MyKad tiru ngeruga kuasa menua

Empai lama bisi ayan ba surat berita pasal Court Majistret bisi ngeletak ukum jil entara tiga ngagai lima bulan ngagai 28 iku orang ke datai enda beradat (PATI) ke menua kitai. Sida tu peranak menua Filipina bebansa Suluk enggau dua iku peranak menua Indonesia. Sida diukum udah ti ngaku salah ketegal dituduh ngena tingki tauka kad pengelala tiru. Sida tu endang bisi ngembuan tingki tauka kad pengelala menua diri empu tang sida nadai patut bisi MyKad iya nya tingki tauka kad pengelala menua Malaysia. Insiden nya ngayanka pengawa ngeluarka kad pengelala tauka MyKad tiru mengkang nyadi  ba menua kitai taja pan sebedau tu kitai udah kala ninga mayuh berita sentang raban penerit adat ke nangkap sereta ngerampas MyKad tiru ba menua kitai. Enti isu baka tu enda diputarka enggau lengkas dia iya dipelebaka tau majak nyadi-senyadi sereta ngeruga pengelikun enggau kuasa menua kitai.

Tang iya ke ironi nya, empai lama mega kitai bisi ninga pekara ti nyau deka sama dibantai ba surat berita (Harian Metro 16.2.2016) sentang dua juta pekereja pengawa ari menua luar ti nadai ngembuan dokumen bisi diau ngampar ba menua kitai. Uji perundingka nama penyadi enti sida tu tak ulih bulih MyKad tiru? Tu bedau ngira sida pekereja menua luar ke endang bisi dokumen  lalu apin mega ngira 1.5 juta peranak menua Bangladesh ke deka diambi perintah menua tama sereta gawa ba menua kitai. Ba penemu aku, pengawa ngeluar sereta bejualka MyKad tiru nya dikereja raban sida sindiket ke chukup landik dalam pengawa tu sereta pandai ngiga mansa tauka pemeli. Sida tu bulih untung ti besai nengah pengawa bejual beli kad pengelala tiru tu. Peminta ti tinggi taja pan bayar iya mar meransang sindiket tu chakah agi ngerembaika dagang sida.

Kitai patut nemu pengawa tu sigi mai penusah sereta bisi risiko ti besai enti enda diputarka enggau lengkas. Iya ti pengabis balat empas nya ngagai aspek pengelikun menua enggau rayat kitai empu. Orang luar ke enda temu entap pendiau enggau tirai juru tak naka penyamai ulih nyadi peranak menua kitai. Sida semina belisinka MyKad tiru. Ketegal nya kitai ke rayat menua tu empu ti napi pemedis. Anang enda ingat pengawa soldadu penyelawai tauka terrorist enggau raban militan baka militan Menua Islam (IS) udah mupuk ngerekai ngagai menua kitai. Tu mega nambahka pengirau ati semua kitai. Nama penyadi enti sida tu mega ulih ngembuan MyKad tiru sereta diau nyeleba kitai semua nyadi peranak menua Malaysia? Endaka nya ngeruga pengelikun ngagai menua enggau rayat kitai semua?

Besenutuk enggau nya mega, isu tu patut bendar dikusai ari aspek kuasa menua kitai. Kad pengelala tauka tingki nya identiti, kelai enggau bukti kitai nya peranak menua. Tingki kitai Malaysia dikumbai MyKad. Nyamai amat kitai nyual tingki ngagai orang luar. Nama nya enda ngeruga kuasa menua kitai? Menua ke udah merdeka baka menua kitai enda patut ngelakka pekara tu ari majak nyadi.

Kitai mega patut nemu sida ke ngembuan kad pengelala tiru ulih ngaga mayuh leman pengawa sebaka enggau peranak menua tu empu. Sida mega ulih ngembuan nama-nama pekara ti dikembuanka peranak menua tu. Sida mega baka peranak menua tu empu berumban adan ngulihka peluang ti bisi. Nama nya enda ngeruga sereta nutup lapang ngagai rayat kitai empu? Ambika banding, sida mega ulih meli rumah, ulih nerima bantu ari perintah sereta nguna semua perengka rama ti disediaka ungkup peranak menua tu empu.

Nya mih kebuah, kitai patut ngiga jalai ti semitan dikena mutarka penanggul ngeluarka MyKad tiru tu. Pengawa ti chukup perambu ari raban sindiket  tu patut disekat. Katika sida tu kelalu kering ngujungka sida tu berani tauka sida tu endang bisi disaup orang ari dalam? Ba penemu aku, sindiket tu tentu bisi ditulung disukung enti ukai orang dalam nyangka rayat menua tu empu ke nemu agi sentang genap sukut atur sereta undang-undang ti bisi kaul enggau tu. Dipelabaka endang semampai bisi adung belalai dalam pengawa tu. Enti nya bisi pengamat, raban tu patut bendar dilabel orang ke nyual menua diri empu laban sida sanggup ngadai maruah enggau kuasa menua ketegal disuap enggau duit ringgit.

Nya alai, kitai ngarapka raban penerit adat ulih mutarka penanggul tu enggau lengkas.  Anang ngelakka kuasa menua majak diramang sereta diruga baka tu. Anang semina berundingka kuasa menua semina diruga maya bisi orang luar nyerang menua kitai. Ingat ramang ti dipeda alus lalu datai ari dalam balat agi nganu sempama baka munsuh dalam pua. Kitai patut nemu ukur peranak menua nya chukup tinggi penuduk iya lalu enda patut ulih dijual beli sengapa enggau duit ringgit baka nya aja. Nya mih kebuah raban penerit adat patut semampai merati enggau silik sereta serius semua pengereja pengawa ari menua luar kelebih agi sida PATI. Pajakka pengawa neritka adat nyentuk ke kitai ulih nangkap semua PATI ke bisi lalu ngujungka kitai ulih nyerungkai pengawa raban sida sindiket ke ngeluarka MyKad tiru tu.

Seraya enggau nya mega, diarapka udah datai alai kitai patut neritka agi ukum ke endang udah bisi. Ambika banding, ukum ti ditetapka undang-undang kena ngukum pesalah empai lama  nya nitihka Peraturan 25 (1) (e) Peraturan-peratutan Pendaftaran Negara 1990 (Pindaan 2007) ti ngeletakka ukum jil enda lebih ari tiga taun tauka ukum mata duit RM20,000 tauka kedua-dua sekali enti ditemu salah nguna MyKad tiru. Enti ukum tu lalu empai ngasuh sida PATI nya takut dia ukum tu patut diperatika baru. Baka nya mega ngagai sida ti ngeluarka kad pengelala tiru tu. Enti udah abis antah agi mega nyadi kubah, dia sida mega patut kena ukum ti setipak enggau penyalah sida ngambika enda ngenyamai nya sida ngadai sereta bejual beli kuasa menua tu.

Nya alai, diarapka pengawa ti mantaika penyalah tu majak dipejalaika awakka ulih muka mata semua orang ngambika sama bela bejimat sereta enda sekali-kali bekompromi sentang pengelikun enggau kuasa menua tu. Ukai kitai ngajihka rangkang ngachuk mata, ukai mega ngajihka babas nipas mua.