Panyun Jaku
Dipelabaka mayuh peranak menua
Malaysia udah nemu reti Bantuan Rakyat 1 Malaysia tauka tebilang agi dikumbai
enggau nama BR1M. BR1M udah lama jelai rita tampak nama kelebih agi ba sida ke
endang bisi kaul terus enggau pekara tu baik nya di nengeri tauka di menua
pesisir, baik nya tuai sekalika biak. Taja pia, aku deka mantaika baru reti
BR1M nitihka iya ke udah diterangka parti Barisan Nasional. Definisyen reti
BR1M nya diambi terus ari http://www.barisannasional.org.my/br1m, enda dikalih ngagai jaku Iban ngambika reti enggau konsep ulih diperatika
terus ari jaku Melayu.
Pada pembentangan Bajet 2012 baru-baru ini, Kerajaan telah mengumumkan
untuk memberi bantuan tunai sekali bayar
sebanyak RM500 kepada isi rumah yang berpendapatan bulanan RM3000 dan ke bawah. Bantuan
ini adalah tanda keprihatinan Kerajaan Barisan Nasional dalam usaha untuk
membantu meringankan kenaikan kos sara hidup rakyat. (http://www.barisannasional.org.my/br1m)
Sepengudah krisis mata duit Asia
dalam taun 1997 – 1998 enggau krisis mata duit global, dia mayuh menua Asia
udah ngemun sereta negapka program kaul pengelikun sida tauka dikumbai safety net dikena mantu sida ke tusah
napi penanggul ekonomi enggau kos daya idup. Sekeda menua tu bisi siti tauka
lebih program kaul pengelikun. Iya mungkur mayuh leman pekara ti dituju ngagai
sekeda raban peranak menua bepelasarka ungkus belanja enggau kompleksiti
pengawa ngaturka pekara tu.
Ari sukut rama, jaku ‘kaul
pengelikun’ tauka safety net tu disemaka
baka payung ti bisi mayuh program dituju kena mantu ngerayung sekeda raban
peranak menua tu ti begunaka tulung enggau sukung ari perintah. Tu mungkur pengawa
beagihka pemakai, skim mindahka duit, mayuh leman program beberika pemakai
enggau skim pengereja pengawa.
Batang Kenang
Taja pan menua kitai Malaysia ukai
dikumbai menua ti balat ngemeratka pengintu pengelantang pendiau mensia mayuh
tauka dikumbai welfare state tang iya
mega baka menua bukai meruan bisi program kaul pengelikun ti menyana dikena
mantu rayat. Kaul pengelikun tu nyengkaum sistem pengelikun sosial enggau
sistem nyaga pengerai rama.
Sebedau BR1M tu dipejalaika
perintah dulu suba endang udah bisi mayuh polisi sosial enggau inisiatif dikena
ngintu pengelantang pendiau mensia mayuh. Tu mungkur program ngemunaskan
penyeranta dikena ngangkatka sida ke mensena lalu enggau peranak menua ti idup di baruh penatai pemisi 40%.
Mekanisma bisi diperambu ditaga
ngagai sida ke bepenatai pemisi ke baruh enggau sida ke balat begunaka bantu.
Kebuah pia laban subsidi ti diberi perintah sechara rama deka beseranyat diambi
perintah pulai sereta diketuka. Entara taun 1970 ngagai pengujung taun nyin
kemari penyampau orang ke ditangkup penyeranta udah kurang, iya nya ari 49.3%
ngagai 0.6% lalu sida ke dikumbai hardcore
miskin, iya nya 0.6% udah nadai agi.
BR1M tu berengkah diberi ngagai
rayat ke patut nerima sereta diberi dalam tukuh duit cash lalu diberi sekali
tauka one-off dikena sida napi kos
daya idup ti majak niki. Diatu dalam bajet 2016, BR1M tu udah masuk taun ke
lima. Entara taun 2012 ngagai 2015, RM13.7 bil BR1M udah diberi ngagai peranak
menua ke ngembuan penatai pemisi RM4,000 ke baruh. Tu nyengkaum sida ke ke
bedau belaki bebini (bujang) ke beumur 21 taun ke atas lalu begaji RM2,000 ke
baruh sebulan. Dalam bajet 2016, RM5.9 bil. udah diungkup ke 4.7 juta iku orang
ke udah beruang bilik enggau 2.7 juta iku orang ke agi bujang. Munyi ke udah disebut tadi, BR1M tu berengkah
enggau pemeri mata duit RM250 enggau RM500 ke sida ti udah beruang bilik sereta
nerima gaji RM3,000 ke baruh. Tang nyau kelama-lama penyampau duit ti diberi tu
mega majak niki entara RM400 ngagai RM1,050 sereta sida ke patut nerima mega
mungkur sida ke begaji baruh ari RM1,000 di baruh e-kasih.
Taja pan, pengawa ti beberika duit
endang bisi mantu sida ke sigi ditaga nerima tang bisi mega orang ke mejah
pengawa tu. Ba penemu sida, program tu enti semampai dipejalaika deka ngurang
penatai pemisi rama perintah. Iya mega enda ngurangka seraka penatai pemisi
rayat ti endang udah enda setimbang enggau pangan diri naka kediatu. Kelimpah
ari nya mega, BR1M semina ngemanjaika timpuh beberika duit panjar ngagai rayat.
Pekara ti kelalu bepanggai ba duit bantu tu deka ngasuh sekeda ari rayat tu
majak ngelusu sereta enda meransang sida bekereja.
Sida ke mejah program tu mega ngembuan
penemu ti madahka duit ke diberi chara rutin nya deka ngasilka peranak menua ti
kelalu bepanggai ba orang bukai. Program tu tau ngasuh sida kelalu bepanggai ba
perintah lalu iya mega tau mai empas ti enda manah ngagai ekonomi menua enggau
raban waris peranak menua Malaysia jemah ila.
Mensia mayuh mega majak deka nemu
enti program tu ulih beretan lama tauka enda
sereta ulih dikira siti ari strategi ekonomi timpuh panjai. Taja pan
BR1M tu dipeda ulih mantu mensia mayuh dalam timpuh sementara tang raban penempa
polisi tauka raban politik mega patut nyerenihka baru program tu ari sukut raban
orang ke amat-amat patut nerima BR1M. Kebuah pia, ba sekeda hal, pemeri mata duit
tu ukai reti iya nerima sukung ti kuat ari mensia mayuh.
Nambahka nya, mensia mayuh agi enda
tentu puas ati enggau chara duit tu diagihka. Endang amat sida ke merinsa
mensena tu minta dirika suku bandung beluit awakka enchegit enda rebah. Tang nitihka
ripot Auditor General (A-G) taun 2014 madahka beribu-ribu iku orang udah nerima
duit tu lebih ari sekali. Bisi nya nyau sampai empat kali. Penerima ti betandu
tu udah ngujungka duit perintah entara taun 2012 ngagai taun nyin kemari
tebasau RM3 mil. Penerima ti betandu nerima duit tu berengkah ari taun 2012,
iya nya bisi 2,188 iti penerima ke dikira dalam mata duit nya RM1.11 mil, 2,490
iti dalam taun 2013 (RM1.14 mil) lalu dalam fasa 1 taun nyin kemari bisi RM1.09
mil.
Isu ke balat ngeruga runding mensia
mayuh nya ari sukut orang ke patut nerima BR1M tu. Kati iya amat-amat ditaga
ngagai sida ke endang patut nerima bantu tu tauka ukai? Bisi sekeda ari bala
mensia mayuh madahka sida ke nerima gaji entara RM3,000 ngagai RM4,000 sebulan
enda patut-patut nerima duit bantu tu. Ngagai sida ke enda patut nerima tu
endang semampai ngasaika diri untung nemu beliung enda ngambuh, betuah nemu
peredah enda ningkuh.
Ari sukut objektif, program
beberika duit tu endang polisi rama ke ngembuan tuju dikena mantu rayat napi kos
daya idup sida kelebih agi ba hal pemakai enggau kereban pengangkut ti majak
niki ari sehari ke sehari. Nya alai, duit pemeri tu sigi naga sida ke bisi
penanggul napi daya idup baka sida ke merinsa mensena, sida ke udah tuai lukai,
sida ke singkung belung enggau sida ke beumur baruh ari 18 taun.
Naga pemeri tu ngagai sida ke
merinsa mensena tu endang utai ti patut dikereja. Kebuah pia laban penatai pemisi
sida endang baruh lalu sida tu mega deka balat agi ngasaika pemedis maya kos
daya idup majak niki. Pekara tu meri impak negatif ngagai bajet sida. Sida ke
merinsa mensena tu ngungukupka belanja ti lebih ngagai pemakai enggau kereban
pengangkut.
Kurang ruang fiskal enggau isu
pengetan fiskal sepemanjai maya mega nyadi penanggul dikena napi pemansang.
Ungkup belanja mega majak dibagi ngagai mayuh leman pekara baru ti dikira patut
enggau beguna ngujungka iya mai empas ngagai ungkup belanja pekara ti bukai.
Nya alai, nyau nyadi pekara ti berat amat meresa sereta nimbangka pekara ti
bisi kaul enggau pengetan fiskal. Kebuah pia, laban raban pemeri duit tentu
takutka empas negatif ari sukut politik. Sida mega berasai sereba salah deka
meri tauka enda laban baka sempama jaku tuai, baka tumbuk sangkuh aduh anang;
diasur pedis dibatak pan pedis.
Kelimpah ari duit ke diberi genap
taun, bajet perintah mega nyediaka ungkup belanja ngagai sekeda opis menteri
dikena sida napi mayuh macham program ti dipejalaika ngagai rayat ba menua
pesisir enggau sida ke ba nengeri ke bepenatai pemisi kurang ari 40% sebulan.
Tu nyengkaum nyediaka pugu perengka guna, kereban sosial, rumah enggau bantu
pelajar.
Perintah mega patut meratika baru
program kaul pengelikun ti bepelasarka objektif, tukuh, chara iya dipelajaika
enggau duit agih ngambika duit ari penatai rama nya ulih dikena enggau chara ti
betul sereta engkeman. Nya mih kebuah, raban politik sereta birokrat patut
ngaga pemutus runding ti nemban sentang polisi rama ti bepelasarka duit enggau
pengetan fiskal seraya dikena ngetanka
kauntibiliti ti tinggi senentang atur bejalaika duit raban orang pemayar
chukai.
Duit bantu patut dikumbai komplimen
lalu ukai alternatif pun penatai pemisi enggau ubah pemanah ba pelasar servis
enggau pekara ti diguna. Nya alai,
endang udah nyadi tanggung pengawa perintah nyediaka sukung ari sukut hardware enggau software ngagai sida ke patut nerima lalu nyikap sida enggau
pengelandik sereta penemu ngambika sida ulih ngangkatka daya idup diri.
Besenutuk enggau nya mega, polisi rama ti dipejalaika perintah patut ulih narak
peranak Malaysia ngembuan bingkai akal runding (mindset) enggau ulah ti
betul dikena ngemansangka pengawa rama enggau ekonomi.
Nya alai, dalam awak ti panjai,
bajet ti dipejalaika enggau penuh tanggung pengawa lalu dikelapungka enggau
pengawa ngelatihka pengelandik sereta nambahka penemu diarapka ulih ngangkatka
kapasiti modal mensia, ngelumu aset ti produktif, sereta nambahka penatai
pemisi enggau pengulih nambah pemisi diri ngagai sida ke patut nerima bantu tu.
Projek enggau program ti ngangkatka
penatai pemisi enggau kualiti daya idup sida ke ba menua pesisir patut meri
fokus ngagai pengawa ngangkatka pengelandik sida sereta nyambung sida ngagai kluster industri
ti berimbai pendiau enggau sida, lokaliti ti udah ditaga enggau nengeri ke
semak sida diau. Perintah mega patut nyediaka sukung fiskal enggau ukai fiskal
ngagai sida ke bekereja kediri, sida ke bedagang chara mikro enggau ngagai industri
mit sereta jelan pemesai.
Pemansang ba industri ti bepelasarka
agro patut disukung enggau pengawa ti begunaka teknologi agrikacha ti moden
dikena ngangkatka penatai pemisi orang ba menua pesisir seraya ti meransang
bala nembiak rebak baru sama-sama enggau masuk ba aktiviti betanam betupi.
Besenutuk enggau nya, sida ke ba
nengeri ke bepenatai pemisi ti baruh ari 40% patut dibantu nengah program
ngangkatka kapasiti kohesif sida ti disempulang enggau aktiviti pengintu
pengelantang pendiau ti produktif. Kedua-dua pekara tu dikena nambahka pengulih
ekonomi sida. Aktiviti pengintu pengelantang
pendiau tu mungkur pengawa nyediaka pugu perengka guna, perengka guna sosial
enggau rampa pendiau ti engkeman.
Pengawa ngelatihka pengelandik,
program teknikal enggau vokasional ti diungkupka ngagai sida ke nadai kereja
tauka nembiak ba palan pelajar tinggi ukai semina ulih ngangkatka pemanah chara
sida gawa tang mega nyaup mantu sida ke deka gawa kediri. Bidang ke ulih
dilatihka pengelandik tu mungkur pengawa bebikika kereban elektrik, paip,
bejait, begagaka kui, pengawa ba bidang hospitaliti, pengawa bepelasarka
pengelandik jari, pengawa bebikika moto tauka mekanik enggau sida ke ba pengawa
beproseska pemakai.
Pengawa beranakka puku ba kereban
pengangkut rama, bidang pelajar, penyaga pengerai enggau rumah ti ulih diempu
rayat ke ngena duit ari pun penatai rama patut dipejalaika enggau betul sereta
semitan. Kebuah pia, ngambika kualiti pengidup ti manah ulih disepi semua
rayat.
Kelimpah ari nya, menua kitai mega
beguna bendar ke kaul kereban pengangkut ti semitan, besepadu sereta likun
dikena mensia mayuh mindah kin kitu. Kebuah pia, laban evidens chara global
udah ngayanka sistem kereban pengangkut rama ti dipejalai enggau atur ti manah
ulih ngangkatka ekonomi sepemanjai maya.
Penutup Jaku
Pengawa beberika duit ngagai bala
rayat endang semampai diterima mensia mayuh kelebih agi ngagai sida ke endang
patut nerima duit nya kelebih agi maya ti bisi penanggul enggau penusah ti
datai sebarang maya. Amat tauka enda BR1M tu polisi rama ti rasional? Nya
bepanggai ba raban pemacha nisih pekara tu. Anang enda ingat mega tuduh runding
ti madah pengawa ke beberika duit bantu ti nyadika rutin pengawa perintah tu
tau ngujungka iya ngandaika mensia mayuh lalu ngasilka peranak menua ti kelalu
bepanggai ba perintah.
Sanding Penemu
Focus Malaysia, Weekly Issue 154
Tiada ulasan:
Catat Ulasan