Tinjau pemansang 2020 tauka
tebilang agi dikumbai Wawasan 2020 keterubah iya dibantai Tun Dr. Mahathir
Mohamad maya iya mantaika keretas kereja ‘Malaysia Nyingkang Ke Mua’ ba aum
keterubah Majlis Perdagangan Malaysia kena 1 March 1991. Tinjau pemansang nya
ngrintaika objektif ti nyengkaum pengawa ngemansangka Malaysia nyadi menua maju
dalam taun 2020.
Diatu semina tinggal lima taun da
agi dikena menua kitai nyapai tinjau pemansang nya. Datuk Seri Najib Razak maya
aum besai UMNO empai lama tu tadi madahka perambu enggau visyen sepengudah
Tinjau Pemansang 2020 nya deka dipejuraika maya taun dudi. Perambu ti dilanggur
nya tentu deka ngira mayuh aspek lalu semua nya deka digumpul, dikupas, diperinchika
sebedau iya nyadi siti dokumen polisi perintah sepengudah 2020. Iya deka
ngayanka gambar menua Malaysia nyentuk ke taun 2030. Jurai nya patut mega
mungkur penemu sida ke anda dalam mayuh macham bidang ti mungkur semua aspek
pengidup sereta mega penemu ari raban nembiak redak munyi ku jaku tuai; enti
deka berumah dulu nirika kah, nuntung perambu.
Dikena ngemunka pengawa tu, sida ke
bejalaika pengawa nya ba penemu aku, patut ngaturka aktiviti nulis esei ke
dibuka ngagai raban nembiak sekula, universiti enggau raban nembiak redak ke
bukai. Topik ti tau ditulis nyangka pasal ‘Malaysia sepengudah 2020 ari
persepektif aku empu’. Isi esei nya patut mungkur imej tauka gaya rupa
pemansang ti dikedekaka udah taun 2020. Ari nya kitai tau bulih input ti beguna
dikena ngerapitka penemu ti agi meranggang.
Siku penulis barat ti benama Robert
Mcgarvey kala nulis chara ngulihka sesebengkah pekara ti dikinginka mensia.
Kenu ku iya, tu nyengkaum ngariska objektif juluk ati, nulis juluk ati nya ba
atas keretas, nusun strategi, netapka haribulan kepenudi, ngembuan ulah ti komited,
enda rawan ke pemuntan lalu enda lubah ngaga sesebengkah pekara. Mcgarvey meri
langkah rapat ti dikena mayuh raban
orang di serata dunya ke udah ngasuh sida mujur tebilang ba bidang ekonomi,
sosial enggau politik.
Taja pia, pengawa ngulihka juluk
tinjau pemansang nya ukai pekara ti mudah. Polisi Ekonomi Baru (NEP) ambika
chunto, udah naga 30 persin Bumiputera masuk dalam pengawa dagang tang ba
pengujung timpuh polisi iya nya dalam taun 1990 semina tulih kurang ari 20
persin orang Bumiputera masuk dalam pengawa dagang.
Nya alai, nitihka peragam, polisi
perintah udah taun 2020 nyangka balat agi meri fokus ngagai pemansang sains
enggau teknologi. Ambika banding, patut diperundingka mega chara mutarka
penanggul kelalu mayuh pekereja ari menua luar bekereja ba dandang kebun sawit.
Nyangka penanggul baka nya ulih diputarka enti pekereja nya diganti enggau
robot.
Taja pia, sesebengkah idea di luar
kutak dipinta ukai ketegal deka meratika pemansang ti dikinginka sepengudah
taun 2020 tang mega patut nyengkaum chara mutarka isu kronik baka isu tekelalu
mayuh peranak menua luar diau ba menua tu, kos daya idup ti semampai niki, penusah
sektor kereban pengangkut ba nengeri sereta penanggul ba menua pesisir. Baka ni
deka nyekat penatai raban rayat kitai ari menua pesisir pindah ke nengeri laban
ketegal pemindah nya nyau nerenak mayuh macham penanggul ti bukai.
Polisi sepengudah taun 2020 nya ila
mega patut meri perati ngagai pekara ba menua pesisir baka numbuhka industri
dikena narit ati raban nembiak redak. Enti enda pia, lebuh datai ba taun 2030
semua nengeri besai deka penuh dedat enggau peranak menua ti pindah ari menua
pesisir. Tu tau ngujungka penyampau orang ke dipanjuk penyeranta di nengeri
besai deka betambah mayuh lalu ulih ngenimpang pemansang
menua. Nya alai idea ba luar kutak endang beguna dikena ngemujurka visyen 2030
laban iya baka kitai ke gali anang enda bepanggal; baka duduk anang enda
bepelasar.
Tiada ulasan:
Catat Ulasan