagai rayat menua luar. 

Kelimpah ari nya, penyampau pekereja pengawa ari luar ti deka dibai tama iya nya 1.5 juta iku orang. Tu dikira kelalu mayuh taja pan perintah udah meri jamin madahka kesemua orang ke datai enda beradat (PATI) deka dulu diburu pulai. Katika enda, laban mayuh amat program muru enggau ngampun sida tu udah dipejalaika tang lalu empai nyapai taga ti diarapka.

Empas ari program ti puntan dipejalai nya udah ngasilka PATI ke udah beranak-betelesak di Malaysia. Penyampau pekereja ari luar enggau PATI nitihka berita udah datai lebih enam juta iku orang. Tu ngasuh rayat berasai enda lantang sereta nangi diau ba menua diri empu. Kebuah pia, laban sida nyau dipejal bekunsika rampa genturung pendiau sereta kereban pengangkut rama enggau raban pekereja luar tu. Pekereja menua luar ke diau di Malaysia tu mega nyau dipeda ngulah diri baka ti diau ba menua diri empu. Sida masang moto enggau neriba kerita ba jalai raya enggau sepeneka ati sereta nadai besekat.

Pengelale raban penerit adat local council (PBT) meratika aktiviti peranak menua luar mega nambahka penyampau premis dagang diempu sida tu mega, kelebih agi ke diau di Lempa Klang. Pekara tu balat agi nyadi enti bejuta-juta iku sida deka dibai tama ke menua kitai.

Perintah maya ke mantaika Perambu Lumpar Malaysia ke-11 (RMK-11) udah nerangka kitai madahka  1.5 juta peluang gawa deka disediaka nyentuk ke taun 2020 lalu bisi juluk taga ti deka ngangkatka produktiviti sereta ngurangka kes ke kelalu bepanggai ba pekereja ari menua luar ke semina ngembuan pengelandik gawa ti baruh. 

Ba baruh pugu strategik ‘Ngangkatka Pemansang Modal Mensia Ungkup Menua Maju’, 60 persin ari gawa ti deka disediaka nya begunaka pengelandik ba bidang teknikal enggau vokasiaonal (TEVT). Nambahka nya, Program Latih Ke Menua deka ngemasukka elemen ngelatih pengelandik ngambika meri peluang kedua ngagai bala nembiak ke puntan dalam bidang akademik. Nembiak ke lepas ari TEVT udah tentu dipejal besemekih enggau bejuta pekereja luar ke endang udah bisi ditu sereta enggau 1.5 juta agi pekereja luar ke bukai enti perintah tetap majakka tuju sida ti deka mai pekereja luar ti baru. 

Nembiak rebak baru patut diberi peluang ke dulu agi bebanding enggau rayat menua luar laban pemansang menua ke nguing ngagai menua maju tentu ngembuan reti ti besai enti asil iya datai ari tulang urat rayat kitai empu.

Opis Menteri Dalam Nengeri dipinta numbuhka siti komiti ti diarika raban pengempu pengereja pengawa, gerempung serakup pengereja pengawa, tuai akademik enggau NGO dikena betungkapka empas enggau implikesyen ari sukut sosio-budaya, ekonomi enggau pengelikun sebedau neruska pengawa ti deka mai tama raban pengereja pengawa ari Bangladesh.