Langkah Rapat Ti Belalauka Guna Lebuh Ngaji Pengereja Pengawa

Panyun Jaku

Pekara ti deka dikenang aku sekali tu bisi kaul enggau isu ke benung angat bendar dipejuraika mensia mayuh lalu nyadi buah kenang baik nya ba kedai kupi tauka media sosial. Kitai bela ninga berita  Malaysia ke deka ngambi pengereja pengawa ari menua Bangladesh dalam timpuh tiga taun ti deka datai tu. Nya mih bisi kaul enggau pekara ti deka dikenangka aku ditu.

Batang Kenang

Sepengudah merdeka, Malaysia ngerikodka pemansang ti regas ba bidang ekonomi kelebih agi ba menua Asia. Anggar Kasar Produk Dalam Menua (KDNK) ngerembai ari pukul rata 6.5% setaun. Ekonomi ti ngelama tu balat bepanggai ba pengeraja asal diatu udah berubah ngagai ekonomi bepelasarka industri.

Pemujur ekonomi tu patut bendar diberi puji tang ukai semina ngagai rayat Malaysia aja tang mega ngagai pangan kitai iya nya “pengereja pengawa ari menua luar”. Sida tu udah segulai sejalai bebendar sama gawa enggau kitai semua enda milih bansa enggau pengarap kena ngulih juluk ati Malaysia.

Pengereja pengawa ari menua luar keterubah iya diambi dalam taun 1980an maya Malaysia mungkal ngembuan juluk ati ngambu pengawa ba bidang industri nyadika agenda besai perintah. Kenyau ari nya penyampau sida ke ngampar ke menua kitai majak betambah mayuh semayuh ngujungka diatu lebih ari enam million iku baik nya datai beradat enggau ke tama enda beradat.

Kemaya hari tu, kitai nerima pengereja pengawa ari menua India, Indonesia, Vietnam, Thailand, Kambodia, Myanmar, Pilipin, Bangladesh enggau Nepal. Mayuh sida tu tama ke Malaysia enggau chara ti beradat lalu ngambu menua tu nyadi menua sida lalu ngentap pendiau diri ditu taja pan udah nya pengentap sida nya dikira enda beradat. Kelimpah ari nya, sida mega mupuk nyerapka diri ke dalam budaya enggau jaku menua kitai.

Sida mega terus gawa enggau enda beradat ukai semina ba pengawa begagaka rumah, ba kebun bedandang besai enggau sektor ti udah dikemendarka perintah tang mega lalu nyaruk diri nyadi vendor, bedagang chara mit, bejalaika busines mit, nyadi pedagang, tukang nebas rumput, tukang nguntin buk, deriba teksi, tukang miki lektrik, muka restauran sereta ti pengawa bukai ke ngelama tu dikereja orang Malaysia empu.

Sida tu ulih mujur besemekih enggau kitai menua tu empu laban sida enda bebayarka nama-nama levi tauka bayar bukai ti diletakka perintah. Nya ti ngasuh orang Malaysia empu dipejal napi kos daya idup ti tinggi dikena sida ngulihka penatai pemisi dikena napi inflasyen.

Taja pan pangan kitai ari menua luar tu bisi sama nyaup ngemansangka menua enti diperatika ari sukut positif tang penatai sida dikelapung mega enggau isu sosial sereta jenayah. Tang penyampau insiden ti baka tu kira agi mit enti dibanding enggau penyampau semua sida ke datai kitu.

Pengawa besainka Sempekat Pemereti Ati (MOU) enggau Perintah Bangladesh empai lama ti udah ke ngemendarka 1.5 million orang Bangladesh gawa di Malaysia dalam timpuh tiga taun ti deka datai bisi bendar ngasuh ati bala mensia mayuh ensiban. Ukai nama, ari perati kitai ngelama tu adat enggau atur menua amat lunggar bendar ngujungka mensia mayuh enda tentu arap naka ni sida 1.5 million iku tu majakka diri diau ba menua tu ila lebuh timpuh sida udah abis!

Mayuh rayat Malaysia endang ngumbai pemutus penemu perintah nya enda tentu nemban sereta bisi mai empas ti negatif ngagai menua kitai jemah ila. Taja pia, perintah tetap ngetanka pemutus penemu sida. Sida balat agi nyalahka gerempung pengaji pengereja pengawa ti deka agi ngaji sida tu sereta mensia mayuh ti kelalu milih gawa ngujungka pengawa ti kamah, pedis sereta tau nganu tauka 3D (Dirty, Difficult, Dangerous) nya diserah ngagai orang luar. Tang ari perati aku penemu tu balat disakal mensia mayuh.

Penyamai ngulihka pengereja pengawa ari luar ngujungka sida tauke ke ngajika pekereja deka agi ngaji sida tu laban gaji murah agi sereta ulih bulih untung ti besai ari ti ngaji orang menua tu empu. Ketegal nya mayuh pengereja pengawa kitai ke bisi pengelandik lalu nadai gawa.

Sapa entara kitai ke sanggup gawa 365 hari setaun enggau gaji ke semina RM1,000 sebulan? Tu nyengkaum bebayarka levi tang bedau agi ngira endur diau. Sapa? Saut ngagai tanya tu tentu NADAI! Tang sida ari menua luar nadai mayuh runding lebuh ke diambi gawa baruh agremen ti baka tu. Sida sigi sanggup. Tu ngujungka bala kuli tauka pekereja kolar biru balat diayahka orang ke ngaji sida. 

Ari perati aku mega, nadai rayat Malaysia nyengkaum Gerempung Pengguna Malaysia ti ngenggaika orang ngaji pengereja pengawa ari luar tang pengawa enggau atur pengawa ti ngambi sida tu patut dipejalaika enggau ludas sereta belalauka guna ukai tak ngambi sengapa kada, ambi-sengambi enda ngira penyampau. Sida mega patut berundingka orang menua tu empu. Anang sampai kitai disema baka sempama kunchit di tisi langit diasu tang but rusa di kaki tangga enda diemparu. Ba senario kemaya hari tu, endaka manah agi enti sida ke udah masuk enda beradat tu diberi pemendar nitihka undang-undang ari ke ngambi pengereja pengawa baru?

Simpul Runding

Amat mih kitai endang patut bebasaka hak mensia (human rights) enggau undang-undang pekereja antarabansa tang kitai patut mega bisi pengawa neritka adat dikena nentuka semua pengereja pengawa ari luar dijaga sereta diintu nitihka akta pekereja menua (local Employment Act) tu. Ngayah sereta meri gaji mit ngagai sida ukai ulih nulung menua tu nyapai status menua begaji tinggi dalam taun  2020 ila.

Nya alai, Malaysia patut berunding ngurangka pengawa ti kelalu bepanggai ba pengereja pengawa ari luar. Kitai patut ngemansangka mudal mensia kitai empu dikena ngulihka status menua bepenatai pemisi ti tinggi. Enti pekara nya jelungan mega dikereja ngujungka kitai empu menua dipejal ngetanka hak kitai empu jemah ila. Nama dih agi enti penyampau sida ke ngampar ke menua kitai majak nambah-menambah; bedau agi ngira empas ari sukut sosial. Ingat sempama jaku tuai; ikak lelanggak ikan enda ngaban, kudi memuri hari enda ujan.