Nama reti pengerindu

Panyun jaku

Nyema aku ulih bejaku ngena mayuh bengkah jaku mensia enggau melikat, tang enti aku nadai pengerindu, jaku aku nadai reti baka penginggar munyi gung tauka munyi luching ti sering-sering (1 Korint 13: 1).

Nyema aku bisi pemeri kena nusui pesan ari Allah Taala; bisi ngembuan semua penemu lalu meretika semua utai ti dalam; bisi semua pengarap ti tau dikena nginsitka bukit – tang enti aku nadai ngembuan pengerindu, aku nadai reti. Nyema aku meri semua utai ti dikemisi aku ngagai semua orang ti seranta, dataika ngasuh tubuh diri ditunu – tang enti aku nadai pengerindu, utai nya enda pulaika pemanah aku (1 Korint 13: 2 - 3).

Nya jaku Allah Taala dalam bup kudus nusui pasal pengerindu. Jaku nya dikena aku nyadika pemun jaku ngenang pasal reti pengerindu.

Batang kenang

Nama dih reti pengerindu enti diperatika ari sukut rama? Dalam jaku Iban nadai jaku cinta  munyi ku sekeda lagu Iban ke kala didinga ditebah ba radio. Jaku Iban ngena leka jaku pengerindu ti datai ari urat jaku rindu. 

Pengerindu mayuh macham. Pengerindu ke orang tuai, apai indai, pangan diri, ambai, bini, laki, orang ti berimbai pendiau, sekula, pelajar, pengawa, menua, bansa, jaku, tuai pemegai menua, Petara tauka Tuhan. Aku agi ngambi jaku ari bup kudus dikena nerangka reti pengerindu.

Pengerindu nya pengeliat enggau penelap; iya ukai ari ati ti kepapas, tauka temegah, tauka sumbung; pengerindu ukai perangai ti jai, tauka rangka, tauka jampat ringat; pengerindu enda ngitung penyai; pengerindu nya ukai gaga ke utai ti jai; tang iya gaga ke utai ti bendar. Pengerindu nya tan dalam semua utai, liat ati sereta mujur ngereja utai. Pengerindu meruan belama-belama (1 Korint 13: 4 - 8).

Kitai semua nemu pengerindu nya siti aspek ti besai dalam pengidup kitai besehari-sehari. Enda ngira mih nama tirai juru pengidup kitai, rawang pengerindu nya ada dalam diri kitai empu lalu ngembuan tanggung pengawa ti besai. Enti nadai asai ati ke orang bukai enda ngira nya diri sebilik tauka individu bukai, bisi ke orang kala ngasaika kitai nya baka utai idup ti benyawa, tang nadai nyampun roh iya.

Taja pia, nama utai ti dikumbai pengerindu ti bendar lalu nama ke ngasuh pengerindu kitai nya ba apak arung pengerindu ti betul.

Dipelabaka sukut penemu ti digelumu ditu ari sekeda pakar motivator enggau raban filosofi ulih mantu nambahka penerang sentang pengerindu.

Pengerindu nya ukai ... 

Manipulasyen

Pengerindu ukai reti nya kitai ulih beambi ulih ba orang bukai. Enti kitai rinduka siku-siku orang tauka iya rinduka kitai, enda ibuh mih mejal diri ngereja utai ti di luar ari pengulih tauka pengingin ati sida. ‘Enti nuan rinduka aku, nuan patut ngaga tu tauka ngaga nya ...’ nya kelai iya ukai pengerindu ti bendar.

Patut bepura-pura

 

Orang ti amat-amat rinduka kitai ulih nerima kitai baka ke sedia-ada lalu enggai kitai nya  berubah fizikal tauka prinsip idup nitihka chuan iya. Adaptasyen, uji pereti lalu titihka rentak nya. Nya ulih tang ukai sesekali mali nyadi orang bukai ke ukai diri kitai empu lalu ngereja pengawa ti ukai dikedekaka kitai.

Kelalu gauk

 

Asai kasih sayau, muras enggau ninding nya pekara selama maya orang nanggamka pengerindu tang iya ukai tiket dikena kitai tauka iya kasar enggau pangan diri. Baik nya ngayah chara emosyenal tauka fizikal, enti iya nyadi maya nanggamka pengerindu nya reti iya ukai pengerindu ti betul lalu patut bendar diseliahka. 

Dikuasa nafsu

 

Nafsu tu nginjau leka jaku Arab. Pemanah fizikal ti naritka ati nya pekara biasa maya nangganka pengerindu tang iya patut ukai kedalih nyadika pugu kaul. Pengerindu ukai  bepelasarka nafsu aja laban ukai nya aja dalam pengidup bepengerindu. Kitai mesti nemu nama kaul kitai nya semina bepelasarka nafsu aja tauka pengerindu ti amat ti disempulang enggau komitmen.

Pengerindu nya...

Kiruh 

Pengerindu nya nyadi maya kitai bisi pengiruh ke individu bukai enda ngira mih nya ambai ati tauka diri sebilik. Kitai semampai deka nemu enggau lurus ati, nama sida nya diau lantang tauka tusah, diau nyamai tauka pedis. Tiap pengiruh kitai nya enda patut disempulang enggau pengadang ti ngarapka  sebarang balas ari sida jemah ila.

Rawang rindu

 

Kitai enda ulih ngakal diri empu lalu madahka  diri rindu tang nadai dikelapung enggau rawang pengerindu maya kitai ke begulai enggau sida tauka iya. Enti kitai berasai gaga maya begulai enggau iya lalu enda ibuh begunaka nafsu aja, nya reti iya udah chukup ngasuh ati kitai lantang lalu enda ngiga pengerindu ari individu bukai.

Komitmen

 

Pengerindu datai bereta enggau komitmen. Komitmen dikena ngasuh kitai sama-sama lantang lalu sama-sama nengah sereta napi pejalai idup ti pedis tauka lantang. Mati idup, telentang tungkup kitai sigi enggau iya. Nya ngayanka kitai talukka pangan diri, muai hari enggau energi ngasuh pangan diri lantang taja pan mayuh penguji.

Nerima

 

Nerima diri empu enggau orang baka iya ke sepa jaga nya mih teras kunchi dalam kaul pengerindu ti amat. Genap iku kitai endang bebida prinsip enggau pemai-ulah. Enti kitai amat rinduka pangan, kitai ulih nerima sisi negatif sida lalu sama-sama berubah ngagai iya ke manah agi seraya ti enda bekompromi enggau pengelala diri empu.

Penutup kenang

Rindu munyi ku aku ari pun tadi nya mayuh leman pengerindu. Tang pengerindu ti bendar nya datai ari pengeliat enggau penelap; iya ukai ari ati ti kepapas, tauka temegah, tauka sumbung; pengerindu ukai perangai ti jai, tauka rangka, tauka jampat ringat; pengerindu enda ngitung penyai; pengerindu nya ukai gaga ke utai ti jai; tang iya gaga ke utai ti bendar. Pengerindu nya tan dalam semua utai, liat ati sereta mujur ngereja utai. Pengerindu meruan belama-belama.

Selamat Hari Valentine ngagai bala pemacha ti ngintu Hari Valentine!