Unit 7 Rambai Jaku Pengawa

7.1   Pun Jaku

Rambai jaku pengawa (RJP) nya rambai jaku ti bepunka jaku pengawa. Rambai jaku pengawa nyadi ari siti tauka lebih leka jaku dalam konteks ayat jaku Iban. Leka jaku pengawa, iya nya leka jaku pengawa intransitif tauka leka jaku pengawa transitif. Jaku pengawa intransitif nya, jaku pengawa ke enda diimbai objek tang ditangkan rambai jaku ti nyadi penerang ba rambai jaku nya. Jaku pengawa transitif nya, jaku pengawa ti mesti  ditangkan rambai jaku nama ti nyadi objek ayat.

7.2   Tukuh Rambai Jaku Pengawa

Tukuh rambai jaku pengawa bisi dua leman, iya nya:

            (i)         Rambai jaku pengawa nadai mai objek

            (ii)        Rambai jaku pengawa mai objek

7.2.1  Tukuh Rambai Jaku Pengawa Nadai Mai Objek

Rambai jaku pengawa ti enda ditangkan objek nya rambai jaku pengawa ti bepunka jaku pengawa intransitif. Jaku pengawa intransitif bisi tiga raban, ia nya:

      (i)         Jaku pengawa intransitif nadai penembu

      (ii)        Jaku pengawa intransitif bisi penembu

(iii)       Jaku pengawa intransitif ditangkan jaku nama ti nyadi penerang

7.2.1.1  Jaku Pengawa Intransitif Nadai Penembu

Jaku pengawa dalam raban tu bisi reti menyana taja pan nadai diberi penerang bukai ngimbai iya.

Chunto:

1.    Bala nembiak bediri.

2.    Pun pisang nya tumbang.

3.    Anak mit nya nyabak.

4.    Ukui nya nyalak.

5.    Iya ngetu.

7.2.1.2   Jaku Pengawa Intransitif Bisi Penembu

Jaku pengawa intransitif dalam raban tu mesti  bisi penembu, nya baru iya bisi reti menyana. Enti kediri, iya nadai reti menyana. Elemen penembu ukai objek, laban ayat ti ngundan elemen tu enda ulih ditukar nyadi ayat pasif. Sekeda ari jaku pengawa intransitif ba raban tu baka belinsur, diau, nyadi, betikaika, bebajuka, betudungka, nyau, berasai, mansang etb. Elemen ti nyadi penembu jaku pengawa nya, bisi tiga bengkah:

(i)         Jaku adjektif nyadi penembu

(ii)        Rambai jaku penempat nyadi penembu

(iii)       Jaku nama nyadi penembu

(i)  Jaku adjektif nyadi penembu

Chunto:

6.    Pengerai aki nyau belinsur manah.

7.    Tubuh iya berasai lelak.

8.    Buah nya baru deka mansau.

9.    Manuk nya majak jinak.

(ii)  Rambai jaku penempat nyadi penembu

Chunto:

10.  Sida ngentap di Limbang.

11.  Kami sebilik bisi di rumah.

12.  Orang nya diau di Sibu.

13.  Kerita nya limpang ke kanan.

(iii)  Jaku nama nyadi penembu

Chunto:

14.  Bala penyamun komunis betikaika rau.

15. Orang tesat nya bepuaka ambun.

16. Kami besuarka munti.

17. Sida besengayuhka repik papan.

18. Menyadi iya nyadi pengajar.

7.2.1.3  Jaku Pengawa Intransitif enggau Jaku Nama Nyadi Penerang

Jaku nama ti nyadi penerang jaku pengawa intransitif ukai dikumbai objek enti ayat nya enggai nyadi ditukar nyadi ayat pasif. Elemen penerang nya semina nyadi penyukung dalam rambai jaku pengawa. Iya enda sebaka enggau penembu laban enti elemen penerang  enda dikena iya nadai ngerusak pemenyana ayat nya.

Chunto:

Subjek	Rambai Jaku Pengawa
	Jaku Pengawa	Penerang
19. Indu nya 20. Sida Adam  sebilik 21. Sida Joo Heng 22. Anak mit nya 23. Apai	bebaju bekebun bekedai belaya nemu	kurung. sayur. kopi. uduk. jaku China.

7.2.2  Tukuh Jaku Pengawa Bisi Objek

Rambai jaku pengawa ti ditangkan rambai jaku nama ke nyadi objek iya nya, jaku pengawa transitif. Ayat ti ngundan rambai jaku nama ke nyadi objek, ulih diubah nyadi ayat pasif ti menyana.

Chunto:

24.  Kami ngirup kopi.

25.  Kopi diirup kami.

26.  Iya najar batang tepus ngena duku.

27.  Batang tepus ditajar iya ngena duku.

28.  Apai aku ngeban perau nya.

29.  Perau nya diban apai aku.

Rambai jaku pengawa ti ngundan rambai jaku nama nyadi ke objek bisi dua bansa:

(i)            Rambai jaku pengawa siti objek

(ii)           Rambai jaku pengawa dua objek

7.2.2.1  Rambai Jaku Pengawa siti objek

Rambai jaku pengawa siti objek digaga ari jaku pengawa ditangkanka rambai jaku nama ke nyadi objek jaku pengawa nya.

Subjek	Rambai jaku pengawa siti objek
	Jaku Pengawa	Objek
30.  Melia 31.  Indai 32.  Igat 33.  Ini 34.  Indai	nulis mantun ngelancham nyilup nyembi	surat nya. rumput. pinsil. tikai. padi.

7.2.2.2  Rambai Jaku Pengawa dua objek

Rambai jaku pengawa ti digaga ari jaku pengawa transitif tau ditangkanka dua iti rambai jaku nama ti nyadi objek jaku pengawa nya. Objek keterubah (O1) nya dikumbai objek terus (01) lalu objek kedua (O2) dikumbai objek sangking. Lebuh ayat nya ditukar nyadi ayat pasif, semina penuduk objek terus aja ke tau berubah, penuduk objek sangking enda berubah. Objek terus nya tadi lalu nyadi subjek dalam ayat.

Chunto:

35. Agan ngigaka bini iya buah asam.

                            (O1)         (O2)

36. Bini iya digigaka Agan buah asam.

                           

37. Ginda melika anak iya baju baru.

                            (O1)         (O2)

38. Anak iya dibelika Ginda baju baru.

39. Manan ngenahka temuai pemakai.

                                    (O1)    (O2)

40. Temuai dinahka Manan pemakai.

7.3   Rambai Jaku Pengawa enggau Jaku Bantu

Jaku bantu nya jaku ti nyukung reti jaku pengawa. Bisi dua bengkah jaku bantu, iya nya:

(i)    Jaku bantu aspek

(ii)   Jaku bantu  gaya

7.3.1  Jaku Bantu Aspek

Jaku bantu aspek nya jaku bantu ti nerangka maya pekara nyadi. Sekeda ari chunto jaku bantu aspek nya baka deka, benung, bedau, udah, tengan, empai.

Chunto:

Jaku Bantu Aspek
Udah dikereja	Tengan dikereja	Bedau dikereja
udah kala	benung tengan agi	bedau empai apin

Penuduk jaku bantu dalam ayat nya baka tu.

Chunto:

41. Kami udah meda cherita wayang nya.

42. Sida kala nemuai kitu.

43. Iya benung makai.

44. Anak mit nya agi tinduk.

45. Iya deka nemuai kitu pagi ila.

Kadang-kadang jaku bantu ulih mega dikena berentayan.

Chunto:

bedau + kala

agi      + bedau

kala    + udah

apin    + kala

agi      + benung

46. Aku bedau kala ke Kuala Lumpur.

47. Iya agi bedau makai.

48. Kala udah kitu kita menyanak?

49. Iya apin kala niki Bukit Santubong.

50. Sida iya agi benung baum.

7.3.2  Jaku Bantu Gaya

Jaku bantu gaya nerangka gaya tauka asai ati. Sekeda ari jaku bantu ba raban tu iya nya baka deka, aruh, patut, ulih, mesti , tau. Chunto:

51. Aya Budin deka bejalai ke Sabah.

52. Kita patut neruska kereja nya.

53. Kitai tau mupuk diatu.

54. Kekura ulih niti batang.

55. Kami mesti  mupuk diatu.

Jaku bantu gaya mega ulih dikena berentayan. Chunto:

patut  + deka

aruh   + ulih

meseti + deka

patut + ulih

56. Iya patut deka ngemajuka diri.

57. Rimong aruh ulih ngangkatka batu nya laban iya kering.

58. Bala nembiak mesti  deka ngulihka juluk ati sida.

59. Sida serumah patut ulih ngereja pengawa nya beduruk.

Jaku bantu gaya mega ulih dikena berentayan enggau jaku bantu aspek.

Jaku Bantu Aspek + Jaku Bantu Gaya

Chunto:

60. Ugan benung deka nurun ngalu.

61. Sida bedau deka mandi.

62. Gadam kala ulih ngangkatka batu nya.

63. Sima bedau mesti  ulih datai.

64. Iya  empai deka nitihka kitai.

7.4   Rambai Jaku Pengawa enggau Ayat Komplemen

Rambai jaku pengawa, bansa transitif tauka intransitif, tau nerima ayat komplemen ti lalu nyadi ayat turu. Ayat komplemen dalam jaku Iban ditanda ngena leka jaku pasal.

(i)  Rambai jaku pengawa transitif enggau ayat komplemen

Chunto:

    

65. Kunang nyangkal pasal dawa iya ke nabanka perau Jawi.

66. Polis ngamatka pasal pemujur sida ti udah nangkap penchuri nya.

67. Berita nya madahka pasal semua penumpang selamat magang.

68. Kepala pengajar nerangka pasal atur diau di buding.

69. Pengajar madahka pasal peresa ti deka diberi ninting bulan.

(ii)  Rambai jaku pengawa intransitif enggau ayat komplemen

Chunto:

70. Apai Jega nemu pasal temuai ke datai nya orang ari opis perintah.

71. Sida berandau pasal pengawa nyemin jalai ti deka ulih tembu dalam setaun.

7.5   Elemen Penerang dalam Rambai Jaku Pengawa

Elemen penerang dalam rambai jaku pengawa nerangka pasal jaku pengawa. Dalam ayat tusun selama, elemen penerang nya nangkan jaku pengawa. Enti leka jaku nya jaku pengawa transitif, elemen penerang nya nangkan objek.

Chunto:

72. Endun nulis surat ngagai indai iya.

73. Igat macha surat kabar dalam bilik.

74. Sida berandau enggau pangan diri.

75. Bala nembiak bejalai ke sekula.

Elemen penerang tu digaga ari rambai jaku penempat, rambai jaku adjektif enggau rambai jaku nama. Elemen penerang tu bisi lapan bengkah.

(i)  Penerang tempat enggau adap

Penerang tempat enggau adap nerangka endur utai nyadi.

Chunto:

76. Mayuh lelaki bekereja ba industri ngaga rumah.

77. Pengajar Peter nyemerai ke seberai sungai.

78. Surat nya datai ari Umang.

79. Sida sebilik baru udah berangkat ke Sibu.

80. Semua pekereja bebaris ba mua opis menijar.

(ii)  Penerang maya

Jaku penerang maya bisi dua bengkah dalam ayat. Keterubah iya dikena begulai enggau penerang tempat enggau adap. Kedua, iya dikena meali-ali nyadi rambai jaku nama.

Chunto:

81. Aum nya tembu maya pukul dua ngalih hari.

82. Pengawa ngaga perau pelumba nya berengkah kenyau ari iya datai ditu.

83. Kami udah nganti penatai kita dalam pengelama dua jam.

84. Iya bisi nemuai kitu demalam.

85. Asi manis nya deka mansau lusa.

(iii)  Penerang chara

Jaku penerang chara dikena dalam dua bengkah. Keterubah iya nyadi ari leka jaku adjektif, kedua iya dikena begulai enggau jaku penempat ‘enggau’ lalu ditangkan jaku adjektif.

Chunto:

86. Perau pelumba nya ngensulun laju.

87. Sida begawai enggau ati lantang.

88. Ribut bepuput serunyut lundai.

89. Iya nyaut tanya enggau lantang..

90. Perau nya begilik lingguk-lingguk.

(iv)  Penerang tuju tauka jangka ati

Penerang tuju tauka jangka ati nerangka tuju pengawa tauka pekara ti

nyadi.

Chunto:

91. Nuan belajar bebendar ke penguntung nuan empu.

92. Perintah ngaga librari ngambi ke bisi endur orang menua pesisir  macha.

93. Sida ngaga lalau awak ke nyamai niki tangga.

94. Iya masang lampu ruas ngambi ke bilik nya terang.

95. Tuai Rumah bejaku ngena mikrofon ngambi ke jaku iya terang.

(v)  Penerang pekakas

Penerang pekakas nerangka kereban ti dikena.

Chunto:

96. Kami ngayuhka perau ngena repik papan.

97. Bala temuai nya datai ngena bas.

98. Galang malu ulat ngena tungkat mesai tunjuk.

99. Lina ngerat ubung ngena guntin.

 100. Peter ngelukis gambar ngena chat minyak.

(vi)  Penerang nyereta

Penerang nyereta nerangka pengawa ti digaga begulai enggau orang bukai.

Chunto:

101.  Tuai rumah baum enggau nembiak iya.

102.  Temuai nya nemuai enggau sida Jawing menyanak.

103.  Bala nembiak nya nemuai ngagai Gua Niah enggau pengajar

        kelas sida.

(vii)  Penerang pekara ti nyadi

Penerang pekara nerangka sesebengkah pekara.

Chunto:

104. Sida benung bejurai pasal pekara nya.

105. Semua kaban komiti besetuju pasal chara mutarka penanggul nya.

106. Tuai Rumah deka mai nembiak iya berandau pasal pekara nya.

(viii)  Penerang nyemaka

Penerang nyemaka nerangka utai ti sebaka gaya.

Chunto:

107.  Sigai belakun baka kunsil.

108.  Pemajik indu nya dipeda baka Kumang.

109.  Senapang meletup munyi ke ngerendai.

110.  Budang duduk baka tunggul.  

7.6   Simpul Penemu

Ari pekara ti dipejuraika di atas tadi, nyata bendar, chara nukuh rambai jaku pengawa endang amat kompleks. Empat bengkah simpul runding pasal rambai jaku pengawa nya baka tu:

(i)        jaku bantu + jaku pengawa transitif + objek + penerang

(ii)       jaku bantu + jaku pengawa transitif + ayat komplemen + penerang

(iii)      jaku bantu + jaku pengawa intransitif + penembu + penerang

(iv)     jaku bantu + jaku pengawa intransitif + ayat komplemen + penerang

Taja baka nya, enda semua rambai jaku pengawa mesti  ngundan tiap-tiap elemen penerang baka ti dirintaika di atas tadi. Sekeda ari elemen nya tadi tau ditinggalka enti patut.